ສະເຫລີມສະຫລອງວັນຄູແຫ່ງຊາດ 7 ຕຸລາ
ພິທີສະເຫລີມສະຫລອງວັນຄູແຫ່ງຊາດຄົບຮອບ 23 ປີ (7 ຕຸລາ 1994-7 ຕຸລາ 2017) ໄດ້ຈັດຂຶ້ນໃນວັນທີ 3 ຕຸລານີ້, ທີ່ໂຮງແຮມດອນຈັນພາເລດນະຄອນຫລວງວຽງຈັນ, ໂດຍການເຂົ້າຮ່ວມຂອງທ່ານ ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ, ທ່ານນາງ ແສງເດືອນ ຫຼ້າຈັນທະບູນ ລັດຖະມົນຕີກະຊວງສຶກສາທິການ ແລະ ກິລາ, ມີບັນດາຄູ-ອາຈານ, ພ້ອມດ້ວຍນັກຮຽນ-ນັກສຶກສາເຂົ້າຮ່ວມຈໍານວນຫຼາຍ.
ທ່ານ ຊົມພູ ແກ້ວປັນຍາ ຫົວໜ້າພະແນກສຶກສາທິການ ແລະ ກິລາ ນະຄອນຫຼວງວຽງຈັນ ໄດ້ຂຶ້ນເລົ່າປະຫວັດຂອງນາຍຄູຄໍາ ແລະ ຜົນງານຂອງຂະແໜງສຶກສາທິການໃນໄລຍະຜ່ານມາ, ໂດຍໄດ້ຍົກໃຫ້ເຫັນໄລຍະທີ່ປະເທດເຮົາຕົກເປັນຫົວເມືອງຂຶ້ນຂອງພວກລ່າເມືອງຂຶ້ນໃນຊຸມປີ 1893 ໄລຍະນັ້ນຄົນລາວແມ່ນບໍ່ໄດ້ຮັບການສຶກສາຮໍ່າຮຽນ, ມີສ່ວນໜ້ອຍທີ່ໄດ້ຮຽນ ແລະ ກໍເພື່ອຮັບໃຊ້ໃຫ້ພວກເຂົາ. ເວລານັ້ນ ໄດ້ມີຄົນລາວຊື່ທ້າວຄໍາ ໄດ້ຮຽນຈົບ ປ6 ໃນປີ 1907 ແລະ ໄດ້ຮັບການຝຶກອົບຮົມຄູ, ມາເຖິງວັນທີ 7 ຕຸລາ 1907 ກໍໄດ້ເລີ່ມເຂົ້າເປັນຄູສອນ. ຕະຫຼອດໄລຍະການສິດສອນຢູ່ໃນໂຮງຮຽນນາຍຄູຄໍາໄດ້ສຶກສາອົບຮົມພະສົງ, ນັກຮຽນ ແລະ ປະຊາຊົນລາວທຸກຄົນໃຫ້ມີນໍ້າໃຈຮັກຊາດ, ຄຽດແຄ້ນຕໍ່ຈັກກະພັດຜູ້ຮຸກຮານ. ມາເຖິງປີ 1993 ນາຍຄູຄໍາ ໄດ້ໄປສອນຢູ່ໂຮງຮຽນ ຕາໂຟແຣງ ລວມມີຄູລາວ 3 ຄົນ, ມາຮອດປີ 1920 ຂະບວນການຕໍ່ສູ້ຂອງປະຊາຊົນລາວນໍາໂດຍນາຍຄູຄໍາ ໄດ້ມີຂຶ້ນຢູ່ວຽງຈັນ ແລະ ດໍາເດີນໄປຢ່າງຮຸນແຮງ, ນາຍຄູຄໍາໄດ້ຖືກຝຣັ່ງຈັບ ແລະ ນໍາໂຕໄປຄຸມຂັງ, ພາຍຫຼັງຖືກຄຸມຂັງໄດ້ໄລຍະໜຶ່ງນາຍຄູຄໍາໄດ້ໂຕນອອກຈາກຄຸກແລ້ວຂ້າມນໍ້າຂອງໄປອາໃສຢູ່ນໍາພີ່ນ້ອງ ທີ່ປະເທດໄທ. ເພື່ອລະນຶກເຖິງຄຸນງາມຄວາມດີ ແລະ ມູນເຊື້ອຕໍ່ສູ້ອັນອົງອາດກ້າຫານຂອງປະຊາຊົນ, ພາຍໃຕ້ການນໍາພາຂອງນາຍຄູຄໍານັ້ນ, ພັກ-ລັດຖະບານ ຈຶ່ງໄດ້ກໍານົດເອົາວັນທີ 7 ຕຸລາຂອງທຸກໆປີ ເປັນວັນຄູແຫ່ງຊາດ.
ທ່ານ ຊົມພູ ແກ້ວປັນຍາ ໃຫ້ຮູ້ວ່າ: ມາຮອດປັດຈຸບັນ, ການຂະຫຍາຍຕົວຂອງໂຮງຮຽນທົ່ວນະຄອນຫລວງທັງພາກລັດ ແລະ ເອກະຊົນ ເຫັນວ່າມີຈໍານວນເພີ່ມຂຶ້ນຫລາຍກວ່າ 1.000 ແຫ່ງ, ນັກຮຽນມີຫລາຍກວ່າ 1 ແສນຄົນ. ໃນນັ້ນ, ສາມາດຍາດໄດ້ນັກຮຽນເກັ່ງລະດັບປະເທດຊັ້ນປະຖົມອັນດັບ 1 ວິຊາຄະນິດສາດ ແລະ ພາສາລາວ, ອັນດັບ 2 ວິຊາໂລກອອ້ມຕົວ, ມຕົ້ນອັນດັບ 1 ຍາດໄດ້ 4 ວິຊາ ຄື: ວິຊາຄະນິດສາດ, ພາສາລາວ-ວັນນະຄະດີ, ຟີຊິກສາດ ແລະ ເຄມີສາດ, ຊັ້ນ ມປາຍ ໄດ້ອັນ 2 ໃນ 4 ວິຊາ, ຂະນະດຽວກັນຍັງສ້າງໄດ້ໂຮງຮຽນຂຽວສະອາດຄຸນນະພາບດີ 34 ແຫ່ງ ແລະ ໄດ້ຮັບລາງວັນນິເວດອາຊຽນອີກ 4 ແຫ່ງ ແລະ ໃນສົກຮຽນ 2017-2018 ນີ້, ຈະສູ້ຊົນໃຫ້ອັດຕາການເຂົ້າຮຽນຂອງເດັກອາຍຸ 5 ປີໃຫ້ໄດ້ 95%, ອັດຕາເຂົ້າຮຽນຊັ້ນປະຖົມໃຫ້ບັນລຸ 100% ແລະ ຈະພະຍາຍາມຫລຸດຜ່ອນອັດຕາຄ້າງຫ້ອງປະຖົມໃຫ້ຢູ່ໃນລະດັບ 2% ແລະ ອັດຕາປະລະການຮຽນຊັ້ນປະຖົມໃຫ້ຢູ່ໃນລະດັບ 1%, ມຕົ້ນ 2,80% ແລະ ມປາຍ 2%.
