ລັດຖະບານອັງກິດ ໃຫ້ການສະໜັບສະໜູນ ໂຄງການເກັບກູ້ລະເບີດບໍ່ທັນແຕກຢູ່ແຂວງຄຳມ່ວນ ໄລຍະ 5 ມູນຄ່າ 1,2 ລ້ານກວ່າໂດລາສະຫະລັດ
ວັນທີ 14 ກຸມພາ 2024 ນີ້ ຕາງໜ້າລັດຖະບານອັງກິດ ລົງນາມບົດບັນທຶກຄວາມເຂົ້າໃຈ ໃຫ້ສະໜັບສະໜູນສຳລັບໂຄງການກວດກູ້ລະເບີດບໍ່ທັນແຕກທີ່ຕົກຄ້າງ ຢູ່ແຂວງຄໍາມ່ວນ ໄລຍະ VI ລະຫວ່າງ ທ່ານ Cashel Gleeson ຮອງເອກອັກຄະລັດຖະທູດແຫ່ງຣາຊະອານາຈັກອັງກິດ ປະຈໍາ ລາວ ກັບ ທ່ານ ໂຈມແຍງ ແພງທອງສະຫວັດ ຫົວໜ້າຫ້ອງການຄະນະກໍາມະການຄຸ້ມຄອງແຫ່ງຊາດ ເພື່ອແກ້ໄຂບັນ ຫາລະ ເບີດບໍ່ທັນແຕກທີ່ຕົກຄ້າງຢູ່ ສປປ ລາວ (ຄຊກລ) ໂດຍການເຂົ້າຮ່ວມ ແລະ ທ່ານ Eli Mechanic ຫົວ ໜ້າອົງການເກັບກູ້ລະເບີດແມັກ ປະຈຳ ສປປ ລາວ , ທ່ານນາງ ແກ້ວໃສສີ ປາດຖະໜາ ຮອງຫົວໜ້າພະແນກການຕ່າງປະເທດ ແຂວງຄໍາມ່ວນ ພ້ອມດ້ວຍພາກສ່ວນກ່ຽວຂ້ອງອື່ນໆ.
ການສະໜັບສະໜູນຄັ້ງນີ້ແມ່ນໄດ້ ຈາກກະຊວງການຕ່າງປະເທດ ແລະ ການພັດທະນາ ແຫ່ງຣາຊະອານາຈັກ ອັງກິດ (FCDO) ໃນມູນຄ່າ 1.212.841 ໂດລາສະຫະລັດ, ໄລຍະຈັດຕັ້ງປະຕິບັດແຕ່ມື້ໄດ້ຮັບອະນຸມັດ ຈົນເຖິງວັນທີ 31 ມີນາ 2025 ປະກອບມີ 5 ກິດຈະກໍາຫຼັກ ຄື: ໂຄສະນາສຶກສາຄວາມສ່ຽງໄພຈາກລະເບີດບໍ່ທັນແຕກ, ສໍາຫຼວດທາງດ້ານວິຊາການກວດກູ້ລະເບີດບໍ່ທັນແຕ, ທໍາລາຍລະເບີດເຄື່ອນທີ່ ແລະ ສ້າງຂີດຄວາມສາມາດໃຫ້ຄະນະກໍາມະການຄຸ້ມຄອງການຈັດຕັ້ງປະຕິບັດໂຄງການຂັ້ນທ້ອງຖິ່ນ.
ນັບແຕ່ແຕ່ປີ 2019 ຮອດປີ 2023 ເປັນຕົ້ນມາ ທີ່ ລັດຖະບານອັງກິດ ໃຫ້ສະໜັບສະໜູນໂຄງການ ກວດກູ້ລະເບີດບໍ່ທັນແຕກທີ່ຕົກຄ້າງ ຢູ່ແຂວງຄໍາມ່ວນ ຄຳມ່ວນ ມີຜົນສຳເລັດ ຄື: ວຽກງານໂຄສະນາສຶກສາຄວາມສ່ຽງໄພໄດ້ສໍາເລັດການລົງໂຄສະນາໃນ 100 ເທື່ອບ້ານ (ຈຳນວນ 585 ຄັ້ງ), ສໍາຫຼວດແບບບໍ່ແມ່ນວິຊາການ ສໍາເລັດຈໍານວນ 78 ບ້ານ ຈຳນວນ 78 ສະໜາມ, ພົບຈຸດຫຼັກຖານ 96 ຈຸດ ພົບເຫັນ ແລະ ທໍາລາຍລະເບີດລູກຫວ່ານໄດ້ 1.838 ໜ່ວຍ, ສໍາຫຼວດແບບວິຊາການ 105 ເຮັກຕາ, ກວດກູ້ລະເບີດບໍ່ທັນແຕກອອກຈາກພື້ນທີ່ໄດ້ 1.243 ເຮັກຕາ, ທໍາລາຍລະເບີດເຄື່ອນທີ່ໄດ້ 1.480 ຄັ້ງ, ທໍາລາຍລະເບີດໄດ້ 2.395 ໜ່ວຍ, ໃນນີ້ເປັນລະເບີດລູກຫວ່ານ 1.919 ໜ່ວຍ.
ປີ 2023 ທີ່ຜ່ານມາ ສໍາເລັດ ວຽກງານໂຄສະນາສຶກສາຄວາມສ່ຽງໄພ ສຳເລັດໃນຈຳນວນ 8 ບ້ານ ວຽກງານການສຳຫຼວດແບບວິຊາການ ສຳເລັດ 105,44 ເຮັກຕາ ກຳນົດເປັນທີ່ອັນຕະລາຍມີລະເບີດຕົກຄ້າງ (CHA) 73,28 ເຮັກຕາວຽກງານການກວດກູ້ລະເບີດ ອອກຈາກພື້ນທີ່ດິນ ສຳເລັດ 126,93 ເຮັກຕາ ວຽກງານການທຳລາຍລະເບີດແບບເຄື່ອນທີ່ໄດ້ 1.023 ຄັ້ງ ໃນ 27 ບ້ານ.
