ລາວ-ຫວຽດນາມເພີ່ມທະວີການຮ່ວມມືວຽກງານພາຍໃນ

ເມື່ອບໍ່ດົນມານີ້, ທ່ານ ຄຳໝັ້ນ ສູນວິເລີດ ລັດຖະມົນຕີກະຊວງພາຍໃນຂອງລາວພ້ອມຄະນະ, ໄດ້ເຄື່ອນໄຫວຢ້ຽມຢາມ ແລະ ເຮັດວຽກຮ່ວມກັບຄະນະນໍາກະຊວງພາຍໃນ ສສ.ຫວຽດນາມ ແລະ ໃນໂອກາດດັ່ງກ່າວ, ຄະນະຜູ້ແທນລາວໄດ້ເຂົ້າຢ້ຽມຂໍ່ານັບທ່ານ ຫງວຽນຊວນຟຸກ ນາຍົກລັດຖະມົນຕີ ຫວຽດນາມ, ໂດຍທ່ານໄດ້ຕີລາຄາສູງຕໍ່ການມາຢ້ຽມຢາມ ແລະ ເຮັດວຽກຢູ່ຫວຽດນາມຂອງຄະນະຜູ້ແທນລາວຄັ້ງນີ້, ອັນໄດ້ປະກອບສ່ວນເຂົ້າໃນການຮັດແໜ້ນຄວາມສາມັກຄີ ແລະ ເສີມຂະຫຍາຍສາຍພົວພັນມິດຕະພາບພິເສດລະຫວ່າງສອງພັກ, ສອງລັດ ແລະ ປະຊາຊົນສອງຊາດລາວ-ຫວຽດນາມໃຫ້ແໜ້ນແຟ້ນຍິ່ງໆຂຶ້ນ.

ໃນໂອກາດພົບປະສອງຝ່າຍລະຫວ່າງທ່ານລັດຖະມົນຕີກະຊວງພາຍໃນລາວ ແລະ ຫວຽດນາມ ທ່ານ ເລວິງເຕີນ ລັດຖະມົນຕີກະຊວງພາຍໃນຫວຽດນາມ ໄດ້ທົບທວນຄືນການຮ່ວມມືໃນໄລຍະຜ່ານມາ, ພ້ອມທັງປຶກສາຫາລືການຮ່ວມມືໃນຕໍ່ໜ້າໃຫ້ແຂງແຮງກວ່າເກົ່າ, ໂດຍສະເພາະການແລກປ່ຽນບົດຮຽນວຽກງານສຳເນົາ ແລະ ເກັບມ້ຽນເອກະສານແຫ່ງລັດ, ສູນກາງພັກ, ສູນເກັບມ້ຽນເອກະສານແຫ່ງຊາດ ແລະ ວຽກງານອື່ນໆໃຫ້ດີຂຶ້ນກວ່າເກົ່າ. ໃນໂອກາດນີ້, ທ່ານ ຄໍາໝັ້ນ ສູນວິເລີດ ໄດ້ຕາງໜ້າພັກ ແລະ ລັດຖະບານລາວປະດັບຫລຽນໄຊອິດສະຫລະຊັ້ນ II ໃຫ້ທ່ານ ເລວິງເຕິນ ລັດຖະມົນຕີກະຊວງພາຍໃນ ສສ.ຫວຽດນາມ ແລະ ຂະນະດຽວກັນ, ຝ່າຍຫວຽດນາມ ກໍໄດ້ປະດັບຫລຽນໄຊອິດສະຫລະຊັ້ນ III ໃຫ້ບັນດາຮອງລັດຖະມົນຕີກະຊວງພາຍໃນລາວ ແລະ ປະດັບຫລຽນໄຊແຮງງານຊັ້ນ I ໃຫ້ຮອງ ຫົວໜ້າຄະນະແຂ່ງຂັນ-ຍ້ອງຍໍສູນກາງ, ກົມສຳເນົາ ແລະ ເກັບມ້ຽນເອກະສານແຫ່ງລັດ, ກົມຮ່ວມມືສາກົນ, ມະຫາວິທະຍາໄລພາຍໃນ ແລະ ສະຖາບັນການປົກຄອງຂອງລາວ ທີ່ມີຜົນງານດີເດັ່ນ ແລະ ຄຸນງາມຄວາມດີໃນການປະກອບສ່ວນທາງດ້ານເຫື່ອແຮງ, ສະຕິປັນຍາ ເຂົ້າໃນວຽກງານພາຍໃນ ກໍຄືພາລະກິດປົກປັກຮັກສາ ແລະ ສ້າງສາພັດທະນາຂອງສອງປະເທດ.

+ຕໍາຫລວດລາວ-ຫວຽດນາມ ແລກປ່ຽນບົດຮຽນວຽກງານກວດກາ

+ລາວ-ຫວຽດນາມເພີ່ມທະວີການຮ່ວມມືວຽກງານກະສິກໍາ ແລະ ພັດທະນາຊົນນະບົດ