ຫວຽດນາມເລັ່ງຂະຫຍາຍການຍົກເວັ້ນວີຊາ ຫວັງດຶງດູດນັກທ່ອງທ່ຽວຕ່າງປະເທດເພີ່ມຂຶ້ນ

      ທ່ານ ຟາມ ມິງ ຈິງ ນາຍົກລັດຖະມົນຕີຫວຽດນາມ ສັ່ງໃຫ້ກະຊວງຄວາມໝັ້ນຄົງສາທາລະນະພິຈາລະນາຂະຫຍາຍການຄວບຄຸມຂອງນະໂຍບາຍຍົກເວັ້ນວີຊາພົນລະເມືອງຂອງປະເທດຕ່າງໆເພີ່ມຂຶ້ນ ໂດຍອ້າງອີງສະພາບການໃໝ່ ແລະ ການພົວພັນຂອງຫວຽດນາມກັບປະເທດເຫລົ່ານັ້ນ.

     ຂະນະດຽວກັນ, ກະຊວງການຕ່າງປະເທດຂອງຫວຽດນາມໄດ້ຮັບຄໍາສັ່ງໃຫ້ປະສານງານກັບກະຊວງຄວາມໝັ້ນຄົງສາທາລະນະ ເພື່ອນໍາສະເໜີປະເທດອື່ນໆເຂົ້າສູ່ບັນຊີລາຍຊື່ປະເທດທີ່ໄດ້ຮັບການຍົກເວັ້ນວີຊາພຽງຝ່າຍດຽວຂອງຫວຽດນາມ.

      ປັດຈຸບັນມີພົນລະເມືອງຂອງ 25 ປະເທດ ຈັດຢູ່ໃນບັນຊີລາຍຊື່ເບື້ອງຕົ້ນ ເຊິ່ງມີ 13 ປະເທດທີ່ໄດ້ຮັບການຍົກເວັ້ນວີຊາພຽງຝ່າຍດຽວ.

     ຫວຽດນາມດໍາເນີນການອອກວີຊາເອເລັກໂຕຣນິກຕໍ່ຊາວຕ່າງປະເທດທັງໝົດ ແລະ ຂະຫຍາຍໄລຍະເວລາການອາໄສຢູ່ຊົ່ວຄາວຈາກ 30 ເປັນ 90 ວັນ ໂດຍບໍ່ຈໍາກັດການເດີນທາງເຂົ້າ-ອອກ ນັບແຕ່ກາງເດືອນສິງຫາ 2023 ເປັນຕົ້ນມາ.

     ນອກຈາກນັ້ນ ໄລຍະເວລາການອາໄສຢູ່ຊົ່ວຄາວຂອງຊາວຕ່າງປະເທດທີ່ເດີນທາງເຂົ້າຫວຽດນາມພາຍໃຕ້ການຍົກເວັ້ນວີຊາພຽງຝ່າຍດຽວເພີ່ມຂຶ້ນເປັນ 45 ວັນ.

     ຂໍ້ມູນຈາກສໍານັກງານສະຖິຕິທົ່ວໄປຂອງຫວຽດນາມລະບຸວ່າ: ຈໍານວນນັກທ່ອງທ່ຽວຊາວຕ່າງປະເທດທີ່ຢ້ຽມຢາມຫວຽດນາມໃນປີ 2023 ສູງເຖິງ 12,6 ລ້ານຄົນ ເຊິ່ງສູງເກີນເປົ້າໝາຍ 8 ລ້ານຄົນ ໂດຍຫວຽດນາມຕັ້ງເປົ້າຮັບຮອງນັກທ່ອງທ່ຽວຊາວຕ່າງປະເທດໃນປີ 2024 ປະມານ 17-18 ລ້ານຄົນ.