ຍິງອາຍຸ 38 ປີ ເປັນພະຍາດເລືອດຈາງ, ມີເກັດເລືອດຕ່ຳ ຫລັງກວດພົບເປັນມະເຮັງຊະນິດຫາຍາກ ອາດເກີດຂຶ້ນ 1 ໃນລ້ານຄົນ
ສຳນັກຂ່າວຊ່ອງ 7 ໄທ ລາຍງານ ວັນທີ 15 ກຸມພາ 2024ວ່າ: ທ່ານໝໍ ມະນູນ ລີຊະເວັງວົງ ແພດສະເພາະດ້ານ ພະຍາດລະບົບ ຫາຍໃຈ ໂຮງໝໍ ວິໄຊຍຸທອນ ປະເທດໄທ ໄດ້ອອກມາໂພສຮູບພາບ ພ້ອມຂໍ້ຄວາມວ່າ: ມີຍິງຄົນນຶ່ງ ອາຍຸ 38 ປີ ເປັນພະຍາດເລືອດຈາງ ແລະ ເກັດເລືອດຕ່ຳມາ 6 ປີກວ່າ ແລ້ວ ໂດຍທີ່ບໍ່ໄດ້ກິນຢາເປັນປະຈຳ, ບໍ່ກິນເຫຼົ້າ – ບໍ່ສູບຢາ, ບໍ່ມີອາການໄຂ້, ບໍ່ເປັນໄອ, ບໍ່ເມື່ອຍ ແລະ ນ້ຳໜັກປົກກະຕິ ແຕ່ຜົນກວດຮ່າງກາຍປະຈຳປີ ພົບເຫັນຈຸດນ້ອຍໆ ຈຳນວນຫລາຍແພ່ກະຈາຍທົ່ວປອດທັງ 2 ຂ້າງ.
ສ່ວນການກວດຮ່າງກາຍ, ປອດ, ລະດັບອອກຊີແຊນໃນເລືອດແມ່ນປົກກະຕິດີ, ກວດເລືອດ ມີເມັດເລືອດແດງ ແລະ ເກັດເລືອດຕ່ຳເລັກໜ້ອຍ, ຄ່າຕັບ ແລະ ໝາກໄຂ່ຫຼັງຍັງປົກກະຕິ, ຄ່າມະເຮັງ ທຸກໂຕປົກກະຕິ ແຕ່ເມື່ອໃຊ້ຄອມພິວເຕີກວດ ປອດ ແລະ ຊ່ອງທ້ອງ ພົບຈຸດນ້ອຍໆ ຂະໜາດ 0.8 ຊັງຕີແມັດ ແພ່ກະຈາຍໄປທົ່ວປອດ ແລະ ມີກ້ອນຂະໜາດ 3.4 ຊັງຕີແມັດໃນຕັບ,
ທາງດ້ານແພດໄດ້ເຈາະເອົາຊິ້ນສ່ວນໃນຕັບມາປູກເຊື້ອ ແຕ່ບໍ່ພົບເຊື້ອລາ ແລະ ເຊື້ອວັນນະໂຣກ ແລະໄດ້ສົ່ງຊິ້ນສ່ວນດັ່ງກາວ ໄປກວດຢູ່ພະແນກ ພະຍາດວິທະຍາ ແລະ ໄດ້ພົບ Epithelioid hemangioendothelioma ເຊິ່ງເຫັນວ່າເປັນເນື້ອງອກ ຈັດເປັນມະເຮັງທີ່ຫາຍາກຂອງເຊວຢູ່ດ້ານໃນຂອງຫລອດເລືອດ ແລະ ພົບໜ້ອຍທີ່ສຸດ ອາດເກີດກັບຄົນ 1 ໃນລ້ານ.
