ເຊັນບົດບັນທຶກປະສານງານ ລະຫວ່າງ ອົງການກວດກາແຫ່ງລັດ ແລະ ອົງການກວດສອບແຫ່ງລັດ

ວັນທີ 14 ກຸມພາ 2024, ອົງການກວດສອບແຫ່ງລັດ ຈັດພິທີເຊັນບົດບັນທຶກການປະສານງານ ລະຫວ່າງ ອົງການກວດກາແຫ່ງລັດ ເຊັນໂດຍ ທ່ານ ສຸກຄຳເພັດ ເຮືອງບຸດສີ ຮອງປະທານຄະນະກວດກາສູນກາງພັກ ແລະ ອົງການກວດສອບແຫ່ງລັດ ເຊັນໂດຍ ທ່ານ ເຄນ ລໍວັນໄຊ ຮອງປະທານອົງການກວດສອບແຫ່ງລັດ.

ການປັບປຸງບົດບັນທຶກການປະສານງານ ລະຫວ່າງ ອົງການກວດກາແຫ່ງລັດ ແລະ ອົງການກວດສອບແຫ່ງລັດ ແມ່ນອີງໃສ່ການປັບປຸງທີ່ຕັ້ງ ພາລະບົດບາດ ໜ້າທີ່ຂອງອົງການກວດກາແຫ່ງລັດ, ພ້ອມນີ້ກໍເພື່ອຈັດຕັ້ງຜັນຂະຫຍາຍເນື້ອໃນຈິດໃຈມະຕິກອງປະຊຸມໃຫຍ່ຄັ້ງທີ XI ຂອງພັກ ແລະ ມະຕິຂອງສະພາແຫ່ງຊາດ ທີ່ໄດ້ເນັ້ນໜັກໃຫ້ອົງການກວດກາແຫ່ງລັດ ແລະ ອົງການກວດສອບແຫ່ງລັດ ເພີ່ມທະວີການປະຕິບັດພາລະບົດບາດໜ້າທີ່ ໃນການຄົ້ນຄ້ວາ, ພິຈາລະນາ, ວິໄຈບັນຫາ ແລະ ຫາວິທີແກ້ໄຂຜົນຂອງການກວດກາ, ຜົນຂອງການກວດສອບໃຫ້ເປັນປົກກະຕິ, ເຂັ້ມງວດ, ລາຍງານຕໍ່ສະພາແຫ່ງຊາດ, ປະທານປະເທດ ແລະ ນາຍົກລັດຖະມົນຕີ ໃຫ້ທັນກັບສະພາບການ.

ການປັບປຸງບົດບັນທຶກການປະສານງານ ລະຫວ່າງ ສອງອົງການ ໄດ້ດໍາເນີນມາເປັນຄັ້ງທີ 2 ຊຶ່ງໄດ້ປັບປຸງບົດບັນທຶກການປະສານງານອົງການກວດກາລັດຖະບານ ແລະ ອົງການກວດສອບແຫ່ງລັດ (ສະບັບທຳອິດ) ທີ່ໄດ້ລົງນາມເຊັນຮັບຮອງ ໃນປີ 2013 ມາເປັນບົດບັນທຶກປະສານງານ ສະບັບປີ 2015 ສະເພາະຄັ້ງນີ້ແມ່ນບົດບັນທຶກປະສານງານ ລະຫວ່າງ ອົງການກວດກາແຫ່ງລັດ ແລະ ອົງການກວດສອບແຫ່ງລັດ ຊຶ່ງໄດ້ມີການບັບປຸງເພີ່ມເຕີມເນື້ອໃນໃຫ້ຄົບຖ້ວນ ແລະ ຮັດກຸມຂຶ້ນກວ່າເກົ່າ.