ລາວຈະສະເຫລີມສະຫຼອງວັນອາຫານໂລກ-ວັນສາກົນ ແລະ ສັບປະດາແຫ່ງຊາດ ເພື່ອຫຼຸດຜ່ອນຄວາມທຸກຍາກ ໃນວັນທີ 17 ຕຸລານີ້ 

ທ່ານ ລຽນ ທິແກ້ວ ລັດຖະມົນຕີກະຊວງກະສິກໍາ ແລະ ປ່າໄມ້ໄດ້ຖະແຫຼ່ງຕໍ່ສື່ມວນຊົນໃນວັນທີ 9 ຕຸລາ ນີ້ວ່າ: ລາວຈະສະເຫລີມສະຫຼອງວັນອາຫານໂລກ, ວັນສາກົນ ແລະ ສັບປະດາແຫ່ງຊາດ ເພື່ອລົບລ້າງຄວາມທຸກຍາກ ຂຶ້ນໃນວັນທີ 17 ຕຸລາ, ທີ່ນະຄອນຫຼວງວຽງຈັນ. ສໍາລັບວັນອາຫານໂລກຈະມີຄໍາຂວັນ “ລົງທຶນໃສ່ການຄໍ້າປະກັນຄວາມໝັ້ນຄົງດ້ານສະບຽງອາຫານ ແລະ ການພັດທະນາຊົນນະບົດ ເພື່ອແກ້ໄຂການເຄື່ອນຍ້ານຖິ່ນຖານໃນອະນາຄົດ” ສ່ວນວັນສາກົນເພື່ອລົບລ້າງຄວາມທຸກຍາກ ແລະ ສັບປະດາແຫ່ງຊາດ ເພື່ອລົບລ້າງຄວາມທຸກຍາກ ພາຍໃຕ້ຄໍາຂວັນ “ກ້າວໄປສູ້ສັງຄົມສັນຕິສຸກ ແລະ ເພື່ອທຸກຄົນ” ແລະ ຈະມີກິດຈະກໍາຕ່າງໆຄື: ໂຮມຊຸມນຸມ, ຈັດປາຖະກະຖາ, ສໍາມະນາວິທະຍາສາດ,  ຈັດງານຕະຫຼາດນັດ ແລະ ວາງສະແດງສິນຄ້າ ແລະ ຜະລິດຕະພັນກະສິກໍາ. ເພື່ອເຮັດໃຫ້ການສະເຫລີມສະຫຼອງ ວັນອາຫານໂລກ, ວັນສາກົນ ແລະ ສັບປະດາແຫ່ງຊາດ ເພື່ອລົບລ້າງຄວາມທຸກຍາກ ປີນີ້ ມີຂະບວນຟົດຟື້ນ, ມີເນື້ອໃນ ແລະ ທັງເປັນການຊຸກຍູ້ສົ່ງເສີມຜະລິດກະສິກໍາ ປູກຝັງ-ລ້ຽງສັດ, ແນໃສ່ຄໍ້າປະກັນຄວາມໝັ້ນຄົງດ້ານສະບຽງອາຫານ, ເຮັດກະສິກໍາສະອາດຕາມທິດສີຂຽວຍືນຍົງ, ຊຸກຍູ້ການຜະລິດເປັນສິນຄ້າ ສ້າງລາຍຮັບໃຫ້ແກ່ຄອບຄົວ ກໍຄືການຮ່ວມກັນເຮັດວຽກເພື່ອຫຼຸດພົ້ນອອກຈາກຄວາມທຸກຍາກ, ທຸກຄົນສາມາດເຂົ້າເຖິງອາຫານທີ່ມີໂພຊະນາການ ແລະ ຕັ້ງໜ້າເຂົ້າຮ່ວມປະຕິບັດສອງໜ້າທີ່ຍຸດທະສາດຂອງຊາດຄື: ປົກປັກຮັກສາ ແລະ ສ້າງສາພັດທະນາປະເທດຊາດ ແລະ ສາມາດນໍາເອົາປະເທດຊາດຫຼຸດພົ້ນອອກຈາກຄວາມດ້ອຍພັດທະນາໃນປີ 2020 ໃຫ້ປະສົບຜົນສໍາເລັດຕາມລະດັບຄາດໝາຍທີ່ພັກ ແລະ ລັດຖະບານວາງໄວ້.