ສປປ ລາວ ແລະ ສະຫະພາບ ເອີຣົບ ຮ່ວມມືກັນໃນຫລາຍດ້ານຕາມທ່າແຮງຂອງລາວ ມູນຄ່າຫລາຍກວ່າ 100 ລ້ານເອີໂຣ

ວັນທີ 14 ມີນາ 2024, ສະຫະພາບເອີຣົບ (EU), ຝຣັ່ງ, ເຢຍລະມັນ ແລະ ທະນາຄານເອີຣົບເພື່ອການລົງທຶນ (EIB) ໄດ້ເປີດແຜນງານການຮ່ວມມື ກັບ ສປປ ລາວ ເພື່ອຍົກລະດັບການຄ້າ, ການລົງ ທຶນ ແລະ ການເຊື່ອມໂຍງແບບຍືນຍົງ ແລະ ທົ່ວເຖິງ ໃນຂະແໜງກະສິກໍາ ແລະ ປ່າໄມ້ – TICAF ໃນຮູບແບບ ທຶນຊ່ວຍເຫລືອລ້າ ແລະ ເງິນກູ້ຢືມ ມູນຄ່າຫລາຍກວ່າ 100 ລ້ານເອີໂຣ.

ຈຸດປະສົງເພື່ອປະກອບສ່ວນໃຫ້ແກ່ການເຕີບໂຕສີຂຽວ, ຍືນຍົງ ແລະ ມີສ່ວນຮ່ວມ ດ້ວຍການຍົກລະດັບການຜະລິດພາຍໃນ, ການປຸງແຕ່ງ, ການສົ່ງອອກ, ການເກັບລາຍຮັບພາຍໃນ, ການສ້າງວຽກເຮັດງານທໍາທີ່ມີຄຸນຄ່າ ໃນຕ່ອງໂສ້ມູນຄ່າເພີ່ມກາເຟ, ຊາ ແລະ ປ່າໄມ້ ຄຽງຄູ່ກັບການຊ່ວຍເຫລືອ ສປປ ລາວ ໃນການຈັດຕັ້ງປະຕິບັດແຜນງານແຫ່ງຊາດ ເພື່ອປະກອບສ່ວນໃນການແກ້ໄຂບັນຫາການປ່ຽນແປງດິນຟ້າ ອາກາດ (NDC) ໂດຍການປົກປັກຮັກສາປ່າໄມ້ ແລະ ຊີວະນາໆພັນ.

ໂຄງການນີ້ຈະສະໜັບສະໜູນການພັດທະນາຊຸມຊົນ ຢູ່ທ້ອງຖິ່ນ ແບບຍືນຍົງ ເພີ່ມທະວີການປັບປຸງຄຸນນະພາບຂອງຂະແໜງກາເຟ ແລະ ຊາ ດ້ວຍກະສິກໍານິເວດ ແບບມີສ່ວນຮ່ວມຂັ້ນຊຸມຊົນ, ຕ່ອງໂສ້ມູນຄ່າເພີ່ມທີ່ມີຄວາມທົນທານຕໍ່ການປ່ຽນແປງດິນຟ້າອາກາດ ແລະ ມີສ່ວນຮ່ວມ ໂດຍ ອີງຕາມຫລັກການສິດທິມະນຸດ ແລະ ບົດບາດຍິງຊາຍ; ເພີ່ມທະວີການມີສ່ວນຮ່ວມຂອງຊຸມຊົນທ້ອງຖິ່ນ ໂດຍສະເພາະແມ່ນ ແມ່ຍິງໃນການສ້າງຄວາມເຂັ້ມແຂງ ໃຫ້ແກ່ຕ່ອງໂສ້ມູນຄ່າເພີ່ມປ່າໄມ້ ເພື່ອການນໍາໃຊ້ ແລະ ການປົກປັກຮັກສາແບບຍືນຍົງ; ສົ່ງເສີມການລົງທຶນ ຂອງພາກເອກະຊົນ ໃນຂະແໜງການກະສິກໍາ ແລະ ປ່າໄມ້ ແບບມີຄວາມຮັບຜິດຊອບ ແລະ ເຊື່ອມສານຫລັກການ ບົດບາດຍິງຊາຍ; ຍົກລະດັບການເຂົ້າເຖິງ, ການເຊື່ອມໂຍງ ກັບ ຕະຫລາດ.