ຄວາມເພິ່ງພໍໃຈຂອງຊາວຟີລິບປິນ ຕໍ່ທ່ານ ດູເຕີເຕ ຕໍ່າສຸດໃນຮອບປີ
ຄະແນນຄວາມເພິ່ງພໍໃຈຂອງຊາວຟີລິບປິນທີ່ມີຕໍ່ປະທານາທິບໍດີ ໂຣດຣິໂກ ດູເຕີເຕ ຫລຸດລົງສູ່ລະດັບຕໍ່າທີ່ສຸດ ນັບແຕ່ເຂົ້າມາບໍລິຫານປະເທດໃນປີກາຍ.
ສຳນັກຂ່າວຕ່າງປະເທດລາຍງານຈາກນະຄອນຫລວງມະນິລາ ປະເທດຟີລິບປິນ ໃນວັນທີ 9 ຕຸລາວ່າ: ສູນວິໄຈ ເດິ ໂຊຊຽວ ເວເທີ ສເຕຊັນ (SWS) ສຳຫລວດຄວາມຄິດເຫັນຊາວຟີລິບປິນ 1.500 ຄົນ ໂດຍການສຳພາດແບບຕົວຕໍ່ຕົວ ລະຫວ່າງວັນທີ 23-27 ກັນຍາຜ່ານມາ ກ່ຽວກັບການເຮັດວຽກຂອງປະທານາທິບໍດີ ໂຣດຣິໂກ ດູເຕີເຕ ພົບວ່າຄະແນນຄວາມເພິ່ງພໍໃຈມີພຽງ 48% ຫລຸດລົງ 18 ຈຸດຈາກການສຳຫລວດໃນເດືອນມິຖຸນາຜ່ານມາ ເຊິ່ງຍັງຖືວ່າຢູ່ໃນ “ລະດັບດີ”, ແຕ່ຖືເປັນຄະແນນລະດັບຕໍ່າສຸດ ນັບແຕ່ຜູ້ນຳຟີລິບປິນເຂົ້າບໍລິຫານປະເທດໃນທ້າຍເດືອນມິຖຸນາປີຜ່ານມາ.
ວີດີໂອປະກອບ: Al Jazeera English
https://www.youtube.com/watch?v=q53tiEY2Zwc
ຂະນະທີ່ຄະແນນຄວາມເຊື່ອໝັ້ນຂອງຊາວຟີລິບປິນທີ່ມີຕໍ່ທ່ານ ດູເຕີເຕ ມີ 60% ຫລຸດລົງ 15 ເຊິ່ງຍັງຈັດຢູ່ໃນ “ລະດັບດີຫລາຍ”, ແຕ່ຫລຸດລົງສູງເຖິງ 15 ຈຸດຈາກການສຳຫລວດໃນເດືອນມິຖຸນາຜ່ານມາ ເຊິ່ງຄະແນນໃນຕອນນັ້ນມີ 75% ຈັດວ່າຢູ່ໃນ “ລະດັບດີທີ່ສຸດ”.
