ແອວນີໂຢ ເຮັດໃຫ້ອຸນຫະພູມໂລກ ໃນເດືອນມີນາ-ພຶດສະພາ ສູງກວ່າປົກກະຕິ

ຂ່າວຕ່າງປະເທດລາຍງານວັນທີ 5 ມີນາ 2024, ບົດລາຍງານຂອງອົງການອຸຕຸນິຍົມວິທະຍາໂລກ (WMO) ໄດ້ລະບຸວ່າ: ອົງການຊ່ຽວຊານພິເສດດ້ານສະພາບອາກາດຂອງອົງການສະຫະປະຊາຊາດກ່າວວ່າ: ປາກົດການແອວນີໂຢຈະເຮັດໃຫ້ອຸນຫະພູມອາກາດໂລກລະຫວ່າງເດືອນມີນາ – ພິຶດສະພາປີນີ້ ສູງກວ່າປົກກະຕິ.

WMO ຄາດວ່າມີປະມານ 60% ທີ່ອິດທິພົນຂອງແອວນີໂຢຈະເຮັດໃຫ້ພື້ນທີ່ເກືອບທຸກແຫ່ງໃນໂລກມີອຸນຫະພູມສູງກວ່າປົກກະຕິ ໃນລະຫວ່າງເດືອນມີນາຈົນເຖິງເດືອນພຶດສະພາ ແລະ ຄາດວ່າມີໂອກາດເຖິງ 80% ທີ່ສະພາບອາກາດຈະຄົງຕົວ ຫຼື ຢູ່ລະດັບປານກາງ ຊຶ່ງຈະເກີດໃນລະຫວ່າງເດືອນເມສາຈົນເຖິງເດືອນມິຖຸນາປີນີ້. ຫຼັງຈາກນັ້ນອາດມີຄວາມເປັນໄປໄດ້ທີ່ປາກົດການ ລານີຢາ ຊຶ່ງກົງກັນຂ້າມກັບແອວນີໂຢ ຈະກໍ່ຕົວຂຶ້ນ ແຕ່ທົ່ວໄປຍັງບໍ່ມີຄວາມຊັດເຈນ, ໂດຍໂລກຢູ່ພາຍໃຕ້ອິດທິພົນຂອງ ລານີຢາ ຄັ້ງຫຼ້າສຸດລະຫວ່າງປີ 2020 ຈົນເຖິງຕົ້ນປີ 2023.

 ອີກຢ່າງໜຶ່ງ, ປາກົດການແອວນີໂຢຈະເກີດຂຶ້ນທຸກ 2 ຫຼື 7 ປີ ໂດຍໄລຍະເວລາປະມານ 9-12 ເດືອນ ຂະນະທີ່ໂລກໄດ້ປະເຊີນກັບປາກົດການດັ່ງກ່າວ ລະຫວ່າງປີ 2015-2016 ແລະ ແອວນີໂຢ

ໃນປັດຈຸບັນມີຄວາມຮຸນແຮງທີ່ສຸດ ລະຫວ່າງເດືອນພະຈິກ-ມັງກອນ ຜ່ານມາ.