ເມືອງໂຢໂກຮາມາເລັ່ງອອກຂໍ້ຫ້າມ ຫ້າມສູບຢາໃນສວນສາທາລະນະ

     ເທດສະບານເມືອງໂຢໂກຮາມາຂອງຍີ່ປຸ່ນ ມີແຜນບັງຄັບໃຊ້ມາດຕະການ ຫ້າມສູບຢາໃນສວນສາທາລະນະ.

     ວັນທີ 19 ມີນາ, ສໍານັກຂ່າວຕ່າງປະເທດລາຍງານວ່າ: ສະພາເທດສະບານເມືອງໂຢໂກຮາມາກໍາລັງພິຈາລະນາອົງປະກອບຫລາຍດ້ານ ເພື່ອນໍາໄປສູ່ການເພີ່ມເນື້ອໃນໃນຂໍ້ຫ້າມໃຫ້ມີການຫ້າມສູບຢາໃນສວນສາທາລະນະ ແລະ ສະຖານທີ່ທ່ອງທ່ຽວຍອດນິຍົມຂອງປະຊາຊົນ ລວມທັງສວນສາທາລະນະຢາມາຊິຕະ ແລະ ສວນສາທາລະນະຮາເບີວິວ.

     ທັງນີ້, ກອງປະຊຸມເຫັນພ້ອມໃຫ້ມີການສໍາຫລວດຄວາມຄິດເຫັນຂອງປະຊາຊົນເປັນເວລາ 1 ເດືອນໃນເດືອນເມສານີ້ ເມື່ອການວິເຄາະ ແລະ ປະເມີນຂໍ້ມູນທັງໝົດສໍາເລັດ ຈະມີການຍື່ນແກ້ໄຂເນື້ອໃນໃນທຸກມາດຕາທີ່ກ່ຽວຂ້ອງຂອງຂໍ້ຫ້າມໃນເດືອນກັນຍາຈະເຖິງນີ້. ເບື້ອງຕົ້ນມີການກໍານົດເປົ້າໝາຍໃຫ້ມີການປະກາດບັງຄັບໃຊ້ຢ່າງເປັນທາງການໃນເດືອນເມສາ 2025 ໂດຍຖ້າພົບການຝ່າຝືນ ບຸກຄົນນັ້ນຕ້ອງຖືກປັບໄໝ 50.000 ເຢນ.

    ເທດສະບານເມືອງໂຢໂກຮາມາທົດລອງການໃຊ້ຄໍາສັ່ງຊົ່ວຄາວ ຫ້າມສູບຢາໃນສວນສາທາລະນະ 5 ແຫ່ງ ລະຫວ່າງເດືອນຕຸລາ-ພະຈິກປີຜ່ານມາ ປາກົດວ່າໄດ້ຮັບການຮ່ວມມືໃນລະດັບດີຈາກປະຊາຊົນ.