ອົດສະຕຣາລີຈະສ້າງໂຮງໄຟຟ້າພະລັງງານແສງຕາເວັນໃຫຍ່ທີ່ສຸດໃນໂລກ

     ສຳນັກຂ່າວຊິນຮົວຂອງທາງການຈີນເປີດເຜີຍວ່າ: ບໍລິສັດຢູ່ອົດສະຕຣາລີເປີດເຜີຍແຜນກໍ່ສ້າງໂຮງໄຟຟ້າພະ ລັງງານແສງຕາເວັນໃຫຍ່ທີ່ສຸດໃນໂລກ ເພື່ອແກ້ໄຂບັນຫາກະແສໄຟຟ້າມອດເລື້ອຍໆທາງຕອນໃຕ້ຂອງປະເທດ.

ກຸ່ມບໍລິສັດ ລີອອນ ປະກາດແຜນກໍ່ສ້າງໂຮງໄຟຟ້າພະລັງງານແສງຕາເວັນໃຫຍ່ທີ່ສຸດໃນໂລກ ຢູ່ລັດເຊົາອົດສະ ຕຣາລີ ຄິດເປັນມູນຄ່າ 1 ລ້ານໂດລາອົດສະຕຣາລີ ໂດຍໂຄງການດັ່ງກ່າວຈະມີການຈ້າງພະນັກງານ 270 ຄົນ ເຂົ້າ ມາຊ່ວຍໃນການກໍ່ສ້າງ ລວມທັງຊ່ວຍເບິ່ງແຍງຮັກສາແຜງໂຊລາເຊວ 3,4 ລ້ານແຜງ ແລະ ແບັກເຕີລີກັກເກັບ ພະລັງງານ 1,1 ລ້ານລູກ. ທ່ານ ເດວິດ ກຣີນ ຈາກກຸ່ມບໍລິສັດ ລີອອນ ກ່າວວ່າ: ບໍລິສັດຈະໃຊ້ວິທີການລະດົມທຶນ ຜ່ານການຂາຍຫຸ້ນ ເພື່ອໃຊ້ໃນການກໍ່ສ້າງທັງໝົດ ໂດຍໂຮງງານໄຟຟ້າແສງຕາເວັນຈະມີກຳລັງການຜະລິດ 330 ເມກາວັດ. ເຖິງຢ່າງໃດກໍດີ, ຜູ້ຊ່ຽວຊານບາງຄົນຕັ້ງຄຳຖາມວ່າ: ການລົງທຶນເປັນຈຳ ນວນເງິນມະຫາສານໃນເທື່ອ ນີ້ຈະຊ່ວຍແກ້ໄຂບັນຫາໄຟຟ້າມອດໄດ້ແທ້ ຫລື ບໍ່ ?.

ລັດເຊົາອົດສະຕຣາລີຜະເຊີນເຫດການກະແສໄຟຟ້າມອດມາແລ້ວຢ່າງໜ້ອຍ 4 ເທື່ອພາຍ ໃນ 6 ເດືອນ ຜ່ານມາ ໂດຍໃນແຕ່ລະເທື່ອເຮັດໃຫ້ປະຊາຊົນຫລາຍແສນຄອບຄົວເດືອດຮ້ອນ ເພາະບໍ່ມີໄຟຟ້າໃຊ້ທ່າມກາງອາ ກາດຮ້ອນ ເຊິ່ງມີອຸນຫະພູມສູງກວ່າ 40 ອົງສາ. ນະໂຍບາຍອາໄສພະລັງງານໝູນວຽນຂອງທາງການຖືກລະບຸວ່າ: ເປັນສາເຫດເຮັດໃຫ້ເກີດວິກິດຄວາມໝັ້ນຄົງດ້ານພະລັງງານ ພ້ອມມີການຮຽກຮ້ອງໃຫ້ທາງການລົງທຶນກໍ່ສ້າງ ໂຮງໄຟຟ້າຖ່ານຫີນເພີ່ມ ຫລາຍຂຶ້ນ.