ອາເມລິກາຮຽກຮ້ອງຮາມັດປ່ອຍຕົວປະກັນສູງອາຍຸ-ຜູ້ຍິງ-ຄົນເຈັບ ພ້ອມແນະນໍາໃຫ້ຮັບຂໍ້ສະເໜີຢຸດຍິງຊົ່ວຄາວ
ທໍານຽບຂາວ ອາເມລິກາ ຮຽກຮ້ອງໃຫ້ກຸ່ມຮາມັດປ່ອຍຕົວປະກັນຜູ້ສູງອາຍຸ, ຜູ້ຍິງ ລວມທັງຜູ້ບາດເຈັບ ຫລັງຈາກຖືກກຸ່ມຮາມັດຈັບໄວ້ຢູ່ເຂດກາຊາມາກວ່າ 5 ເດືອນແລ້ວ, ພ້ອມແນະນໍາໃຫ້ກຸ່ມຮາມັດຮັບຂໍ້ສະເໜີຢຸດຍິງຊົ່ວຄາວ ເພື່ອບັນເທົາວິກິດຄວາມຂັດແຍ່ງລະຫວ່າງອິດສະລາແອນ-ຮາມັດທີ່ຍັງເຄັ່ງຕຶງໃນເວລານີ້.
ທ່ານ ເຈກ ຊັລລິແວນ ທີ່ປຶກສາດ້ານຄວາມໝັ້ນຄົງແຫ່ງຊາດອາເມລິກາ ເປີດເຜີຍວ່າ: ການຢຸດຍິງຊົ່ວຄາວທີ່ຢູ່ໃນໂຕະເຈລະຈາມີຄວາມເປັນໄປໄດ້ວ່າຈະຍາວນານເຖິງ 6 ອາທິດ ເພື່ອເປີດໂອກາດໃນການສົ່ງມອບການຊ່ວຍເຫລືອດ້ານມະນຸດສະທໍາ ແລະ ຊຸກຍູ້ສິ່ງທີ່ຍືນຍົງໃຫ້ເກີດຂຶ້ນໃນເຂດກາຊາ ຖ້າກຸ່ມຮາມັດຍອມຮັບເງື່ອນໄຂດ້ວຍການປ່ອຍຕົວປະກັນກຸ່ມບອບບາງ ໂດຍສະເພາະຜູ້ສູງອາຍຸ, ຜູ້ຍິງ ແລະ ຜູ້ບາດເຈັບ.
ເບື້ອງຕົ້ນລັດຖະບານອິດສະລາແອນຍອມຮັບຂໍ້ສະເໜີຢຸດຍິງຊົ່ວຄາວແລ້ວ ເພື່ອແລກປ່ຽນຕົວປະກັນບາງສ່ວນທີ່ກຸ່ມຮາມັດຈັບໄວ້ ນັບແຕ່ສົງຄາມເລີ່ມຂຶ້ນໃນວັນທີ 7 ຕຸລາປີຜ່ານມາ ໂດຍອິດສະລາແອນຈະປ່ອຍຕົວນັກໂທດຊາວປາແລັສຕິນຕໍ່ຈໍານວນຕົວປະກັນຂອງກຸ່ມຮາມັດທີ່ຖືກກັກຂັງໄວ້ໃນອັດຕາ 10 ຕໍ່ 1.
ຂະນະທີ່ກຸ່ມຮາມັດປະກາດຈຸດຢືນຊັດເຈນກ່ອນໜ້ານີ້ວ່າ: ກອງກໍາລັງຂອງຕົນຈະຍອມຮັບຂໍ້ສະເໜີຢຸດຍິງເມື່ອແນວທາງດັ່ງກ່າວຕັ້ງຢູ່ບົນພື້ນຖານຂອງ “ການຢຸດຍິງຖາວອນ” ເພື່ອຢຸດສົງຄາມ ລວມທັງອິດສະລາແອນຈະຕ້ອງຖອນທະຫານທັງໝົດອອກຈາກເຂດກາຊາ ແທນທີ່ຈະຊຸກດັນຂໍ້ສະເໜີຢຸດຍິງຊົ່ວຄາວອີກ.
ທ່ານ ຊັລລິແວນ ລະບຸວ່າ: ພວກເຮົາຕັ້ງໃຈຈະພະຍາຍາມບັນລຸຂໍ້ຕົກລົງຢຸດຍິງຢ່າງໜ້ອຍ 6 ອາທິດ ເພື່ອແລກປ່ຽນຕົວປະກັນ ແລະ ນັກໂທດລະຫວ່າງທັງສອງຝ່າຍ ແລະ ຈະພະຍາຍາມຕໍ່ຍອດການເຈລະຈາຢຸດຍິງໃຫ້ຍືນຍົງຂຶ້ນ.
ອິດສະລາແອນ ແລະ ກຸ່ມຮາມັດເຄີຍບັນລຸຂໍ້ຕົກລົງຢຸດຍິງຊົ່ວຄາວມາແລ້ວຄັ້ງໜຶ່ງໃນທ້າຍເດືອນພະຈິກປີຜ່ານມາ ເປັນໄລຍະເວລາປະມານ 1 ອາທິດ ໂດຍມີການແລກປ່ຽນຕົວປະກັນຊາວອິດສະລາແອນ ແລະ ຊາວຕ່າງປະເທດ 100 ກວ່າຄົນ ກັບນັກໂທດຊາວປາແລັສຕິນປະມານ 240 ຄົນ.
ອ້າງອີງ:
- https://www.reuters.com/world/us-asks-hamas-release-women-elderly-hostages-longer-ceasefire-2024-03-12/
- https://www.nbcnews.com/news/world/live-blog/israel-hamas-war-live-updates-rcna142906
- https://www.jpost.com/breaking-news/article-791645
