ນະຄອນຫລວງວຽງຈັນ ຫາລືຫລາຍບັນຫາສຳຄັນ ໂດຍສະເພາະໂຄງການພັດທະນາເມືອງທັນສະໄໝ

ກອງປະຊຸມອົງການປົກຄອງນະຄອນຫລວງວຽງຈັນ (ນວ) ຄັ້ງທີ 33 ປະຈຳເດືອນກຸມພາ ຈັດຂຶ້ນວັນທີ 29 ກຸມພາ 2024ນີ້ ໄດ້ທົບທວນ ກວດກາຄືນກ່ຽວກັບການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ໃນໄລຍະ 1 ເດືອນຜ່ານມາ, ປຶກສາຫາລືວຽກສຳຄັນທີ່ປິ່ນອ້ອມຈຳນວນໜຶ່ງ ໂດຍສະເພາະ ບັນຫາຂອງໂລກທີ່ສົ່ງຜົນກະທົບຕໍ່ ສປປ ລາວ ກໍຄື ນະຄອນຫລວງວຽງຈັນ.

ແຕ່ເຖິງຢ່າງໃດກໍຕາມ ພາຍໃຕ້ການນໍາພາ – ຊີ້ນໍາ ຂອງຄະນະພັກອົງການປົກຄອງແຕ່ລະຂັ້ນ ແລະ ການເອົາໃຈໃສ່ເປັນເຈົ້າການຢ່າງແຂງແຮງເຮັດໃຫ້ອົງການປົກຄອງນະຄອນຫລວງສາມາດຕີຖອຍບັນຫາໄດ້ຈຳນວນໜຶ່ງ ແລະ ມີຜົນງານບາງດ້ານເປັນຕົ້ນ: ການດຸ່ນດ່ຽງທາງດ້ານເສດຖະກິດຕໍ່ກັບສັງຄົມ, ການບໍລິການ, ການຜະລິດເປັນສິນຄ້າຮັບໃຊ້ພາຍໃນ ແລະ ສົ່ງອອກຕ່າງປະເທດ, ການຄຸ້ມຄອງສິນຄ້າໃນທ້ອງຕະຫລາດບໍ່ໃຫ້ເໜັງຕີງແຮງເກີນທີ່ນິຕິກຳໄດ້ກຳນົດໄວ້, ການລົງຊຸກຍູ້ສົ່ງເສີມຊາວກະສິກອນ, ຈັດຕັ້ງເປັນກຸມຜະລິດການປູກ, ການລ້ຽງ ເພື່ອແກ້ງແຍ້ງສິນຄ້າບາງຊະນິດທີ່ນຳເຂົ້າຈາກຕ່າງປະເທດ, ສົ່ງເສີມການລ້ຽງສັດ ເພື່ອຕອບສະໜອງຊີ້ນ, ປາ, ໄຂ່ໄກ່ໃນທ້ອງຕະຫລາດໃຫ້ພຽງພໍ, ຫລຸດຜ່ອນການນຳເຂົ້າຈາກຕ່າງປະເທດ ແລະ ການແກ້ໄຂບັນຫາປະກົດການຫຍໍ້ທໍ້ໃນສັງຄົມໃຫ້ຫລຸດລົງເທື່ອລະກ້າວ.

ກອງປະຊຸມຄັ້ງນີ້ໄດ້ປຶກສາຫາລືຫລາຍບັນຫາສຳຄັນໂດຍສະເພາະແມ່ນໂຄງການພັດທະນາເມືອງທັນສະໄໝ, ໂຄງການລົງທຶນທີ່ບໍ່ມີຄວາມຄືບໜ້າໃນການຈັດຕັ້ງປະຕິບັດຜ່ານມາ, ຜົນການລົງເກັບກຳຂໍ້ມູນການນຳໃຊ້ທີ່ດິນ 8 ປະເພດຂອງໂຄງການສຶກສາສຳຫລວດຄວາມເປັນໄປໄດ້ການລົງທຶນພັດທະນາເມືອງທັນສະໄໝ ແລະ ອື່ນໆ.

ຂ່າວ: ວຽງຈັນໃໝ່