ລາວ-ໄທເຫັນດີເສີມຂະຫຍາຍການເຊື່ອມຈອດດ້ານຄົມມະນາຄົມ
ກອງປະຊຸມລະດັບລັດຖະມົນຕີກະຊວງໂຍທາທິການ ແລະ ຂົນສົ່ງລາວ ແລະ ໄທໄດ້ມີຂຶ້ນເມື່ອບໍ່ດົນມານີ້, ຢູ່ແຂວງຫລວງພະບາງ, ຝ່າຍລາວນໍາໂດຍທ່ານລັດຖະມົນຕີກະຊວງໂຍທາທິການ ແລະ ຂົນສົ່ງ ບຸນຈັນ ສີນທະວົງ ແລະ ຝ່າຍໄທແມ່ນທ່ານ ອາຄົມ ເຕີມພິດທະຍາໄພສິດ ລັດຖະມົນຕີກະຊວງຄົມມະນາຄົມແຫ່ງຣາຊະອານາຈັກໄທ.
ໃນກອງປະຊຸມ, ສອງຝ່າຍໄດ້ຕີລາຄາຄືນການຮ່ວມມືໃນໄລຍະຜ່ານມາ, ຊຶ່ງເຫັນວ່າໄດ້ມີການຊ່ວຍເຫລືອເຊິ່ງກັນ ແລະ ກັນດ້ວຍດີຕະຫລອດມາ ແລະ ມີຫລາຍໂຄງການໄດ້ຮັບຜົນສໍາເລັດຢ່າງໜ້າເພິ່ງພໍໃຈ ເປັນຕົ້ນ: ການກໍ່ສ້າງຂົວຂ້າມແມ່ນ້ຳຂອງມິດຕະພາບນັບແຕ່ແຫ່ງທີ 1, 2, 3 ແລະ 4 ທີ່ໄດ້ສຳເລັດແລ້ວ ແລະ ຈະສືບຕໍ່ກໍ່ສ້າງແຫ່ງທີ 5 ແລະ 6 ແລະ ແຫ່ງຕໍ່ໆໄປໃນຕໍ່ໜ້າ, ນອກນີ້ຍັງມີໂຄງການກໍ່ສ້າງເສັ້ນທາງເລກທີ 11, ເສັ້ນທາງລົດໄຟທ່ານາແລ້ງ-ໜອງຄາຍໄລຍະ 1 ແລະ 2 ແລະ ເສັ້ນທາງອື່ນໆ, ລວມເຖິງໂຄງການພັດທະນາ ລະບົບສຸຂາພິບານ, ການຂົນສົ່ງທາງບົກ, ທາງນ້ຳ ແລະ ທາງອາກາດທີ່ມີການຮ່ວມມືກັນພັດທະນາມາຢ່າງຕໍ່ເນື່ອງ, ອັນໄດ້ປະກອບສ່ວນອຳນວຍຄວາມສະດວກໃຫ້ແກ່ການໄປມາຫາສູ່, ການຄ້າ, ການລົງທຶນ, ທ່ອງທ່ຽວ ແລະ ດ້ານອື່ນໆລະຫວ່າງປະຊາຊົນສອງຊາດນັບມື້ດີຂຶ້ນ, ພ້ອມນີ້, ສອງຝ່າຍຍັງໄດ້ຕົກລົງເຫັນດີເສີມຂະຫຍາຍການຮ່ວມມືກັນໃຫ້ຫລາຍຂຶ້ນກວ່າເກົ່າ, ໂດຍສະເພາະແມ່ນເລັ່ງໃສ່ການເຊື່ອມຈອດຜ່ານຂົວມິດຕະພາບລາວ-ໄທ, ທາງລົດໄຟ, ການຂົນສົ່ງທາງພາຫະນະ, ອາກາດ, ພັດທະນາພື້ນຖານໂຄງລ່າງ ແລະ ການພັດທະນາບຸກຄະລາກອນ, ເພື່ອປະກອບສ່ວນເຂົ້າໃນການພັດທະນາເສດຖະກິດ, ການໄປມາຫາສູ່ລະຫວ່າງປະຊາຊົນສອງປະເທດລາວ-ໄທ ກໍຄືພາກພື້ນ ແລະ ສາກົນໃຫ້ນັບມື້ສະດວກສະບາຍ,ທັນສະໄໝ ແລະ ເຂັ້ມແຂງຂຶ້ນເທື່ອລະກ້າວ.
