ຊາຍຊາວເມືອງເກົາສົງຂອງໄຕ້ຫວັນ ໜ່ວຍໝາກພ້າວຕິດຢູ່ຮູທະວານ

     ໂຮງໝໍແຫ່ງໜຶ່ງໃນເມືອງເກົາສົງ ຮັບຄົນເຈັບຜູ້ຊາຍອາຍຸ 56 ປີ ເຂົ້າຫ້ອງສຸກເສີນອາການປັດສະວະລໍາບາກ, ເຈັບທ້ອງຮຸນແຮງມາ 2 ວັນແລ້ວ, ຜົນກວດ CT scan ພົບວ່າ ກະເພາະປັດສະວະໄຂ່ຄືໜ່ວຍໝາກບານ ສິ່ງທີ່ອັດຕັນຢູ່ໃນນັ້ນຄືໜ່ວຍໝາກພ້າວ ຂະໜາດຍາວ 7,5ຊມ, ກວ້າງ 5,7ຊມ ປິດກັ້ນທໍ່ປັດສະວະ ແພດໝໍພະຍາຍາມໃຊ້ມືເອົາອອກ ບໍ່ສາມາດເອົາອອກມາໄດ້ ກະເພາະປັດສະວະຂະຫຍາຍຕົວເກືອບ 2.000cc ຄືໜ່ວຍໝາກບານເກືອບແຕກໂພງອອກ.

     ແພດວາງແຜນເອົາອອກ ຖ້າຊັກຊ້າກະເພາະປັດສະວະອາດແຕກ ສ່ຽງຕໍ່ຊີວິດ, ແພດໃຊ້ເຄື່ອງມືທຸກວິທີ ໂດຍການສວນ ແລະ ເຄື່ອງມືສອດເຂົ້າໄປ ບໍ່ສາມາດເອົາອອກໄດ້.

     ເພື່ອເອົາໜ່ວຍໝາກພ້າວອອກມາ ແພດຈຶ່ງຕັດສິນໃຈຜ່າຕັດ (ຄືຜ່າຕັດເກີດລູກ) ແພດປະເມີນວ່າຖ້າເກີດຄວາມຊັກຊ້າໃນການດໍາເນີນງານ ບໍ່ພຽງແຕ່ກະເພາະປັດສະວະຂອງຄົນເຈັບຈະແຕກ, ແຕ່ທະວານໜັກຂອງລາວອາດກາຍເປັນຊີ້ນຕາຍ ເນື່ອງຈາກການກົດທັບເປັນເວລາດົນ ແພດຈຶ່ງຕັດສິນໃຈຜ່າຕັດທັນທີ. ໃນການຜ່າຕັດ ແພດໃຊ້ສາຍສວນປັດສະວະໃຫ້ຄົນເຈັບ ແພດນໍາເອົາໜ່ວຍໝາກພ້າວອອກມາສໍາເລັດ, ຄົນເຈັບພັກຟື້ນ ແລະ ອອກຈາກໂຮງໝໍ. ແຕ່ຍັງບໍ່ໄດ້ບອກເຫດຜົນໃນການຍັດໜ່ວຍໝາກພ້າວເຂົ້າໄປ (ປະຕິເສດຈະໃຫ້ຂໍ້ມູນ).

     ເຫດການດັ່ງກ່າວໄດ້ຮັບການຕີພິມໃນວາລະສານການແພດຂອງອັງກິດ British Medical Journal ເນື່ອງຈາກເປັນກໍລະນີທີ່ເກີດຂຶ້ນຍາກ.

     ຊາວໄຕ້ຫວັນຕ່າງກໍປະຫລາດໃຈຕໍ່ກໍລະນີນີ້ ໂດຍກ່າວວ່າ: ມັນໂດ່ງດັງໄປທົ່ວໂລກແທ້ໆ ແລະ ບາງຄົນສະແດງຄວາມເຫັນວ່າ: ໃຫ້ໂລກໄດ້ເຫັນໄດ້ຮູ້ຈັກໄຕ້ຫວັນ. ບາງຄົນບອກວ່າມັນໜ້າອາຍທີ່ຕ້ອງຕີພິມໃນວາລະສານຕ່າງປະເທດ.