ອິນໂດເນເຊຍເລັ່ງສ້າງເມືອງຫລວງແຫ່ງໃໝ່

     ວັນທີ 13 ມີນາ, ທ່ານ ໂຈໂກ ວິໂດໂດ ປະທານາທິບໍດີອິນໂດເນເຊຍ ຈັດກອງປະຊຸມພິເສດກັບທ່ານ ມາຣຸຟ ອາມິນ ຮອງປະທານາທິບໍດີ, ຄະນະຜູ້ແທນຈາກກະຊວງໂຍທາທິການ ແລະ ເຄຫາ, ອົງການບໍລິຫານເມືອງຫລວງນູຊັນຕາຣາ ແລະ ພະນັກງານຂະແໜງອື່ນໆ ເພື່ອຫາລືການເລັ່ງພັດທະນາເມືອງຫລວງແຫ່ງໃໝ່.

     ທ່ານ ບາຊູກີ ຮາດີມຸລໂຈໂນ ລັດຖະມົນຕີກະຊວງໂຍທາທິການ ແລະ ເຄຫາ ເປີດເຜີຍວ່າ: ກອງປະຊຸມເບື້ອງຕົ້ນມີມະຕິເລັ່ງລັດຂະບວນການກໍານົດສະຖານະທີ່ດິນ ແລະ ຈັດສັນທີ່ດິນເພື່ອການລົງທຶນໃນເມືອງຫລວງແຫ່ງໃໝ່ ລວມທັງມີມະຕິຈັດສັນຜູ້ຮັບຜິດຊອບ (PIC) ດ້ານການຮັບເລື່ອງຮ້ອງຮຽນທາງການລົງທຶນ ເພື່ອຍົກລະດັບການສື່ສານນໍາບັນດານັກລົງທຶນ.

     ທັງນີ້, ທ່ານ ວິໂດໂດ ວາງແຜນຈະເລີ່ມຕົ້ນເຮັດວຽກຢູ່ເມືອງຫລວງແຫ່ງໃໝ່ໃນແຂວງກາລິມັນຕັນໃນເດືອນກໍລະກົດນີ້ ຫລັງຈາກກໍ່ສ້າງສະໜາມບິນສໍາເລັດ ແລະ ມີນໍ້າສະອາດພ້ອມໃຊ້ ເຊິ່ງຄາດວ່າການຈັດສັນນໍ້າສະອາດ ແລະ ທາງພິເສດ (toll road) ສູ່ເມືອງຫລວງແຫ່ງໃໝ່ຈະສໍາເລັດໃນກາງປີນີ້.