ຄະນະນຳກະຊວງ ສສກ ພົບປະແລກປ່ຽນບົດຮຽນການນຳໃຊ້ສະໜາມກິລາ ທີ່ປະເທດຍີ່ປຸ່ນ

ຄະນະນຳຈາກກະຊວງສຶກສາທິການ ແລະ ກິລາ ສປປ ລາວ ນຳໂດຍທ່ານ ກິ່ງມະໂນ ພົມມະຫາໄຊ ຮອງລັດຖະມົນຕີກະຊວງສຶກສາທິການ ແລະ ກິລາ ຫຼື ສສກ ແລະ ກົມກອງກ່ຽວຂ້ອງ ກໍຄື ຫ້ອງການ ສສກ, ກົມກິລາລະດັບສູງ ແລະ ກົມກິລາມວນຊົນ, ພະລະ ແລະ ສິລະປະສຶກສາ ເດີນທາງໄປປະເທດຍີ່ປຸ່ນ ເພື່ອພົບປະກັບບັນດາພາກສ່ວນຕ່າງໆ ແນໃສ່ແລກປ່ຽນບົດຮຽນກ່ຽວກັບວິທີການນຳໃຊ້ ແລະ ບຳລຸງຮັກສາສະໜາມກິລາຂອງປະເທດຍີ່ປຸ່ນ ເພື່ອນຳເອົາບົດຮຽນມາໝູນໃຊ້ໃນການບຳລຸງຮັກສາສະໜາມກິລາທີ່ຢູ່ພາຍໃຕ້ການຮັບຜິດຊອບຂອງ ສສກ ໂດຍສະເພາະການຊ່ວຍເຫຼືອລ້າຂອງລັດຖະບານຍີ່ປຸ່ນ ໃນໂຄງການກໍ່ສ້າງສະໜາມກິລາເຈົ້າອານຸວົງ.

ທ່ານ ຈັນທະວົງ ປັນຍາສີລິ ຮອງຫົວໜ້າກົມກິລາລະດັບສູງ ກະຊວງ ສສກ ທີ່ໄດ້ເດີນທາງເຂົ້າຮ່ວມນຳຄະນະນຳກິລາລາວ ໃນຄັ້ງນີ້ ໄດ້ລາຍງານໃຫ້ຮູ້ວ່າ: ການເດີນທາງມາຄັ້ງນີ້ ກໍເພື່ອພົບປະກັບບັນດາພາກສ່ວນຕ່າງໆ ແນໃສ່ແລກປ່ຽນບົດຮຽນກ່ຽວກັບວິທີການນຳໃຊ້ບຳລຸງຮັກສາສະໜາມກິລາຂອງປະເທດຍີ່ປຸ່ນ ເພື່ອຈະນຳມາບໍລິຫານບຳລຸງຮັກສາສະໜາມກິລາທີ່ຢູ່ພາຍໃຕ້ການຮັບຜິດຊອບຂອງ ສສກ ໂດຍສະເພາະການຊ່ວຍເຫຼືອລ້າຂອງລັດຖະບານຍີ່ປຸ່ນ ໃນໂຄງການກໍ່ສ້າງສະໜາມກິລາເຈົ້າອານຸວົງ ແນ່ນອນວ່າໃນການມາຄັ້ງນີ້ພວກເຮົາໄດ້ຮ່ວມຝຶກອົບຮົມກ່ຽວກັບ ການຄຸ້ມຄອງສະໜາມກິລາເປັນຕົ້ນຕໍ ເນື່ອງໃນໂອກາດທີ່ລັດຖະບານ ຍີ່ປຸ່ນ ໄດ້ໃຫ້ການຊ່ວຍເຫຼືອສ້າງສະໜາມກິລາເຈົ້າອານຸວົງໃຫ້ ສປປ ລາວ ຊຶ່ງທາງອົງການໄຈກ້າ ໃນນາມເປັນຜູ້ປະສານງານຫຼັກ ຈຶ່ງໄດ້ມອບໝາຍໃຫ້ອົງການໄຈ ຮັບຜິດຊອບນຳພາຄະນະນຳກິລາລາວ ໄດ້ຮຽນຮູ້ກ່ຽວກັບການນຳໃຊ້ ແລະ ການບຳລຸງຮັກສາສະໜາມກິລາເຈົ້າອານຸວົງ ທີ່ຈະເກີດຂຶ້ນໃນໄວໆນີ້ ໂດຍພວກເຮົາຈະນຳໃຊ້ບົດຮຽນຂອງຍີ່ປຸ່ນ ເພື່ອປະຕິບັດໃຫ້ສະໜາມກິລາດັ່ງກ່າວໄດ້ມີຄວາມຍືນຍົງຍາວນານ.

ນອກຈາກການຝຶກອົບຮົມແລ້ວ ຄະນະນຳກິລາລາວ ພວກເຮົາກໍໄດ້ເຂົ້າຢ້ຽມຢາມພົບປະທະບວງກິລາຂອງຍີ່ປຸ່ນ, ໄປຟັງປະຖະກາຖາຂອງ ເຈລີກ, ໄປຢ້ຽມຊົມສະໂມສອນ ອາບິຢາ ແລະ ລີກ 2 ຂອງປະເທດຍີ່ປຸ່ນ ນອກນັ້ນ ກໍຍັງໄດ້ໄປຢ້ຽມສູນຝຶກກິລາແຫ່ງຊາດຂອງຍີ່ປຸ່ນ ຊຶ່ງວ່າເຂົາເຈົ້າເຮັດການຕະຫຼາດທີ່ເຂັ້ມແຂງຫຼາຍໂດຍມີການມອບໝາຍໃຫ້ບໍລິສັດ ອາລິຍະໂມໂຕ ຜະລິດກ່ຽວກັບວຽກງານສື່ ເພື່ອເປັນການໂຄສະນາວຽກງານຕ່າງໆ ແລະ ກໍຍັງໄດ້ໄປຢ້ຽມຊົມບັນດາສະໂມສອນໃນ ລີກ 1 ແລະ ຮັບຟັງການບັນຍາຍກ່ຽວກັບການບໍລິຫານຄຸ້ມຄອງສະໜາມກິລາຈາກຜູ້ຊຽວຊານທີ່ມາຈາກເມືອງໄຊຕະມະ ຊຶ່ງນະໂຍບາຍຂອງເພີ່ນແມ່ນເປີດກວ້າງໃຫ້ບັນດາບໍລິສັດໄດ້ຊື້ສິດໃນການຄຸ້ມຄອງ ໂດຍມີຜົນກຳໄລນຳກັນ ແລະ ຜົນໄດ້ຮັບກໍແມ່ນປະຊາຊົນຍີ່ປຸ່ນ.

ຂ່າວຈາກ: ໜັງສືພິມສຶກສາ-ກິລາລາຍວັນ