ອົດສະຕຣາລີ ຈະສະໜອງເງິນ 3 ລ້ານໂດລາອົດສະຕຣາລີ ເພື່ອລົບລ້າງພະຍາດໄຂ້ເລືອດອອກ ຢູ່ ສປປ ລາວ
ວັນທີ 6 ມີນາ 2024, ທ່ານ ແອນໂຕນີ ອານບານີຊີ (Anthony Albanese), ນາຍົກ ລັດຖະມົນຕີ ອົດສະຕຣາລີ ແລະ ທ່ານ ສອນໄຊ ສີພັນດອນ, ນາຍົກລັດຖະມົນຕີ ແຫ່ງ ສປປ ລາວ ໄດ້ລົງນາມ ໃນຂໍ້ຕົກລົງ ຍົກລະດັບ ການພົວພັນ ສອງຝ່າຍ ຂຶ້ນເປັນ ຄູ່ຮ່ວມມື ຢ່າງຮອບດ້ານ.
ສຳລັບ ການພົວພັນຄູ່ ຮ່ວມມື ຮອບດ້ານ ສປປ ລາວ-ອົດສະຕຣາລີ ຈະຊຸກຍູ້ ການພົວພັນ ສອງຝ່າຍໃນ 4 ເສົາຄ້ຳ, ຊຶ່ງສ່ອງແສງບັນດາ ບຸລິມະສິດລວມ ຂອງ 2 ປະເທດ ໃນອະນາຄົດ ລວມມີ: ດ້ານມະນຸດ, ການສຶກສາ ແລະ ການພັດທະນາແຫລ່ງຊັບພະຍາກອນມະນຸດ; ເສດຖະກິດ, ການຄ້າ ແລະ ການລົງທຶນ; ດິນຟ້າອາກາດ, ສິ່ງແວດລ້ອມ ແລະ ພະລັງງານ; ການປ້ອງກັນຊາດ ແລະ ການປະຕິບັດ ກົດໝາຍ. ຍຸດທະສາດ ເສດຖະກິດ ອາຊີ ຕາເວັນອອກ ສ່ຽງໃຕ້ຂອງ ອົດສະຕຣາລີ ຮອດປີ 2040 ໄດ້ກຳນົດ ກະສິກຳ, ອາຫານ, ຊັບພະຍາກອນທຳມະຊາດ ແລະ ພະລັງງານສີຂຽວ ແມ່ນບັນດາຂົງເຂດ ມີກຳລັງ ບົ່ມຊ້ອນຕົ້ນຕໍ ໃຫ້ແກ່ ວິສາຫະກິດ ອົດສະຕາລີ ຢູ່ສປປ ລາວ. ການພົວພັນ ຄູ່ຮ່ວມມືຮອບດ້ານຈະໜູນຊ່ວຍ ສປປ ລາວ ພັດທະນາ ແບບຍືນຍົງ ໃນບັນດາ ຂົງເຂດນີ້ ຢ່າງສຸດຂີດ.
ທ່ານ ແອນໂຕນີ ອານບານີຊີ ໄດ້ແຈ້ງໃຫ້ຊາບວ່າ: ອົດສະຕຣາລີ ໃຫ້ຄຳໝັ້ນສັນຍາ ສະໜອງເງິນ 3 ລ້ານໂດລາ ອົດສະຕຣາລີ (ເກືອບ 2 ລ້ານ ໂດລາ ສະຫະລັດ) ໃຫ້ແກ່ “ໂຄງການຍຸງໂລກ” ຂອງມະຫາວິທະຍາໄລ Monash (ອົດສະຕາລີ) ເພື່ອລົບລ້າງ ພະຍາດ ໄຂ້ເລືອດອອກ ຢູ່ ສປປ ລາວ.
ການລົງນາມ ໃນຂໍ້ຕົກລົງ ຍົກລະດັບ ການພົວພັນ ສອງຝ່າຍ ຂຶ້ນເປັນ ຄູ່ຮ່ວມມື ຢ່າງຮອບດ້ານລະຫວ່າງ ສປປ ລາວ-ອົດສະຕຣາລີ ໄດ້ດຳເນີນໄປໃນໂອກາດກອງປະຊຸມສຸດຍອດພິເສດ ວັນສ້າງຕັ້ງ ການພົວພັນ ອາຊຽນ-ອົດສະຕາລີ ສະເຫລີມສະຫລອງ ຄົບຮອບ 50 ປີ (1974 – 2024) ໄດ້ຈັດຂຶ້ນ ຢູ່ນະຄອນ ເມລເບີຣນ(Melbourne)
