ຜູ້ນໍາມາເລເຊຍຍິນດີເປີດການຄົ້ນຫາ MH370 ອີກ ຖ້າພົບຫລັກຖານໜ້າສົນໃຈ
ນາຍົກລັດຖະມົນຕີ ອັນວາ ອິບຣາຮິມ ຜູ້ນໍາມາເລເຊຍ ກ່າວວ່າ: ທ່ານຍິນດີຈະເປີດການຄົ້ນຫາຖ້ຽວບິນ MH370 ອີກ ຖ້າມີຫລັກຖານທີ່ໜ້າສົນໃຈ. ຖືເປັນການເປີດໂອກາດຄັ້ງໃໝ່ສໍາລັບການຕາມຫາເຮືອບິນທີ່ຫາຍສາບສູນໄປແລ້ວ 10 ປີ.
ວັນທີ 4 ມີນາ, ສໍານັກຂ່າວຕ່າງປະເທດລາຍງານວ່າ: ການສະແດງຄວາມເຫັນຂອງທ່ານ ອັນວາ ມີຂຶ້ນລະຫວ່າງການເດີນທາງຢ້ຽມຢາມເມືອງເມລເບິນ, ຂະນະທີ່ຫລາຍຄອບຄົວຮ່ວມລະນຶກການຄົບຮອບ 10 ປີ ນັບແຕ່ເຮືອບິນລໍາດັ່ງກ່າວ ເຊິ່ງມີຜູ້ໂດຍສານ 239 ຄົນ ສູນຫາຍໃນມະຫາສະໝຸດອິນເດຍ.
ທັງນີ້, ເຮືອບິນໂບອິ້ງ 777 ຂອງສາຍການບິນມາເລເຊຍ ແອລາຍ ຖ້ຽວບິນ MH370 ຫາຍໄປຈາກຈໍເຣດາ ໃນວັນທີ 8 ມີນາ 2014 ລະຫວ່າງເດີນທາງຈາກນະຄອນຫລວງກົວລາລໍາເປີ ປະເທດມາເລເຊຍ ໄປນະຄອນຫລວງປັກກິ່ງ ປະເທດຈີນ.
ເຖິງວ່າເຫດການດັ່ງກ່າວເຮັດໃຫ້ເກີດການຄົ້ນຫາຄັ້ງໃຫຍ່ທີ່ສຸດໃນປະຫວັດສາດການບິນ, ແຕ່ພັດບໍ່ພົບເຮືອບິນລໍາດັ່ງກ່າວ ແລະ ປະຕິບັດການນີ້ຖືກໂຈະໄປໃນເດືອນມັງກອນ 2017.
ໃນວັນທີ 3 ມີນາຜ່ານມາ, ຍາດພີ່ນ້ອງຂອງຜູ້ສູນຫາຍ ເຊິ່ງສ່ວນຫລາຍເປັນຊາວຈີນ ແລະ ກຸ່ມຜູ້ສະໜັບສະໜູນຂອງພວກເຂົາ ປະມານ 500 ຄົນ ລວມຕົວກັນຢູ່ສູນການຄ້າແຫ່ງໜຶ່ງໃກ້ນະຄອນຫລວງກົວລາລໍາເປີ ເພື່ອລະນຶກເຖິງ “ວັນແຫ່ງຄວາມຊົງຈໍາ” ໂດຍຫລາຍຄົນມີສີໜ້າໂສກເສົ້າ.
ການຄົ້ນຫາຄັ້ງນັ້ນ ເຊິ່ງນໍາໂດຍອົດສະຕຣາລີ ແລະ ຄວບຄຸມເນື້ອທີ່ 120.000 ຕາກິໂລແມັດ ໃນມະຫາສະໝຸດອິນເດຍ ພົບພຽງເສດຊິ້ນສ່ວນເລັກໜ້ອຍ ແລະ ເກືອບບໍ່ພົບຮ່ອງຮອຍອື່ນໆຂອງຖ້ຽວບິນ MH370 ເລີຍ.
ອ້າງອີງ:
- https://www.reuters.com/world/asia-pacific/malaysia-says-search-must-go-10-years-after-plane-vanished-2024-03-03/
- https://www.theguardian.com/world/2024/mar/03/flight-relatives-call-for-new-search-10-years-after-disappearance
- https://www.aljazeera.com/news/2024/3/3/malaysia-could-renew-search-for-plane-10-years-after-it-vanished
