ລັດເທັກຊັສ ປະກາດສະຖານະການສຸກເສີນ ຈາກສະພາບໄຟປ່າຮຸນແຮງ

ສຳນັກຂ່າວຕ່າງປະເທດລາຍງານຈາກ ເມືອງຮິວຕັນ ລັດເທັກຊັສ ສະຫະລັດອາເມລິກາ ວັນທີ 29 ກຸມພາ 2024 ວ່າ: ທ່ານເກຣັກ ແອບບອດ ຜູ້ວ່າການ ລັດເທັກຊັສ ໄດ້ປະກາດສະຖານະການສຸກເສີນຢ່າງໜ້ອຍ 60 ເຂດໃນລັດດັ່ງກ່າວ, ເນື່ອງຈາກເກີດໄຟໄໝ້ປ່າຢ່າງຕ່ຳ 25 ຈຸດໃນອາທິດນີ້ ແລະ ມີຄວາມຮຸນແຮງສູງສຸດໃນປະຫວັດສາດຂອງລັດເທັກຊັສ.

ເຖິງແມ່ນເຈົ້າໜ້າທີ່ຈະຄວບຄຸມໄຟໄດ້ແລ້ວ 18 ຈຸດ, ແຕ່ຍັງເຫລືອໄຟປ່າທີ່ລຸກໄໝ້ຢູ່ອີກ 7 ຈຸດ ແລະ ໄຟປ່າຍັງສົ່ງຜົນກະທົບເຖິງໂຮງໄຟຟ້ານິວເຄຍແຫ່ງໜຶ່ງໃນພື້ນທີ່ຕ້ອງຢຸດການເຮັດວຽກຊົ່ວຄາວ, ດ້ານເຈົ້າໜ້າທີ່ປ່າໄມ້ລາຍງານວ່າ: ໄຟປ່າຄັ້ງນີ້ໄດ້ສ້າງຄວາມເສຍຫາຍໃນພື້ນທີ່ໄປແລ້ວຫລາຍກວ່າ 850.000 ເຮັກຕາ.