ທະນາຄານຫວຽດຕີນລາວສະຫລອງວັນສ້າງຕັ້ງຄົບຮອບ 5 ປີ

ພິທີສະເຫລີມສະຫລອງວັນສ້າງຕັ້ງທະນາຄານຫວຽດຕີນລາວ (Vietin Bank) ຄົບຮອບ 5 ປີໄດ້ຈັດຂຶ້ນໃນວັນທີ 31 ມີນານີ້ທີ່ໂຮງແຮມເມືອງແທງນະຄອນຫລວງວຽງຈັນ, ໂດຍການໃຫ້ກຽດເຂົ້າຮ່ວມຂອງທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ, ມີຜູ້ວ່າການທະນາຄານແຫ່ງ ສປປ ລາວ, ພ້ອມດ້ວຍຄະນະຜູ້ບໍລິຫານ, ພະນັກງານ ແລະ ແຂກຖືກເຊີນເຂົ້າຮ່ວມເປັນຈໍານວນຫລາຍ.

ທ່ານອໍານວຍການທະນາຄານດັ່ງກ່າວ ໃຫ້ຮູ້ວ່າ: ທະນາຄານຫວຽດຕີນລາວສ້າງຕັ້ງຂື້ນໃນຕົ້ນປີ 2012 ຊຶ່ງເບື້ອງຕົ້ນເປັນພຽງສາຂາຂອງທະນາຄານຫຸ້ນສ່ວນອຸດສະຫະກໍາ ແລະ ການຄ້າຫວຽດນາມ, ມີທຶນຈົດທະບຽນ 22 ລ້ານໂດລາສະຫະລັດ, ພາຍຫລັງໄດ້ມີການເຄື່ອນໄຫວທຸລະກິດຢ່າງຫ້າວຫັນ ແລະ ຂະຫຍາຍເຄືອຂ່າຍຢ່າງບໍ່ຢຸດຢັ້ງ, ໂດຍສະເພາະໄດ້ເປີດສາຂາບໍລິການຢູ່ເມືອງປາກເຊ, ແຂວງຈໍາປາສັກ ແລະ ມີແຜນຂະຫຍາຍໜ່ວຍບໍລິການໄປສູ່ບັນດາແຂວງຕ່າງໆຂອງລາວຕື່ມອີກ, ມາຮອດເດືອນສິງຫາ 2015 ຈິ່ງໄດ້ຍົກລະດັບຂຶ້ນເປັນທະນາຄານລູກຂອງທະນາຄານຫຸ້ນສ່ວນອຸດສະຫະກໍາ ແລະ ການຄ້າຫວຽດນາມຢ່າງເປັນທາງການ, ໂດຍເພີ່ມທຶນຈົດທະບຽນຂຶ້ນເປັນ 50 ລ້ານໂດລາສະຫະລັດ ແລະ ກໍາລັງກໍ່ສ້າງອາຄານຫລັງໃໝ່ທີ່ມີຂະໜາດໃຫຍ່ ແລະ ທັນສະໄໝສວຍງາມຢູ່ໃຈກາງນະຄອນຫລວງວຽງຈັນ, ຊຶ່ງຄາດວ່າຈະກໍ່ສ້າງສໍາເລັດ ແລະ ເປີດນໍາໃຊ້ຢ່າງເປັນທາງການໃນທ້າຍປີນີ້.

ທ່ານອໍານວຍການທະນາຄານ ກ່າວວ່າ: ປັດຈຸບັນທະນາຄານມີຍອດຊັບສີນເປັນອັນດັບສອງໃນບັນດາທະນາຄານຫວຽດນາມຢູ່ລາວ ແລະ ໄປຄຽງຄູ່ກັບການດໍາເນີນທຸລະກິດແລ້ວ, ທະນາຄານຫວຽດຕີນລາວຍັງໄດ້ຕັ້ງໜ້າປະກອບສ່ວນເສຍພັນທະຕ່າງໆຕາມລະບຽບກົດໝາຍຂອງ ສປປ ລາວ, ທັງໃຫ້ການສະໜັບສະໜູນຊ່ວຍເຫລືອສັງຄົມໃນດ້ານຕ່າງໆ ເປັນຕົ້ນ: ສ້າງຫໍວັດທະນາທໍາຢູ່ແຂວງຫລວງພະບາງ, ຊ່ວຍເຫລືອອຸປະກອນການແພດໃຫ້ໂຮງໝໍຕ່າງໆຂອງລາວ, ສະໜອງຄອມພີວເຕີໃຫ້ໂຮງຮຽນເປັນຈໍານວນຫລາຍ, ຊ່ວຍເຫລືອການຜ່າຕັດສາຍຕາໃຫ້ນັກຮົບເກົ່າ ແລະ ກິດຈະກໍາເພື່ອສັງຄົມອື່ນໆອີກຫລາຍຢ່າງ, ເຊິ່ງລວມມີມູນຄ່າຫລາຍກວ່າ 9 ແສນໂດລາສະຫະລັດ ແລະ ຕະຫລອດໄລຍະ 5 ປີແຫ່ງການພັດທະນາ, ທະນາຄານຫວຽດຕີນລາວໄດ້ປະກອບສ່ວນຮັດແໜ້ນສາຍພົວພັນພິເສດລະຫວ່າງສອງປະເທດລາວ-ຫວຽດນາມ ແລະ ຂະຫຍາຍບົດບາດເປັນຂົວຕໍ່ດ້ານການລົງທຶນລະຫວ່າງສອງປະເທດດີຂຶ້ນ, ສາມາດປະກອບສ່ວນສໍາຄັນເຂົ້າໃນການພັດທະນາເສດຖະກິດ, ການຄ້າ ແລະ ການລົງທຶນຂອງ ສປປ ລາວ ໃຫ້ເຕີບໃຫຍ່ເຂັ້ມແຂງຂຶ້ນເທື່ອລະກ້າວ.