6 ທຸລະກິດລາຍໄດ້ເສີມທີ່ທ່ານສາມາດເຮັດໄດ້ຫລັງເລີກວຽກ
ຫາກທ່ານຢາກມີທຸລະກິດລາຍໄດ້ເສີມເປັນຂອງໂຕເອງ ແຕ່ທ່ານຍັງເມົາວຸ້ນຢູ່ແຕ່ກັບວຽກປະຈຳຂອງທ່ານ ບົດຄວາມນີ້ຈະ ຊ່ວຍແນະນຳ 6 ທຸລະກິດງ່າຍໆທີ່ທ່ານສາມາດເຮັດໄດ້ເມື່ອທ່ານມີເວລາວ່າງ ຫລື ຫລັງເລີກວຽກປະຈຳຂອງທ່ານແລ້ວ.
– ທຸລະກິດກ່ຽວກັບອາຫານ : ວິທີຫາລາຍໄດ້ງ່າຍໆນັ້ນກໍຄືເຮັດທຸລະກິດທີ່ກ່ຽວກັບອາຫານ ເພາະວ່າອາຫານເປັນສິນຄ້າທີ່ຕື່ມເຕັມຄວາມຕ້ອງການ ແລະ ຍັງເປັນ 1 ໃນປັດໄຈ 4 ສິ່ງສຳຄັນຂອງມະນຸດ ຖ້າຫາກທ່ານມັກເຮັດອາຫານ ແລະ ມີເຮືອນຄົວໃຫຍ່ໆນຳ ທ່ານກໍມາໄດ້ເຄິ່ງທາງແລ້ວ ຈົ່ງຫາອາຫານທີ່ທ່ານລຶ້ງ ແລ້ວເລີ່ມລົງມືເຮັດເລີຍ.
– ຂາຍຄວາມຮູ້ : ເອົາຄວາມຮູ້ຄວາມສາມາດຂອງທ່ານມາຂຽນເປັນໜັງສື e-book ຫລື ເຮັດເປັນຫລັກສູດອອນລາຍ ສຳລັບລູກຄ້າທີ່ກຳລັງສົນໃຈຮຽນຮູ້ໃນສິ່ງນັ້ນ ຖ້າທ່ານມີຄວາມຮູ້ ແລະ ມີກຸ່ມເປົ້າໝາຍມັນຈະສາມາດເຮັດກຳໄລໄດ້ບໍ່ໜ້ອຍເລີຍ ເພາະວ່າທ່ານບໍ່ຈຳເປັນຕ້ອງສອນໃໝ່ຊຳ້ໆ ພຽງແຕ່ທ່ານຂຽນ ຫລື ບັນທຶກວີດີໂອການສອນພຽງເທື່ອດຽວທ່ານກໍສາມາດຂາຍມັນໃຫ້ກັບລູກຄ້າທີ່ສົນໃຈຈະຮຽນໄດ້ຢ່າງບໍ່ຈຳກັດ.
ຖ້າຫາກທ່ານເປັນຄົນທີ່ຕິດໂລກອອນລາຍຢູ່ແລ້ວ ກໍເປັນໂອກາດທີ່ດີທີ່ຈະປ່ຽນມັນມາເປັນລາຍໄດ້ຂອງທ່ານ ໂດຍການສ້າງ ໜ້າລົງໂຄສະນາ ຈົນເຖິງການຂາຍເຄື່ອງອອນລາຍທຸລະກິດນີ້ ເປັນວຽກທີ່ງ່າຍ ສາມາດເຮັດໄດ້ທຸກບ່ອນທຸກເວລາ ແລະ ສ່ວນທີ່ ໜ້າສົນໃຈກໍຄື ຫາກທ່ານມີຫລາກຫລາຍທຸລະກິດ, ຫລາຍບັນຊີອອນລາຍກໍມີໂຕຊ່ວຍຕ່າງໆທີ່ສາມາດຈັດການໃຫ້ການເຮັດວຽກດ້ານສັງຄົມອອນລາຍຂອງທ່ານງ່າຍຂຶ້ນ ເຊັ່ນ : hootsuite ທີ່ຈະສາມາດຈັດການໜ້າເວັບໄຊຂອງທ່ານໄດ້ໂດຍທີ່ທ່ານບໍ່ຕ້ອງເປີດໄປເປີດມາ.
– ຂຽນບລັອກ : ການຂຽນບລັອກເປັນການສ້າງລາຍໄດ້ທີ່ງ່າຍຫລາຍຫາກທ່ານມັກທີ່ຈະສ້າງສັນຫົວຂໍ້ຕ່າງໆ ບໍ່ວ່າຈະເປັນ ການເຮັດອາຫານ, ສິລະປະ, ກາຕູນ, ເຄື່ອງສຳອາງ ຫລື ຂຽນຣີວິວສິນຄ້າຕ່າງໆ ເຊິ່ງກິດຈະກຳຍາມວ່າງນີ້ຈະສ້າງລາຍໄດ້ໃຫ້ ທ່ານຈາກສະປອນເຊີທີ່ມັກບລັອກຂອງທ່ານ.
– ວຽກອອກແບບກຣາບຟິກ : ວຽກນີ້ເຖິງວ່າທ່ານຈະບໍ່ມີຄວາມຮູ້ ຫລືບໍ່ເຄີຍຮຽນມາກ່ອນກໍບໍ່ສຳຄັນ ເພາະວ່າວຽກນີ້ສາມາດຝຶກຝົນທັກສະເອງໄດ້ຈາກສື່ການຮຽນການສອນຕ່າງໆ ແລະ ມີໂຕຊ່ວຍຫລວງຫລາຍໃຫ້ທ່ານສາມາດອອກແບບວຽກໃຫ້ເບິ່ງຈົບງາມ ເຊັ່ນ : ໂປຣແກຣມຈາກຕະກູນ Adobe ຫລື ເວັບໄຊ Canvas ທີ່ທ່ານຕ້ອງການກໍພຽງແຕ່ຄວາມຄິດສ້າງສັນ, ຄວາມມັກ ແລະ ໝັ່ນຝຶກຝົນ.
– ພັດທະນາແອັບພລິເຄຊັນ : ເຖິງວ່າໃນຕອນນີ້ຈະເບິ່ງມີແອັບພລິເຄຊັນໃນຕະຫລາດເກືອບຈະທຸກປະເພດແລ້ວກໍຕາມ ແຕ່ໃນປະຈຸບັນນັ້ນເຕັກໂນໂລຊີມີການເຕີບໃຫຍ່ທຸກປີ ການຝຶກຂຽນແອັບຈະຕ້ອງໃຊ້ເວລາສຶກສາຈັກໜ້ອຍ ແຕ່ຖ້າຫາກທ່ານເລີ່ມເຂົ້າໃຈມັນທ່ານກໍສາມາດໃຊ້ເວລາວ່າງໃຫ້ເກີດປະໂຫຍດ ແລະ ສ້າງລາຍໄດ້ພິເສດໃຫ້ໂຕທ່ານໄດ້.
