ໃຊ້ງົບປະມານ 1,7 ຕື້ກວ່າກີບ ສ້ອມແປງເສັ້ນທາງດິນແດງ ບ້ານນາລັງ- ນາທູນ- ພູພຽງ ຫາ ນໍ້າປຸ່ງ ເມືອງເຟືອງ ໄລຍະເວລາ 60 ວັນ

  ພິທີເຊັນສັນຍາຮັບເໝົາສ້ອມແປງເສັ້ນທາງດິນແດງ ແຕ່ແຍກທາງ ບ້ານນາລັງ-ບ້ານນາທູນ-ບ້ານພູພຽງ ຫາ ບ້ານນໍ້າປຸ່ງ ເມືອງເຟືອງ ແຂວງວຽງຈັນ ຄວາມຍາວ 14,50 ກິໂລແມັດ ເຊິ່ງໃຊ້ງົບປະມານທັງໝົດ 1,7 ຕື້ກວ່າກີບ, ການສ້ອມແປງທາງດັ່ງກ່າວ, ຈະເລີ່ມລົງມືຈັດຕັ້ງປະຕິບັດນັບແຕ່ວັນທີ 22 ມີນາ 2024 ເປັນຕົ້ນໄປ ຈົນຮອດວັນທີ 22 ພຶດສະພາ 2024 ເຊິ່ງຈະໃຊ້ເວລາທັງໝົດ 60 ວັນ. ສຳລັບງົບປະມານທັງໝົດໃນການສ້ອມແປງແມ່ນນຳໃຊ້ງົບປະມານກອງທຶນທາງ ຮ່ວງບູລະນະຮັກສາ ແລະ ສ້ອມແປງທາງຫລວງທ້ອງຖິ່ນ ປະຈຳປີ 2023.

  ການເຊັນສັນຍາຮັບເໝົາສ້ອມແປງເສັ້ນທາງດິນແດງ ດັ່ງກ່າວ ຈັດຂຶ້ນວັນທີ 15 ມີນາ 2024 ທີ່ຫ້ອງການປົກຄອງເມືອງເຟືອງ, ລະຫວ່າງ ທ່ານ ພວງເພັດ ສາຍທອງ ຮອງຫົວໜ້າຫ້ອງການໂຍທາທິການ ແລະ ຂົນສົ່ງເມືອງ ແລະ ທ່ານ ບົວວັນ ຈັນທະວີໄຊ ຮອງອໍານວຍການ ບໍລິສັດ ໄຊສັນຍາ ກໍ່ສ້າງຂົວ-ທາງ ຈຳກັດຜູ້ດຽວ.