ຮອງນາຍົກ ເນັ້ນໃຫ້ມີຄວາມພ້ອມຮອບດ້ານເປັນປະທານກອງປະຊຸມລັດຖະມົນຕີ ປ້ອງກັນປະເທດອາຊຽນ-ວົງແຄບ ໃນເດືອນມີນາ 2024
ວັນທີ 21 ກຸມພາ 2024, ກະຊວງປ້ອງກັນປະເທດ ໄດ້ຈັດກອງປະຊຸມລາຍງານການກະກຽມຄວາມພ້ອມ ໃນການເປັນເຈົ້າພາບ ແລະ ປະທານກອງປະຊຸມ ລັດຖະມົນຕີປ້ອງກັນປະເທດອາຊຽນ-ວົງແຄບ ທີ່ຈະຈັດຂຶ້ນຢູ່ນະຄອນຫລວງພະບາງ ໃນເດືອນມີນາ 2024 ນີ້, ມີພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດເປັນປະທານ.
ກອງປະຊຸມໄດ້ຟັງ ລາຍງານຄວາມພ້ອມດ້ານວຽກງານເນື້ອໃນ ແລະ ເອກະ ສານຕ່າງໆ ຂອງກອງປະຊຸມ ລັດຖະມົນຕີປ້ອງກັນປະເທດອາຊຽນ-ວົງແຄບ ຈາກ ພົນຕີ ສາຍໃຈ ກົມມະສິດ ຫົວໜ້າຫ້ອງການ ກະຊວງປ້ອງກັນປະເທດ, ທັງເປັນຫົວໜ້າເຈົ້າໜ້າທີ່ອາວຸໂສປ້ອງກັນປະເທດອາຊຽນ ຂອງລາວ.
ໂອກາດນີ້, ພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດເປັນປະທານໄດ້ເນັ້ນໃຫ້ອະນຸກໍາມະການແຕ່ລະພາກສ່ວນ ເອົາໃຈໃສ່ໃນການກະກຽມຄວາມພ້ອມຮອບດ້ານໃຫ້ແກ່ການຈັດກອງປະຊຸມ, ເຮັດໃຫ້ກອງປະຊຸມ ສໍາເລັດຕາມແຜນການທີ່ວາງໄວ້ ແລະ ຮັບປະກັນຄວາມສະຫງົບປອດໄພ 100%.
