ປະທານປະເທດ ສົ່ງສານເສົ້າສະຫລົດໃຈ ຕໍ່ເຫດການຍິງໂຈມຕີ ໂຮງສະແດງຄອນເສີດ ທີ່ ເມືອງ ກຣາສະໂນໂກສກ໌, ເຂດຊານເມືອງມົດສະກູ
ວັນທີ 23 ມີນາ 2024, ທ່ານ ທອງລຸນ ສີສຸລິດ ປະທານປະເທດ ສປປ ລາວ ໄດ້ສົ່ງສານສະແດງຄວາມເສົ້າສະຫລົດໃຈ ເຖິງ ທ່ານ ວະລາດີເມຍ ປູຕິນ ປະທານາທິບໍດີ ແຫ່ງ ສະຫະພັນ ຣັດເຊຍ, ຕໍ່ເຫດການຍິງໂຈມຕີ ໂຮງສະແດງຄອນເສີດ ທີ່ ເມືອງ ກຣາສະໂນໂກສກ໌, ເຂດຊານເມືອງມົດສະກູ.
ເນື້ອໃນສານລະບຸວ່າ: ຂ້າພະເຈົ້າ ໄດ້ຮັບຊາບຂ່າວ ຕໍ່ເຫດການຍິງໂຈມຕີ ໂຮງສະແດງຄອນເສີດ ທີ່ ເມືອງ ກຣາສະໂນໂກສກ໌, ເຂດຊານເມືອງມົດສະກູ ໃນວັນທີ 22 ມີນາ 2024, ອັນໄດ້ເຮັດໃຫ້ປະຊາຊົນຜູ້ບໍລິສຸດເສຍຊິວິດ ແລະ ໄດ້ຮັບບາດເຈັບ ເປັນຈໍານວນຫລາຍ.
ສປປ ລາວ ປະນາມການກະທຳທີ່ເປັນການກໍ່ຮ້າຍທຸກຮູບແບບຢ່າງແຂງແຮງ ແລະ ຢືນຢັນຮ່ວມມືກັບວົງຄະນະສາກົນ ເພື່ອຕໍ່ຕ້ານລັດທິການກໍ່ການຮ້າຍສາກົນ ເພື່ອປົກປັກຮັກຮັກສາສັນຕິພາບ ແລະ ສະຖຽນລະພາບ ໃນພາກພື້ນ ແລະ ສາກົນ.
ໃນນາມປະຊາຊົນລາວ ແລະ ລັດຖະບານ ແຫ່ງ ສປປ ລາວ, ຂ້າພະເຈົ້າ ສະແດງຄວາມເສົ້າສະຫຼົດໃຈ ແລະ ເຫັນອົກເຫັນໃຈຢ່າງສຸດຊຶ້ງ ມາຍັງ ປະຊາຊົນ ແລະ ລັດຖະບານ ແຫ່ງ ສະຫະພັນ ຣັດເຊຍ ໂດຍສະເພາະ ຕໍ່ຄອບຄົວຜູ້ທີ່ໄດ້ຮັບເຄາະຮ້າຍຈາກເຫດການໃນຄັ້ງນີ້.
ຂ້າພະເຈົ້າ ເຊື່ອໝັ້ນວ່າ ພາຍໃຕ້ການນຳພາຂອງ ພະນະທ່ານ, ລັດຖະບານ ກໍຄື ປະຊາຊົນ ແຫ່ງ ສະຫະພັນ ຣັດເຊຍ ຈະສາມາດຜ່ານຜ່າຄວາມໂສກເສົ້າ ແລະ ຄວາມຫຍຸ້ງຍາກຕ່າງໆ ເພື່ອເຮັດໃຫ້ສະພາບການກັບຄືນສູ່ຄວາມເປັນປົກກະຕິໂດຍໄວ.
