ລາວ-ໄທແລກປ່ຽນວຽກງານກວດກາຄົນເຂົ້າ-ອອກເມືອງ ຕ້ານ ແລະ ສະກັດກັ້ນການລັກລອບຂົນສົ່ງແຮງງານແບບຜິດກົດໝາຍ

ກອງປະຊຸມໜ່ວຍງານປະຈຳພື້ນທີ່ຊາຍແດນລາວ-ໄທ (ນະຄອນຫຼວງວຽງຈັນ-ຈັງຫວັດໜອງຄາຍ) ຄັ້ງທີ 11 ຈັດຂຶ້ນວັນທີ 16 ກຸມພາ 2024, ຝ່າຍລາວນໍາໂດຍ ພັນເອກ ບຸນວານ ພົມມະວົງ ຫົວໜ້າການທະຫານກອງບັນຊາການທະຫານນະຄອນຫຼວງວຽງຈັນ ແລະ ຝ່າຍໄທນໍາໂດຍ ພັນເອກ ຈັກກະພົງ ໂພນາແຄ ຜູ້ບັງຄັບການກອງບັງຄັບການຄວບຄຸມທີ 2 ຜູ້ແທນຜູ້ບັນຊາການກອງກໍາລັງສຸລະສັກມົນຕີ ຫົວໜ້າຊຸດປະສານງານປະຈໍາພື້ນທີ່ຊາຍແດນຈັງຫວັດໜອງຄາຍ.

ໂອກາດນີ້ສອງຝ່າຍໄດ້ຜັດປ່ຽນລາຍງາຍການເຄື່ອນໄຫວ ພ້ອມທັງໄດ້ສະເໜີແລກປ່ຽນຄໍາຄິດຄໍາເຫັນຫຼາຍບັນຫາທີ່ສຳຄັນເປັນຕົ້ນໃນຂົງເຂດວຽກງານການກວດກາຄົນເຂົ້າ-ອອກເມືອງຜິດກົດໝາຍໃຫ້ຖືກຕ້ອງຕາມລະບຽບກົດໝາຍຂອງສອງປະເທດ ພ້ອມກັນນັ້ນໄດ້ປະສານສົມທົບແໜ້ນລະຫວ່າງສອງຝ່າຍແຕ່ລະຂັ້ນໃນການລົງກວດກາພື້ນທີ່ມີບັນຫາເພື່ອພ້ອມກັນແກ້ໄຂ ແລະ ສະເໜີໃຫ້ຂັ້ນເທິງພິຈາລະນາເພື່ອເຮັດໃຫ້ບໍລິເວນຊາຍແດນ ຕາມຂອບເຂດຮັບຜິດຊອບໃຫ້ມີຄວາມສະຫງົບປອດໄພ ເປັນລະບຽບຮຽບຮ້ອຍ ຈາກນັ້ນສອງຝ່າຍຍັງໄດ້ເຫັນດີເປັນເອກະພາບກັນຈະສືບຕໍ່ຜັດປ່ຽນກັນແລກປ່ຽນບົດຮຽນ ເພື່ອສົ່ງເສີມການຮ່ວມມື ແລະ ຮັກສາຄວາມສະຫງົບຕາມບໍລິເວນຊາຍແດນລາວ-ໄທໃຫ້ມີຄວາມເປັນລະບຽບຮຽບຮ້ອຍເປັນຢ່າງດີ ສືບຕໍ່ສ້າງສາຍພົວພັນການຮ່ວມມືທີ່ດີຕໍ່ກັນ ເປັນຕົ້ນສືບຕໍ່ການແລກປ່ຽນຢ້ຽມຢາມທັດສະນະສຶກສາລະຫວ່າງສອງກອງທັບລາວ-ໄທໃຫ້ເປັນປົກກະຕິຕໍ່ເນື່ອງ

ເອົາໃຈໃສ່ການຮ່ວມມືຢ່າງຈິງຈັງໃນການແກ້ໄຂບັນຫາຕ່າງໆທີ່ອາດຈະເກີດຂຶ້ນຕ້ານ ແລະ ສະກັດກັ້ນການລັກລອບການຂົນສົ່ງແຮງງານແບບຜິດກົດໝາຍການຄ້າມະນຸດ ບັນຫາຢາເສບຕິດ ການຄ້າຂາຍເຖື່ອນ ແລະ ສິ່ງທີ່ຜິດກົດໝາຍອື່ນໆ ເພື່ອຄຸ້ມຄອງ ແລະ ປ້ອງກັນບໍລິເວນຊາຍແດນລະຫວ່າງສອງປະເທດໃຫ້ມີຄວາມສະຫງົບໂດຍພື້ນຖານ.