ກຸ່ມບັນເທົາທຸກຂໍລະດົມເງິນ 434 ລ້ານໂດລາ ກູ້ວິກິດຊາວໂຣຮິງຢາໄລຍະ 6 ເດືອນນີ້
ອົງການດ້ານມະນຸດສະທຳທີ່ຊ່ວຍເຫລືອຜູ້ອົບພະຍົບຊາວໂຣຣິງຢາຢູ່ບັງກະລາເທດຖະແຫລງວ່າ: ຈຳເປັນຕ້ອງໄດ້ຮັບການຈັດສັນເງິນ 434 ລ້ານໂດລາສະຫະລັດ ໃນໄລຍະ 6 ເດືອນຕໍ່ຈາກນີ້ ເພື່ອຊ່ວຍເຫລືອຜູ້ອົບພະຍົບເຖິງ 1.200.000 ຄົນ ສ່ວນຫລາຍເປັນເດັກນ້ອຍ.
ຄາດວ່າມີຊາວໂຣຮິງຢາປະມານ 809.000 ຄົນມາລີ້ໄພຢູ່ບັງກະລາເທດ ພາຍຫລັງອົບພະຍົບໜີຄວາມຮຸນແຮງ ແລະ ການສູ້ຮົບຢູ່ມຽນມາ ໂດຍມີຈຳນວນກວ່າເຄິ່ງລ້ານຄົນທີ່ເດີນທາງເຂົ້າມາແຕ່ວັນທີ 25 ສິງຫາ ທັງທີ່ມີຊາວໂຣຮິງຢາ 300.000 ຄົນລີ້ໄພຢູ່ບັງກະລາເທດແລ້ວ. ຖະແຫລງການລະບຸວ່າ: ປະຊາກອນໂຣຮິງຢາຢູ່ເມືອງດອກບາຊາຣສ່ຽງອັນຕະລາຍ, ຫລາຍຄົນມີບາດແຜທາງຈິດໃຈ ແລະ ຕ້ອງມາອາໄສຢູ່ໃນສະພາບບໍ່ດີ. ບັງກະລາເທດ ແລະ ອົງການບັນເທົາທຸກພວມປະສົບບັນຫາໃນການຊ່ວຍເຫລືອຊາວມຸດສະລິມໂຣຮິງຢາ 509.000 ຄົນທີ່ເດີນທາງເຂົ້າບັງກະລາເທດ.
