ເດິ ພະນົມເປັນ ໂພສ ໜັງສືພິມພາສາອັງກິດເກົ່າແກ່ທີ່ສຸດຂອງກໍາປູເຈຍ ກຽມຢຸດການພິມ

     ເດິ ພະນົມເປັນ ໂພສ ໜັງສືພິມພາສາອັງກິດເກົ່າແກ່ທີ່ສຸດຂອງກໍາປູເຈຍ ກຽມຢຸດການພິມໃນທ້າຍເດືອນມີນານີ້ ເນື່ອງຈາກປະສົບບັນຫາທາງການເງິນ ແລະ ເຕັກໂນໂລຊີທີ່ປ່ຽນແປງຢ່າງວ່ອງໄວ.

     ວັນທີ 2 ມີນາ, ສໍານັກຂ່າວຕ່າງປະເທດລາຍງານວ່າ: ກອງບັນນາທິການໜັງສືພິມ ເດິ ພະນົມເປັນ ໂດສ ອອກຖະແຫລງການ ເຊິ່ງພິມລົງໃນສະບັບວັນທີ 1 ມີນາຜ່ານມາວ່າ: ຈະຢຸດພິມພາສາຂະເໝນ ແລະ ພາສາອັງກິດ ພາຍໃນວັນທີ 29 ມີນານີ້ ເນື່ອງຈາກປະສົບບັນຫາລາຍໄດ້ທີ່ຫລຸດລົງຢ່າງຕໍ່ເນື່ອງ ນັບແຕ່ການແຜ່ລະບາດຂອງພະຍາດໂຄວິດ-19 ເຊິ່ງສົ່ງຜົນເຮັດໃຫ້ຈໍານວນຜູ້ສະໝັກສະມາຊິກຫລຸດລົງນໍາ.

      ຂະນະດຽວກັນ, ຖະແຫລງການໂດຍກອງບັນນາທິການ ເດິ ພະນົມເປັນ ໂພສ ລະບຸອີກວ່າ: ເຕັກໂນໂລຊີ ແລະ ນະວັດຕະກໍາດ້ານສື່ສານມວນຊົນ ເຊິ່ງພັດທະນາໄປຢ່າງວ່ອງໄວ ສົ່ງຜົນເຮັດໃຫ້ຜູ້ຮັບຂໍ້ມູນຫັນໄປຮັບຂໍ້ມູນຈາກໂຊຊຽວມີເດຍຫລາຍຂຶ້ນ ເຊິ່ງສົ່ງຜົນກະທົບຕໍ່ລາຍໄດ້ຂອງບໍລິສັດ.

     ເຖິງຢ່າງໃດກໍຕາມ, ແຫລ່ງຂ່າວລະດັບສູງໃນກອງບັນນາທິການຂອງ ເດິ ພະນົມເປັນ ໂພສ ຢືນຢັນວ່າ: ຈະຍັງນໍາສະເໜີຂໍ້ມູນຂ່າວສານໃນຮູບແບບອອນລາຍຕໍ່ໄປ ເຖິງວ່າບໍ່ມີການລະບຸຢ່າງເປັນທາງການໃນຖະແຫລງການກໍຕາມ.

      ເດິ ພະນົມເປັນ ໂພສ ເຊິ່ງເປັນໜັງສືພິມພາສາອັງກິດເກົ່າແກ່ທີ່ສຸດຂອງກໍາປູເຈຍ ສ້າງຕັ້ງຂຶ້ນໃນປີ 1992 ໂດຍທ່ານ ໄມເຄິລ ເຮຍ ແລະ ນາງ ເຄລີນ ໂອຄີບ ຊາວອາເມລິກາ ເລີ່ມຈາກການພິມເປັນລາຍປັກໃນພາສາອັງກິດ ຈາກນັ້ນເພີ່ມການພິມພາສາຂະເໝນ ແລະ ປ່ຽນເປັນໜັງສືພິມລາຍວັນ ນັບແຕ່ປີ 2008.