ລາວເອົາໃຈໃສ່ຕ້ານ ແລະ ສະກັດກັ້ນບັນຫາຢາເສບຕິດ
ທ່ານ ກຸ ຈັນສີນາ ປະທານຄະນະກຳມະການແຫ່ງຊາດເພື່ອກວດກາ ແລະ ຄວບຄຸມຢາເສບຕິດ ໄດ້ມີຄໍາເຫັນໃນວັນແຫ່ງຊາດຕ້ານຢາເສບຕິດຄົບຮອບ 16 ປີ 12 ຕຸລາວ່າ: ໃນຊຸມປີຜ່ານມາ, ພັກ ແລະ ລັດຖະບານໄດ້ເອົາໃຈໃສ່ ແລະ ໃຫ້ຄວາມສຳຄັນຕໍ່ວຽກງານສະກັດກັ້ນ ແລະ ແກ້ໄຂບັນຫາຢາເສບຕິດຢ່າງຈິງຈັງຕະຫລອດມາ, ເຊິ່ງສະແດງອອກໃນການປະກາດໃຊ້ນິຕິກຳສຳຄັນຫລາຍສະບັບ ເຊັ່ນ: ກົດໝາຍວ່າດ້ວຍຢາເສບຕິດ, ແຜນແມ່ບົດແຫ່ງຊາດເພື່ອຄວບຄຸມ, ສະກັດກັ້ນ ແລະ ຕ້ານຢາເສບຕິດ, ໄປຄຽງຄູ່ກັບກໍາລັງເຈົ້າໜ້າທີ່ຕຳຫລວດ ແລະ ພາກສ່ວນກ່ຽວຂ້ອງໄດ້ສຸມໃສ່ມ້າງຄະດີ, ຈັບຕົວຜູ້ຖືກຫາ, ຢຶດຂອງກາງຢາເສບຕິດ, ສານເຄມີຕົ້ນ, ພາຫະນະ, ອຸປະກອນຜະລິດ, ເງິນສົດ, ວັດຖຸມີຄ່າ ແລະ ອາວຸດປະເພດຕ່າງໆໄດ້ເປັນຈໍານວນຫລາຍ ແລະ ນັບແຕ່ປີ 2013 ມາຮອດປັດຈຸບັນ, ສປປ ລາວ ໄດ້ຮ່ວມມືກັບບັນດາປະເທດໃກ້ຄຽງທີ່ມີຊາຍແດນຕິດຈອດກັນຄື: ສປຈີນ, ຫວຽດນາມ, ກຳປູເຈຍ, ໄທ ແລະ ມຽນມາ ເພື່ອປະຕິບັດໂຄງການແມ່ນ້ຳຂອງປອດໄພ ແລະ ສາມາດມ້າງຄະດີໄດ້ 125.274 ເລື່ອງ, ຈັບກຸມຜູ້ຖືກຫາໄດ້ 168.591 ຄົນ, ຢຶດຢາບ້າໄດ້ 363 ລ້ານກວ່າເມັດ, ສານເຄມີຕົ້ນ 270 ໂຕນ, ຢາໄອສ 13.309 ກິໂລ, ເຮໂຣອິນ 7.553 ກິໂລ, ຝິ່ນ 14.426 ກິໂລ ແລະ ກັນຊາ 19.502 ກິໂລ. ນອກນັ້ນຍັງໄດ້ດຳເນີນການສຶກສາອົບຮົມ ແລະ ໂຄສະນາເຜີຍແຜ່ລະບຽບກົດໝາຍ ແລະ ຜົນຮ້າຍຂອງຢາເສບຕິດຢ່າງກວ້າງຂວາງ ເພື່ອປູກຈິດສຳນຶກໃຫ້ຄົນໃນສັງຄົມໄດ້ຮັບຮູ້ ແລະ ເຂົ້າໃຈລະບຽບກົດໝາຍ ແລະ ຜົນຮ້າຍຂອງຢາເສບຕິດ, ເຊິ່ງແຕ່ລະປີໄດ້ມີຜູ້ເຂົ້າຮ່ວມຫລາຍແສນຄົນ, ພ້ອມທັງໃຫ້ການບຳບັດປິ່ນປົວຜູ້ຕິດຢາເສບຕິດ ເພື່ອຊ່ວຍກອບກູ້ເອົາຜູ້ໄດ້ຮັບເຄາະຮ້າຍຈາກຢາເສບຕິດປະເພດຕ່າງໆ ແລະ ຍາດແຍ່ງເອົາການຊ່ວຍເຫລືອທຶນຈາກສາກົນສົມທົບກັບງົບປະມານພາຍໃນ ເພື່ອກໍ່ສ້າງ ແລະ ປັບປຸງສູນປິ່ນປົວຜູ້ຕິດຢາເສບຕິດໄດ້ 20 ແຫ່ງ, ໄດ້ດຳເນີນການປິ່ນປົວດ້ວຍການໃຫ້ຄຳປຶກສາແກ່ຜູ້ຕິດຢາເສບຕິດ ແລະ ຜູ້ປົກຄອງຢູ່ໂຮງໝໍເມືອງຂອງແຂວງຕ່າງໆ ແລະ ບັນດາສູນດັ່ງກ່າວສາມາດປິ່ນປົວຄົນປ່ວຍສະເລ່ຍປະມານ 2-3 ພັນຄົນຕໍ່ປີ ແລະ ມາຮອດປັດຈຸບັນມີບ້ານປອດຢາເສບຕິດໂດຍພື້ນຖານແລ້ວປະມານ 70% ຂອງຈຳນວນບ້ານທັງໝົດ ແລະ ມີໂຮງຮຽນປອດຢາເສບຕິດ 80% ຂອງຈຳນວນໂຮງຮຽນມັດທະຍົມທັງໝົດໃນທົ່ວປະເທດ.
+ແຂວງອັດຕະປືທຳລາຍຢາເສບຕິດຈຳນວນຫລາຍ
