ໜັງສືພິມຄວາມສະຫງົບສະຫລອງວັນສ້າງຕັ້ງຄົບຮອບ 20 ປີ
ພິທີສະເຫລີມສະລອງວັນສ້າງຕັ້ງໜັງສືພິມຄວາມສະຫງົບຄົບຮອບ 20 ປີ (12 ຕຸລາ 1997-12 ຕຸລາ 2017) ໄດ້ຈັດຂຶ້ນໃນວັນທີ 12 ຕຸລານີ້ທີ່ສຳນັກງານໜັງສືພິມດັ່ງກ່າວຢູ່ນະຄອນຫລວງວຽງຈັນ, ໂດຍການເຂົ້າຮ່ວມຂອງທ່ານ ພົນຈັດຕະວາ ອາລູ ວາລືຊື ຫົວໜ້າກົມໃຫຍ່ການເມືອງກະຊວງປ້ອງກັນຄວາມສະຫງົບ, ມີຄະນະບັນນາທິການ, ຕາງໜ້າຈາກອົງການສື່ຕ່າງໆ ແລະ ພະນັກງານເຂົ້າຮ່ວມຢ່າງພ້ອມພຽງ.
ທ່ານພັນໂທ ພອນສະຫວັນ ອຸດົມເພັດ ຮອງຫົວໜ້າຄະນະບັນນາທິການຂ່າວສານ ປກສ ໃຫ້ຮູ້ວ່າ: ໜັງສືພິມຄວາມສະຫງົບສ້າງຕັ້ງຂຶ້ນໃນວັນທີ 12 ຕຸລາ 1997 ເພື່ອຕອບສະໜອງຄວາມຮຽກຮ້ອງຕ້ອງການໜ້າທີ່ການເມືອງຂອງພັກ ແລະ ເປັນກະບອກສຽງໃຫ້ກຳລັງ ປກສ, ທັງເປັນຂົວຕໍ່ລະຫວ່າງກຳລັງ ປກສ ກັບປະຊາຊົນໃຫ້ຮັດແໜ້ນຫລາຍຂຶ້ນ, ພ້ອມນີ້, ຍັງເປັນເວທີເຜີຍແຜ່ແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ໂດຍສະເພາະຂົງເຂດວຽກງານ ປກສ, ຄວາມເປັນລະບຽບຮຽບຮ້ອຍຂອງສັງຄົມ ເພື່ອປະກອບສ່ວນສຶກສາອົບຮົມພະນັກງານລັດຖະກອນ, ກຳລັງປະກອບອາວຸດ ແລະ ປະຊາຊົນບັນດາເຜົ່າ ໃຫ້ເຫັນໄດ້ບົດບາດຄວາມສຳຄັນຂອງກຳລັງ ປກສ ກໍຄືພັນທະໜ້າທີ່ຄວາມຮັບຜິດຊອບຂອງຕົນຕໍ່ວຽກງານປ້ອງກັນຄວາມສະຫງົບ ແລະ ຕະຫລອດໄລຍະ 20 ປີຜ່ານມາ, ໜັງສືພິມຄວາມສະຫງົບໄດ້ເຮັດໜ້າທີ່ຕາມພາລະບົດບາດຂອງຕົນຢ່າງຕັ້ງໜ້າໃນວຽກງານໂຄສະນາ-ຖະແຫລງຂ່າວເພື່ອໃຫ້ທັນກັບສະພາບການຂະຫຍາຍຕົວຂອງສັງຄົມ, ໄປຄຽງຄູ່ກັບການປັບປຸງໜັງສືພິມໃຫ້ມີເນື້ອໃນຫລາກຫລາຍສີສັນເພື່ອໃຫ້ຈັບອົກຈັບໃຈຜູ້ອ່ານຜູ້ຊົມ, ສຸມໃສ່ລົງທືນສ້າງພື້ນຖານໂຄງລ່າງ, ປະກອບວັດຖຸເຕັກນິກທີ່ຈຳເປັນເພື່ອໃຫ້ການເຄື່ອນໄຫວວຽກງານມີບາດກ້າວໃໝ່ ແລະ ທັນສະໄໝ ແລະ ເອົາໃຈໃສ່ບຳລຸງກໍ່ສ້າງຖັນແຖວພະນັກງານສື່ມວນຊົນໃຫ້ກ້າວໄປເປັນມືອາຊີບຫລາຍຂຶ້ນ ແລະ ໃນຕໍ່ໜ້ານີ້, ຈະສືບຕໍ່ເພີ່ມທະວີການປັບປຸງໜັງສືພີມໃຫ້ດີກວ່າເກົ່າ ແລະ ເປັນທີ່ສົນໃຈຂອງສັງຄົມນັບມື້ຫລາຍຂຶ້ນ.
ໃນໂອກາດນີ້, ກໍໄດ້ມີພິທີມອບໃບຍ້ອງຍໍຂອງກະຊວງປ້ອງກັນຄວາມສະຫງົບ ແລະ ກົມໃຫຍ່ການເມືອງ ປກສ ໃຫ້ບຸກຄົນທີ່ມີຜົນງານດີເດັ່ນປະກອບສ່ວນເຂົ້າໃນການພັດທະນາໜັງສືພີມຄວາມສະຫງົບ, ໂດຍການໃຫ້ກຽດມອບຂອງທ່ານພົນຈັດຕະວາ ອາລູ ວາລີຊື, ພ້ອມທັງເປີດໂຕເວບໄຊໜັງສືພີມຄວາມສະຫງົບຢ່າງເປັນທາງການ.
