ຣັດເຊຍເລີ່ມເປີດຫີບບັດການເລືອກຕັ້ງຂຶ້ນແລ້ວ ແລະ ຄາດວ່າ ທ່ານ ວະລາດີເມຍ ປູຕິນ ຈະໄດ້ຮັບການເລືອກຕັ້ງອີກສະໄໝໜຶ່ງ
ວັນທີ 15 ມີນາ 2024 ສໍານັກຂ່າວຕ່າງປະເທດລາຍງານວ່າ: ປະຊາຊົນຢູ່ເຂດ ຄໍາຊັດກາ ໃນພາກຕາເວັນອອກໄກຂອງຣັດເຊຍ ເປັນບ່ອນທໍາອິດຂອງປະເທດທີ່ປະຊາຊົນໄປໃຊ້ສິດລົງຄະແນນເລືອກຕັ້ງປະທານາທິບໍດີ ເມື່ອເວລາ 08:00 ໂມງ ຕາມເວລາທ້ອງຖິ່ນຂອງວັນທີ 15 ເມສາ 2024 (03:00 ໂມງ ຕາມເວລາປະເທດລາວ).
ການເລືອກຕັ້ງປະທານາທິບໍດີຣັດເຊຍໄດ້ເປີດ ແລະ ປິດຫີບບັດຕາມເວລາຂອງແຕ່ລະພາກພື້ນ ໂດຍພື້ນທີ່ສຸດທ້າຍເຊິ່ງຈະມີການລົງຄະແນນ ແລະ ປິດຫີບບັດ ຄື ແຄວ້ນຄາລິນິນກຣາດ ທີ່ຢູ່ທາງຕາເວັນຕົກສຸດ ໃນເວລາ 20:00 ໂມງ ຕາມເວລາທ້ອງຖິ່ນຂອງວັນທີ 17 ມີນາ (01:00 ໂມງ ວັນທີ 18 ມີນາ ຕາມເວລາໃນປະເທດລາວ), ການເລືອກຕັ້ງຜູ້ນໍາຣັດເຊຍຄັ້ງນີ້ມີຜູ້ສະໝັກ 4 ຄົນ ໄດ້ແກ່ທ່ານ ວະລາດິສລາຟ ດູມັນຄອຟ ຮອງປະທານສະພາຜູ້ແທນລາຊະດອນ ຫລື ສະພາດູມາ ຈາກພັກປະຊາຊົນໃໝ່, ທ່ານ ເລໂອນິດ ສລຸດສກີ ຈາກພັກເສລີປະຊາທິປະໄຕ, ທ່ານ ນິໂຄໄລ ຄາຣິໂຕນອຟ ຈາກພັກກອມມູນິດ ແລະ ທ່ານ ປູຕິນ ເຊິ່ງລົງສະໝັກໃນນາມອິດສະຫລະ ໂດຍໄດ້ຮັບການສະໜັບສະໜູນຈາກພັກຢູໄນເຕັດຣັດເຊຍ.
ທັງນີ້, ທຸກຝ່າຍທັງພາຍໃນ ແລະ ຕ່າງປະເທດຄາດຄະເນໄປໃນທາງດຽວກັນວ່າ: ທ່ານ ປູຕິນ ອາຍຸ 71 ປີ ເຊິ່ງຄອງອໍານາດມາແຕ່ປີ 2000 ຈະໄດ້ຮັບໄຊຊະນະການເລືອກຕັ້ງ ແລະ ຮັກສາຕໍາແໜ່ງຕໍ່ເປັນສະໄໝທີ 5 ໂດຍຈະຢູ່ໃນຕໍາແໜ່ງຈົນຮອດປີ 2030 ຫລັງຣັດເຊຍແກ້ໄຂລັດຖະທໍາມະນູນໃນປີ 2020 ກ່ຽວກັບການກໍານົດວາລະດໍາລົງຕໍາແໜ່ງປະທານາທິບໍດີ.
ສະຖານີໂທລະພາບແຫ່ງຊາດຂອງຣັດເຊຍເຜີຍແພ່ຄໍາຖະແຫລງຂອງທ່ານ ປູຕິນ ທີ່ເຊີນຊວນໃຫ້ຊາວຣັດເຊຍອອກໄປໃຊ້ສິດລົງຄະແນນເລືອກຕັ້ງວ່າ: ການເລືອກຕັ້ງຄັ້ງນີ້ມີຂື້ນໃນໄລຍະທີ່ປະເທດຍັງຕ້ອງຝ່າຝັນຄວາມທ້າທາຍທີ່ສະຫຼັບຊັບຊ້ອນໃນທຸກມິຕິ. ດັ່ງນັ້ນ ຄວາມສາມັກຄີເປັນສິ່ງສໍາຄັນ ເພື່ອການກ້າວຂ້າມຜ່ານອຸປະສັກທັງໝົດໄປພ້ອມກັນ ແລະ ການໃຊ້ສິດເລືອກຕັ້ງເປັນການສະແດງອອກເຊິ່ງຄວາມຮັກຊາດ.
