ອິດສະລາແອນໂຈມຕີທາງອາກາດຢູ່ອາເລັບໂປ ທະຫານຊິຣີເສຍຊີວິດ 36 ຄົນ
ທະຫານຊິຣີເສຍຊີວິດຢ່າງໜ້ອຍ 36 ຄົນ ຈາກການທີ່ອິດສະລາແອນຂ້າມຊາຍແດນເຂົ້າມາໂຈມຕີທາງອາກາດໃນພື້ນທີ່ທາງຕາເວັນຕົກຂອງປະເທດ.
ວັນທີ 29 ມີນາ, ສໍານັກຂ່າວຕ່າງປະເທດລາຍງານວ່າ: ອົງການສັງເກດການດ້ານສິດທິມະນຸດຊີຣີ (SOHR) ອອກຖະແຫລງການວ່າ: ເຮືອບິນຮົບຂອງກອງທັບອິດສະລາແອນປະຕິບັດການໂຈມຕີທາງອາກາດຕໍ່ເປົ້າໝາຍຫລາຍແຫ່ງຢູ່ແຂວງອາເລັບໂປ ທີ່ຢູ່ທາງຕາເວັນຕົກຂອງຊິຣີ ໃນຕອນເຊົ້າວັນທີ 29 ມີນາ ຕາມເວລາທ້ອງຖິ່ນ ຂ້າຊີວິດທະຫານຢ່າງໜ້ອຍ 36 ຄົນ ແລະ ມີຜູ້ໄດ້ຮັບບາດເຈັບອີກຫລາຍສິບຄົນ.
ທັງນີ້, ການໂຈມຕີຂອງກອງທັບອິດສະລາແອນເນັ້ນໃສ່ພື້ນທີ່ຕາເວັນອອກສຽງໃຕ້ຂອງແຂວງອາເລັບໂປ ເຊິ່ງເປັນສະຖານທີ່ຕັ້ງຂອງພື້ນທີ່ຕ້ອງສົງໄສເປັນສາງອາວຸດຂອງກຸ່ມເຮັດໂບລາ.
ຫລັງເກີດເຫດຍັງບໍ່ມີຝ່າຍໃດອອກມາໃຫ້ຄວາມເຫັນຢ່າງເປັນທາງການ ບໍ່ວ່າຈະເປັນອິດສະລາແອນ, ຊິຣີ ຫລື ກຸ່ມເຮັດໂບລາ. ເຖິງຢ່າງໃດກໍຕາມ, ອິດສະລາແອນບໍ່ເຄີຍຍອມຮັບ ຫລື ປະຕິເສດ ການໃຊ້ປະຕິບັດການໂຈມຕີທາງທະຫານຢູ່ຊິຣີ ເຊິ່ງເກີດຂຶ້ນເປັນໄລຍະ ນັບແຕ່ສົງຄາມກາງເມືອງຢູ່ຊິຣີເລີ່ມຂຶ້ນ ໃນເດືອນມີນາ 2011 ແລະ ມີຄວາມຖີ່ເພີ່ມຂຶ້ນ ນັບແຕ່ເກີດສົງຄາມຢູ່ເຂດກາຊາໃນວັນທີ 7 ຕຸລາ 2023.
