ນາຍົກ ເນັ້ນໃຫ້ຂະແໜງພະລັງງານ ແລະ ບໍ່ແຮ່ ຕັ້ງໜ້າປະກອບສ່ວນ ພັດທະນາເສດຖະກິດ-ສັງຄົມ ແກ້ໄຂຄວາມທຸກຍາກໃຫ້ດີຂຶ້ນເປັນກ້າວໆ

ວັນທີ 1 ມີນາ 2024 ທີ່ສຳນັກງານໃຫຍ່ລັດວິສາຫະກິດໄຟຟ້າລາວ, ທ່ານ ສອນໄຊ ສີພັນດອນ ນາຍົກລັດຖະມົນຕີ ໄດ້ໂອ້ລົມຊີ້ນຳວຽກງານ ກະຊວງພະລັງງານ ແລະ ບໍ່ແຮ່; ໂດຍໄດ້ຍົກໃຫ້ເຫັນບົດບາດຄວາມສຳຄັນຂອງວຽກງານດັ່ງກ່າວ ຕໍ່ພາລະກິດສ້າງສາພັດທະນາປະເທດຊາດ; ສະພາບ ແລະ ທ່າອ່ຽງ ຄວາມຕ້ອງການ ໃນການນຳໃຊ້ພະລັງງານໄຟຟ້າຢູ່ປະເທດເຮົາ ເຂົ້າໃນວຽກງານຕ່າງໆ ລວມທັງໃນຄົວເຮືອນ, ພາກທຸລະກິດ ແລະ ໂຄງການພັດທະນາສຳຄັນຕ່າງໆ; ສະພາບການພັດທະນາພະລັງງານໄຟຟ້າ ຢູ່ປະເທດເຮົາ ກໍຄືສະພາບລົງທຶນທີ່ພົ້ນເດັ່ນ ໃນຂະແໜງພະລັງງານ ທັງໂຄງການທີ່ເຮັດໄດ້ດີ ແລະ ໂຄງການທີ່ບໍ່ມີປະສິດທິຜົນ; ສະພາບການຄຸ້ມຄອງ ແລະ ພັດທະນາໂຄງການ ໃນຂະແໜງບໍ່ແຮ່, ລວມທັງ ບັນຫາຄົງຄ້າງ ແລະ ປະກົດການຫຍໍທໍ້ທີ່ເກີດຂຶ້ນໃນຂະແໜງການດັ່ງກ່າວ ທີ່ຈະຕ້ອງໄດ້ສືບຕໍ່ສຸມໃສ່ປັບ ປຸງແກ້ໄຂໂດຍໄວ.

ພ້ອມທັງເນັ້ນໃຫ້ຄະນະພັກ-ຄະນະນໍາ, ພະນັກງານ-ລັດຖະກອນ ທົ່ວຂະແໜງພະລັງງານ ແລະ ບໍ່ແຮ່ ນຳເອົາທິດຊີ້ນຳດັ່ງກ່າວ ໄປຈັດຕັ້ງຜັນຂະຫຍາຍສູ່ວຽກງານຂົງເຂດຄວາມຮັບຜິດຊອບຂອງຕົນໃຫ້ປະກົດຜົນເປັນຈິງ, ເອົາໃຈໃສ່ ຕໍ່ວຽກງານດ້ານອື່ນໆຕື່ມອີກເປັນຕົ້ນ ໃຫ້ທົບທວນຄືນບັນດານະໂຍບາຍ ການສະໜອງໄຟຟ້າໃຫ້ທົ່ວສັງຄົມ ເພື່ອໃຫ້ສອດຄ່ອງ ແລະ ເປັນການປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ກໍຄື ການແກ້ໄຂຄວາມທຸກຍາກ ໃຫ້ດີຂຶ້ນເປັນກ້າວໆ; ສືບຕໍ່ຈັດຕັ້ງຜັນຂະຫຍາຍມະຕິຕົກລົງຂອງລັດຖະບານ ກ່ຽວກັບການສົ່ງເສີມການນໍາໃຊ້ພາຫະນະທີ່ນໍາໃຊ້ພະລັງງານໄຟຟ້າ ທີ່ປະເທດເຮົາມີທ່າແຮງໃຫ້ຫລາຍຂຶ້ນເປັນກ້າວໆ; ສືບຕໍ່ສຸມໃສ່ປະເມີນບັນດາໂຄງການຂຸດຄົ້ນ ແລະ ປຸງແຕ່ງແຮ່ທາດ ຢູ່ບັນດາແຂວງທີ່ຍັງບໍ່ທັນສຳເລັດ; ສືບຕໍ່ຄົ້ນຄວ້າກໍານົດມາດຖານເງື່ອນໄຂໃນການພິຈາລະນາອະນຸຍາດ ບໍລິສັດລົງທຶນພັດທະນາບໍ່ແຮ່ ເປັນຕົ້ນ ເງື່ອນໄຂດ້ານເຕັກນິກ, ດ້ານການເງິນ, ການຖືຄອງບັນຊີເງິນຕາ ໂດຍໃຫ້ຮ່າງເປັນນິຕິກຳສະເພາະ; ສືບຕໍ່ຜັນຂະຫຍາຍ ມະຕິ 25/ກມສພ ຕິດພັນກັບຈັດຕັ້ງປະຕິບັດ ຄຳສັ່ງເລກທີ 34/ນຍ ວ່າດ້ວຍທິດທາງ, ເປົ້າໝາຍ ແລະ ມາດຕະການສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານ ເປັນຫົວໜ່ວຍພັດທະນາ;​​ ຄົ້ນຄວ້າຕີລາຄາ ຄວາມສາມາດຮອງຮັບ ທາງດ້ານນິຕິກຳຄຸ້ມຄອງວຽກງານ, ມີອັນໃດຄວນຜັນຂະຫຍາຍອອກເປັນນິຕິກຳລຸ່ມກົດໝາຍຕື່ມ; ສືບຕໍ່ແບ່ງຂັ້ນຄຸ້ມຄອງວຽກງານ ໃຫ້ລະອຽດຈະແຈ້ງຕາມທິດແບ່ງຄວາມຮັບຜິດຊອບ ມອບໃຫ້ທ້ອງຖິ່ນຫລາຍຂຶ້ນ, ລວມທັງ ການສ້າງບຸກຄະລະກອນ ໃຫ້ມີຄວາມເຂັ້ມແຂງທາງດ້ານເຕັກນິກວິຊາການ ໃຫ້ທ້ອງຖິ່ນ; ສືບຕໍ່ປະຕິບັດວຽກງານຕິດຕາມ, ກວດກາບັນດາໂຄງການ ທີ່ຂະແໜງການຕົນຄຸ້ມຄອງໃຫ້ແຂງແຮງ ແລະ ຕັ້ງໜ້າກວ່າເກົ່າ.