ລາວເຜີຍແຜ່ການຈັດຕັ້ງປະຕິບັດກົດໝາຍວ່າດ້ວຍອາກອນມູນຄ່າເພີ່ມສະບັບປັບປຸງ

ກອງປະຊຸມເຜີຍແຜ່ຄຳແນະນຳການຈັດຕັ້ງປະຕິບັດກົດໝາຍວ່າດ້ວຍອາກອນມູນຄ່າເພີ່ມສະບັບປັບປຸງໄດ້ມີຂື້ນໃນວັນທີ 31 ມີນານີ້ທີ່ນະຄອນຫລວງວຽງຈັນ,ໂດຍກະຊວງການເງິນ, ທະນາຄານໂລກ ແລະ ສະຫະພາບເອີຣົບປະຈຳລາວຮ່ວມກັນຈັດຂື້ນ, ໂດຍການເຂົ້າຮ່ວມຂອງທ່ານ ບຸນໂຈມ ອຸບົນປະເສີດ ຮອງລັດຖະມົນຕີກະຊວງການເງິນ, ທ່ານ ໄບຣອັນ ຟໍນາຣີ ຫົວໜ້າຝ່າຍການຮ່ວມມືສະຫະພາບເອີຣົບປະຈຳລາວ, ທ່ານນາງ ຊາລີ ເບີນິງແຮມ ຫົວໜ້າຫ້ອງການທະນາຄານໂລກປະຈຳລາວ, ມີຜູູ້ຕາງໜ້າຈາກອົງການຈັດຕັ້ງສາກົນ ແລະ ຄູ່ຮ່ວມພັດທະນາ, ພ້ອມດ້ວຍພາກສ່ວນກ່ຽວຂ້ອງທັງພາກລັດ ແລະ ເອກະຊົນເຂົ້າຮ່ວມເປັນຈຳນວນຫລາຍ.

ທ່ານຮອງລັດຖະມົນຕີກະຊວງການເງິນ ກ່າວວ່າ: ກົດໝາຍວ່າດ້ວຍອາກອນມູນຄ່າເພີ່ມໄດ້ຮັບການປັບປຸງຄັ້ງທີ 2 ໃນສະໄໝສະພາແຫ່ງຊາດຊຸດທີ່ຜ່ານມາ ແລະ ໄດ້ຖືກຮັບຮອງປະກາດໃຊ້ໂດຍປະທານປະເທດແຫ່ງ ສປປ ລາວ ໃນປີ 2015, ກົດໝາຍດັ່ງກ່າວໄດ້ມີຫລາຍມາດຕາຖືກປັບປຸງເນື້ອໃນ ແລະ ມີຫລາຍມາດຕາຖືກສະເໜີເຂົ້າໃໝ່ ແລະ ໄດ້ມີການສະເໜີໃຫ້ມີນິຕິກຳລຸ່ມກົດໝາຍ ເພື່ອອະທິບາຍ-ຊີ້ແຈ້ງ ແລະ ແນະນຳເພີ່ມເຕີມກ່ຽວກັບກົດໝາຍດັ່ງກ່າວ ແລະ ຜ່ານການບັງຄັບໃຊ້ກົດໝາຍນີ້ໃນ 2 ປີຜ່ານມາເຫັນໄດ້ຫລາຍຂໍ້ສະດວກ, ຂໍ້ຫຍຸ້ງຍາກ ແລະ ສິ່ງທ້າທາຍທີ່ຈະຕ້ອງໄດ້ອະທິບາຍ ແລະ ຊີີ້ແຈງໃຫ້ຊັດເຈນ, ຊຶ່ງໄດ້ຜັນຂະຫຍາຍຢູ່ໃນບົດແນະນຳຂອງກົດໝາຍວ່າດ້ວຍອາກອນມູນຄ່າເພີ່ມສະບັບປັບປຸງ, ຊຶ່ງມັນມີຄວາມຈຳເປັນທີ່ຈະຕ້ອງໄດ້ອະທິບາຍຢ່າງຄົບຖ້ວມ ແລະ ຖອດຖອນບົດຮຽນຈາກສາກົນ ແລະ ພາກພື້ນເພື່ອໃຫ້ສອດຄ່ອງກັບເງື່ອນໄຂຂອງປະເທດເຮົາ.

ທ່ານປະທານ ກ່າວວ່າ: ການປະຕິບັດກົດໝາຍວ່າດ້ວຍອາກອນມູນຄ່າເພີ່ມໃນເມື່ອກ່ອນແມ່ນມີຄວາມຫຍຸ້ງຍາກຫລາຍ, ເນື່ອງຈາກພວກເຮົາຍັງບໍ່ທັງມີນິຕິກຳລຸ່ມກົດໝາຍອັນລະອຽດ ແລະ ມາຮອດປັດຈຸບັນກະຊວງການເງິນໄດ້ພັດທະນາປັບປຸງກົດໝາຍ ແລະ ນິຕິກຳລຸ່ມກົດໝາຍໃຫ້ດີຂື້ນ, ແຕ່ກໍຍັງບໍ່ໄດ້ປະກາດໃຊ້ຢ່າງເປັນທາງການ, ເນື່ອງຈາກມີບາງເນື້ອໃນຍັງບໍ່ທັນສົມບູນ, ດັ່ງນັ້ນກອງປະຊຸມຄັ້ງນີ້ພວກເຮົາຈຶ່ງໄດ້ຮ່ວມກັບທະນາຄານໂລກ ແລະ ສະຫະພາບເອີຣົບ,ຕະຫລອດຮອດຄູ່ຮ່ວມພັດທະນາເພື່ອຮ່ວມກັນປຶກສາຫາລືເຖິງລາຍລະອຽດຕ່າງໆກ່ຽວກັບການແນະນຳການຈັດຕັ້ງປະຕິບັດກົດໝາຍວ່າດ້ວຍອາກອນມູນຄ່າເພີ່ມສະບັບປັບປຸງເພື່ອໃຫ້ສອດຄ່ອງກັບຄວາມເປັນຈິງ ແລະ ມີປະສິດທິຜົນສູງສຸດ.