ເປີດໂຕບໍລິສັດຈໍາປາຈີແອລເອັມລາວ

ພິທີເປີດໂຕບໍລິສັດ ຈໍາປາ ຈີແອລເອັມລາວ (CHAMPA GLM LAO), ໄດ້ມີຂຶ້ນໃນວັນທີ 31 ມີນາຜ່ານມາທີ່ນະຄອນຫລວງວຽງຈັນ, ໂດຍມີຜູ້ຕາງໜ້າຈາກພາກລັດ, ພ້ອມດ້ວຍຄະນະບໍລິຫານງານ ແລະ ພະນັກງານເຂົ້າຮ່ວມເປັນຈໍານວນຫລາຍ.

ທ່ານ ຈາຄູບ ຊາການ (Jakub Sagan) ຜູ້ອໍານວຍການບໍລິສັດອີຊີໄອ (ECI) ໃຫ້ຮູ້ວ່າ: ກຸ່ມບໍລິສັດຂອງຕົນສ້າງຕັ້ງຂຶ້ນໃນຊຸມປີ 1970 ທີ່ປະເທດຝລັ່ງເພື່ອດໍາເນີນທຸລະກິດກ່ຽວກັບອະສັງຫາລິມາຊັບ, ການກໍ່ສ້າງ, ດ້ານການລົງທຶນ, ພະລັງງານ-ບໍ່ແຮ່ ແລະ ອື່ນໆ ແລະ ໄດ້ມີການຂະຫຍາຍທຸລະກິດອອກໄປຫລາຍໆປະເທດໃນເຂດເອີຣົບ ແລະ ພາຍຫລັງພວກເຮົາໄດ້ມີໂອກາດມາທ່ຽວປະເທດລາວຄັ້ງທໍາອິດໃນປີ 2016 ຜ່ານມາ, ຊຶ່ງໄດ້ເຮັດໃຫ້ພວກເຮົາພົບພໍ້ກັບສິ່ງທີ່ປະທັບໃຈ ແລະ ມີຄຸນຄ່າຫລາຍຢ່າງຢູ່ລາວ ເຊັ່ນ: ປະເທດລາວມີຄວາມສວຍງາມອຸດົມສົມບູນໄປດ້ວຍຊັບພະຍາກອນທໍາມະຊາດ, ປະຊາຊົນມີຄວາມອ່ອນໂຍນໂອບເອື້ອອາລີ ແລະ ມີວັດທະນາທໍາຮີດຄອງປະເພນີອັນດີງາມ, ເຊິ່ງເປັນສິ່ງສໍາຄັນດຶງດູດໃຫ້ພວກເຮົາໄດ້ຕັດສີນໃຈມາລົງທຶນສ້າງຕັ້ງບໍລິສັດຂອງຕົນຢູ່ລາວ, ໂດຍໄດ້ຮັບໃບອະນຸຍາດດໍາເນີນທຸລະກິດຖືກຕ້ອງຕາມລະບຽບກົດໝາຍຂອງ ສປປ ລາວ ເພື່ອດໍາເນີນທຸລະກິດສໍາຫລວດແຮ່ທອງແດງ ແລະ ແຮ່ຕິດພັນອື່ນໆ ແລະ ກ້າວໄປສູ່ການສ້າງຕັ້ງໂຮງງານປຸງແຕ່ງແຮ່ຢູ່ລາວໃນອານາຄົດ.