ຕວກກີເລັ່ງອາເມລິກາຍົກເລີກ ຄຳສັ່ງຢຸດໃຫ້ບໍລິການວີຊາ
ທ່ານ ອັບດຸນຮາມິດ ກຸລ ລັດຖະມົນຕີຍຸຕິທຳຕວກກີ ກ່າວໃນວັນທີ 9 ຕຸລານີ້ວ່າ: ອາເມລິກາຈະທົບທວນການຕັດສິນໃຈຍົກເລີກຄຳສັ່ງຢຸດການໃຫ້ບໍລິການວີຊາທັງໝົດກັບພົນລະເມືອງຕວກກີ, ພາຍຫລັງຕວກກີຈັບກຸມແຮງງານຊາວຕວກກີໃນສະຖານກົງສຸນອາເມລິກາ ຢູ່ນະຄອນອິສຕັນບູນ ໃນອາທິດຜ່ານມາ ໂດຍລະບຸວ່າພົວພັນກຸ່ມກໍ່ລັດຖະປະຫານຢູ່ຕວກກີໃນປີກ່ອນ.
ເຖິງຢ່າງໃດກໍຕາມ, ທ່ານກ່າວວ່າ: ການຕັດສິນໃຈດຳເນີນຄະດີກັບແຮງງານຊາວຕວກກີທີ່ເຮັດວຽກໃນສະຖານກົງສຸນອາເມລິກາຈະເປັນໄປຕາມຂະບວນການຍຸຕິທຳຕວກກີ. ລັດຖະມົນຕີຍຸຕິທຳຕວກກີກ່າວກັບສະຖານີໂທລະພາບເອຮາເບີວ່າ: ການດຳເນີນຂະບວນການທາງກົດໝາຍໃນຄະດີອາຍາກັບພົນລະເມືອງຊາວຕວກກີທີ່ມີການກະທຳຄວາມຜິດໃນຕວກກີ ຖືເປັນຄວາມຖືກຕ້ອງຕາມກົດໝາຍຕວກກີ ແລະ ຕວກກີຫວັງວ່າອາເມລິກາຈະທົບທວນການຕັດສິນໃຈໃນຄັ້ງນີ້.
ນອກຈາກນີ້, ຜູ້ນຳຕວກກີສະແດງຄວາມຄິດເຫັນເປັນເທື່ອທຳອິດຕໍ່ເລື່ອງດັ່ງກ່າວໃນການຖະແຫລງຂ່າວຮ່ວມກັບປະທານາທິບໍດີ ເປໂຕຣ ໂປໂຣເຊນໂກ ຂອງອູແກຣນ ຢູ່ນະຄອນຫລວງກຽບວ່າ: ການຕັດສິນໃຈຢຸດໃຫ້ບໍລິການວີຊາແກ່ພົນລະເມືອງຕວກກີຂອງສະຖານທູດອາເມລິກາຢູ່ນະຄອນຫລວງອັງກາຣາຄັ້ງນີ້ເປັນເຫດການທີ່ເສຍໃຈຢ່າງຍິ່ງ, ຄວາມຂັດແຍ່ງຄັ້ງນີ້ ເຊິ່ງນັກວິເຄາະເບິ່ງວ່າເປັນຂໍ້ພິພາດຄັ້ງຮຸນແຮງທີ່ສຸດລະຫວ່າງສະມາຊິກອົງການນາໂຕໃນຮອບເຄິ່ງສະຕະວັດ. ປະທານາທິບໍດີ ແອຣໂດອານ ກ່າວຊີ້ແຈງວ່າ: ຕາມຫລັກປະຕິບັດທາງການທູດທີ່ເທົ່າທຽມກັນ, ສະຖານທູດຕວກກີໃນອາເມລິກາຈະດຳເນີນການໃນແບບດຽວກັບອາເມລິກາ.
