ນະຄອນຫຼວງວຽງຈັນຈະຈັດແຂ່ງຊ່ວງເຮືອທີ່ບຶງທາດຫຼວງ ໃນວັນທີ 18-22 ຕຸລານີ້

ທ່ານ ຖະໜອມ ທໍາທອງ ເຈົ້າເມືອງ ໄຊເສດຖາ ທັງເປັນຄະນະກໍາມະການຈັດງານບຸນຊ່ວງເຮືອນະຄອນຫຼວງ ປະຈໍາປີ 2017, ໄດ້ຖະແຫຼງ ວັນທີ 11 ຕຸລານີ້ວ່າ: ບຸນຊ່ວງເຮືອ ດັ່ງກ່າວຈະຈັດຂຶ້ນ ທີ່ບຶງທາດຫຼວງ ເມືອງໄຊເສດຖາ ແຕ່ວັນທີ 18-22 ຕຸລານີ້. ເພື່ອເປັນການອະນຸລັກ, ຮັກສາຮີດຄອງປະເພດນີອັນດີງາມຂອງຊາດ, ທັງເປັນການໂຄສະນາ, ສົ່ງເສີມການວາງສະແດງ ແລະ ຂະຫຍາຍສິນຄ້າຜະລິດຕະພັນຂອງລາວ, ສ້າງຄວາມມ່ວນຊື່ນໃຫ້ແກ່ຊາວນະຄອນຫຼວງວຽງຈັນ ກໍຄືຊາວລາວທົ່ວປະເທດ ແລະ ໃຫ້ຄົນຕ່າງປະເທດເຫັນເຖິງວັດທະນະທໍາອັນດີງາມຂອງລາວເຮົາ ນອກນີ້ ຍັງເປັນການກະກຽມໃຫ້ແກ່ການເປີດປີທ່ອງທ່ຽວຂອງ ສປປ ລາວ 2018 ນີ້ ມີບັນຍາກາດຟົດຟື້ນ.
ທ່ານເຈົ້າເມືອງໄຊເສດຖາກ່າວວ່າ ພາຍໃນງານຈະມີການວາງສະແດງ ແລະ ຂາຍສິນຄ້າ, ການສະແດງສິລະປະດົນຕີ, ການແຂ່ງຂັນມວຍ ແລະ ກິດຈະກໍາມ່ວນຊື່ນຕ່າງໆ ແລະ ໃນວັນທີ 21 ຕຸລາ ຈະມີການແຂ່ງຂັນເຈດສະກີ້ ແລະ ຊ່ວງເຮືອເພື່ອຊີງເຂົ້າຮອບ ແລະ ວັນທີ 22 ຕຸລາ ແມ່ນແຂ່ງຂັນຮອບຊີງຊະນະເລີດ ຂອງເຮືອແຕ່ລະປະເພດຄື: ເຮືອປະເພນີ 55 ສີພາຍຂຶ້ນໄປ ທັງເພດຍິງ ແລະ ຊາຍ, ເຮືອສູດ 55 ສີພາຍຂຶ້ນໄປ (ຊາຍ), ເຮືອກິລາ 12 ສີພາຍ (ຊາຍ) ແລະ ເຮືອເຈດສະກີ້ຊາຍ. ສ່ວນລາງວັນມີຄື: ເຮືອປະເພນີຍິງ-ຊາຍ ແລະ ປະເພດເຮືອສູດ ອັນດັບ 1 ໄດ້ຮັບຂັນເງິນ 1 ກິໂລ ພ້ອມເງິນສົດ 25 ລ້ານກີບ, ອັນດັບ 2 ໄດ້ຮັບຂັນເງິນ0,75 ກິໂລ ພ້ອມເງິນສົດ 15 ລ້ານກີບ, ອັບດັບ 3 ໄດ້ຮັບຂັນເງິນ 0,5 ກິໂລ ພ້ອມເງິນສົດ 10 ລ້ານກີບ ແລະ ອັນດັບ 4 ໄດ້ຮັບເງິນສົດ 8 ລ້ານກີບ, ປະເພດເຮືອກິລາ 12 ສີພາຍ ອັນດັບ 1 ຂັນໂລ້ 1 ໜ່ວຍ ແລະ ພ້ອມເງິນສົດ 8 ລ້ານກີບ, ອັນດັບ 2 ຂັນໂລ້ 1 ໜ່ວຍ ເງິນສົດ 6 ລ້ານກີບ, ອັນດັບ 3 ຂັນໂລ້ 1 ໜ່ວຍ ພ້ອມເງິນສົດ 4 ລ້ານກີບ ແລະ ອັນດັບ 4 ເງິນສົດ 3 ລ້ານກີບ, ສ່ວນລາງວັນຊົມເຊີຍນ ເຮືອປະເພນີ ຈະໄດ້ຮັບເງິນ 3 ລ້ານກີບ.