ປີຜ່ານມານະຄອນຫລວງປະຕິບັດຄຳຕັດສິນຂອງສານໄດ້ພຽງ 131 ເລື່ອງ
ທ່ານ ບຸນເພັງ ສີນະວົງພອນ ຫົວໜ້າພະແນກຍຸຕິທຳນະຄອນຫລວງວຽງຈັນໃຫ້ຮູ້ໃນກອງປະຊຸມສະຫລຸບວຽກງານໜຶ່ງປີຜ່ານມາວ່າ: ວຽກງານການຈັດ ຕັ້ງປະຕິບັດຄຳຕັດສິນຂອງສານເປັນວຽກໜຶ່ງທີ່ມີຄວາມຫຍຸ້ງຍາກ, ແຕ່ຄະນະພັກ, ຄະນະນໍາຂອງພະແນກໄດ້ເອົາໃຈໃສ່ຊຸກຍູ້ຊີ້ນໍາ-ນຳພາພະນັກງານ ແລະ ໜ່ວຍງານປະຕິບັດຄຳຕັດສິນຂັ້ນເມືອງ, ໃຫ້ເປັນເຈົ້າການໃນການຈັດຕັ້ງປະຕິບັດຄຳຕັດສິນຂອງສານທີ່ໃຊ້ໄດ້ຢ່າງເດັດຂາດ, ໂດຍໜຶ່ງປີຜ່ານມານະຄອນຫລວງວຽງຈັນມີຄຳຕັດສິນຂອງສານທັງໝົດ 7.901 ເລື່ອງ,ໃນນັ້ນຄະດີແພ່ງມີ 2.490 ເລື່ອງ, ຄະດີອາຍາມີ 5.411 ເລື່ອງ ແລະ ປະຕິບັດສຳເລັດ 131 ເລື່ອງ, ໃນນີ້ຄະດີແພ່ງ 51 ເລື່ອງ, ຄະດີອາຍາ 80 ເລື່ອງ, ຍັງຄ້າງ 7.366 ເລື່ອງ, ເຊິ່ງຈະສືບຕໍ່ເອົາໃຈໃສ່ປະຕິບັດໃຫ້ສໍາເລັດໂດຍໄວ, ທັງສຶບຕໍ່ປັບ
ປຸງລະບົບການຈັດຕັ້ງ ແລະ ແບບແຜນວິທີເຮັດວຽກໃຫ້ມີຄວາມຄ່ອງຕົວສາມາດປະຕິບັດພາລະບົດບາດຂອງຕົນເອງໄດ້ຢ່າງເຕັມສ່ວນ ແລະ ວ່ອງໄວ, ຮັບປະກັນຄວາມເປັນທຳໃນການປະຕິບັດຄຳຕັດສິນຂອງສານ, ເອົາໃຈໃສ່ປະສານສົມທົບກັບອຳນາດການປົກຄອງເມືອງ, ບ້ານ ແລະ ໜ່ວຍໄກ່ເກ່ຍຂໍ້ຂັດແຍ່ງຂັ້ນບ້ານໃນການຮັບສົ່ງໝາຍຮຽກ, ໝາຍເຊີນໃຫ້ຮັບປະກັນຮອດມືຜູ້ຮຽກ, ຜູ້ຖືກເຊີນ ແລະ ອື່ນໆ.
