ຫວຽດນາມມອບລົດຊ່ວຍເຫລືອຮັບໃຊ້ປ້ອງກັນກອງປະຊຸມສຸດຍອດອາຊຽນ 50 ຄັນ

ວັນທີ 18 ມີນາ 2024 ຢູ່ທີ່ກະຊວງປ້ອງກັນຄວາມສະຫງົບລາວ ໄດ້ມີພິທີມອບ-ຮັບພາຫະນະ ລະຫວ່າງກະຊວງ ປ້ອງກັນຄວາມສະຫງົບ ສສ ຫວຽດນາມ ໃຫ້ ກະຊວງປ້ອງກັນຄວາມສະຫງົບ ລາວ ເພື່ອນໍາໃຊ້ເຂົ້າໃນການປະຕິບັດວຽກງານວິຊາສະເພາະ ຮັບໃຊ້ວຽກງານປ້ອງກັນກອງປະຊຸມສຸດຍອດອາຊຽນ ທີ່ ສປປ ລາວ ໄດ້ຮັບກຽດເປັນເຈົ້າພາບ ໃນປີ 2024. ເຊິ່ງມີລົດໄຟຟ້າ ທີ່ຜະລິດຢູ່ ສສ ຫວຽດນາມ ຍີ່ຫໍ້ Vinfast, ປະເພດລົດ SUV, ລຸ້ນ VF8 20 ຄັນ, ລົດມ້າຂາວ ຍີ່ຫໍ້: HONDA CB 500X 30 ຄັນ. ຮັບໂດຍ ພົນເອກ ວິໄລ ຫຼ້າຄຳຟອງ ກຳມະການກົມການເມືອງສູນກາງພັກ ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນຄວາມສະຫງົບ ແຫ່ງ ສປປ ລາວ ພ້ອມຄະນະ ມອບໂດຍ ທ່ານ ພົນໂທ ເລືອງ ຕາມ ກວາງ ກຳມະການສູນກາງພັກຄອມມຸຍນິດຫວຽດນາມ ຮອງລັດຖະມົນຕີ ກະຊວງປ້ອງກັນຄວາມສະຫງົບ ແຫ່ງ ສສ ຫວຽດນາມ ພ້ອມດ້ວຍຄະນາ.

ພົນເອກ ວິໄລ ຫຼ້າຄໍາຟອງ ກ່າວວ່າ: ການມອບເຄື່ອງໃນຄັ້ງນີ້ ແມ່ນການຊ່ວຍເຫຼືອສຸດທີ່ມີຄວາມໝາຍສໍາຄັນ ເປັນການປະກອບສ່ວນອັນໃຫຍ່ຫຼວງ ທີ່ສະແດງໃຫ້ເຫັນເຖິງມູນເຊື້ອ ການພົວພັນຮ່ວມມືພິເສດຮອບດ້ານຂອງສອງພັກ, ສອງລັດຖະບານ ກໍຄືປະຊາຊົນສອງຊາດລາວ-ຫວຽດນາມ ໂດຍສະເພາະສອງກຳລັງປ້ອງກັນຄວາມສະຫງົບ ທີ່ມີມູນເຊື້ອຮັກແພງສາມັກຄີ, ຊ່ວຍເຫຼືອເຊິ່ງກັນ ແລະ ກັນ ດ້ວຍນໍ້າໃຈບໍລິສຸດຜຸດຜ່ອງມາແຕ່ດົນນານ; ພ້ອມນັ້ນ ຍັງໄດ້ຢັ້ງຢືນເຖິງການປະກອບສ່ວນສໍາຄັນໃນການຊຸກຍູ້ສົ່ງເສີມສາຍພົວພັນການຮ່ວມມື ລະຫວ່າງ ສອງຊາດ ໃນຂົງເຂດວຽກງານປ້ອງກັນຄວາມສະຫງົບ ທັງເປັນການຊ່ວຍເຫຼືອຖືກຕ້ອງກັບຄວາມຈຳເປັນ, ຄວາມຕ້ອງການທາງດ້ານວິຊາສະເພາະປ້ອງກັນຄວາມສະຫງົບລາວ ແລະ ສືບຕໍ່ຊ່ວຍເຫຼືອດ້ານພາຫະນະວິຊາສະເພາະ ຕາມແຜນຮ່ວມມືປະຈຳປີຂອງສອງກະຊວງ ເຊິ່ງກະຊວງປ້ອງກັນຄວາມສະຫງົບລາວ ຈະນໍາໃຊ້ພາຫະນະທີ່ໄດ້ຮັບການຊ່ວຍເຫຼືອເຂົ້າໃນການເຄື່ອນໄຫວວຽກງານວິຊາສະເພາະໃຫ້ເກີດປະໂຫຍດສູງສຸດ ແລະ ຈະປົກປັກຮັກສາໃຫ້ສາມາດນໍາໃຊ້ໄດ້ຍາວນານ.

ໃນໂອກາດດັ່ງກ່າວ ທ່ານ ພົນເອກ ວິໄລ ຫຼ້າຄໍາຟອງ ຍັງໄດ້ຕາງໜ້າໃຫ້ສູນກາງພັກ, ລັດຖະບານລາວ, ຄະນະນໍາ ກໍຄືນາຍ ແລະ ພົນຕຳຫຼວດທົ່ວກຳລັງປ້ອງກັນຄວາມສະຫງົບປະຊາຊົນລາວ ກ່າວສະແດງຄວາມຂອບໃຈຢ່າງຈິງໃຈ ຕໍ່ການຊ່ວຍເຫຼືອຈາກກະຊວງປ້ອງກັນຄວາມສະຫງົບຫວຽດນາມ ໃນຄັ້ງນີ້ ແລະ ຂໍຖືໂອກາດນີ້ ອວຍພອນ ພົນໂທ ເລືອງ ຕາມ ກວາງ ກຳມະການສູນກາງພັກ ຮອງລັດຖະມົນຕີກະຊວງປ້ອງກັນຄວາມສະຫງົບ ພ້ອມຄະນະ ຈົ່ງມີສຸກຂະພາບແຂງແຮງ ແລະ ມີຜົນສຳເລັດໃນໜ້າທີ່ວຽກງານ.