ເຮັດຫຍັງລົງໄປມັນກໍຄາຢູ່ນໍາບ່ອນມັນຂ້ອງ

​ ​ໂດຍ: ກ້ອງສ່ອງ ອິດ​ສະຫລະ

ໃນອາທິດຜ່ານມາ, ໄດ້ມີຂ່າວຄາວຮືຮາກັນໃນທົ່ວສັງຄົມວ່າ: ບໍລິສັດເອຊຽນເຟດສ໌ ຈໍາກັດ (ASIANFACE CO., LTD) ຕົ້ມສະມາຊິກ (ມວນຊົນ) ຜູ້ຮ່ວມທຶນດ້ວຍກັນ ວ່າຊັ້ນ ! ສ່ວນວ່າຫົວໜ້າບໍລິສັດທີ່ເປັນຄົນຕ່າງຊາດ ກໍຫອບເງິນໄປຕັ້ງວ່າ 15-16 ລ້ານກວ່າໂດລາສະຫະລັດ. ແຫລ່ງຂ່າວຍັງບອກວ່າ ຄົນຕ່າງຊາດຜູ້ນີ້ແມ່ນຄົນກໍາປູ ເຈຍບ້ານໃກ້ເຮືອນຄຽງຂອງລາວເຮົານີ້ເອງ. ບໍລິສັດດັ່ງກ່າວຫາກໍຕັ້ງຂຶ້ນໃນປີ 2015 ຜ່ານມາ, ໃນເບື້ອງຕົ້ນຜູ້ ຂຽນເອງກໍຍັງບໍ່ທັນຮູ້ເລື່ອງລາວປະຫວັດຄວາມເປັນມາຢ່າງລະອຽດກ່ຽວກັບບໍລິສັດນີ້ ຍ້ອນວ່າໃນຜ່ານມາເຮົາເອງ ບໍ່ທັນເຄີຍໄດ້ຍິນ, ບໍ່ເຄີຍເຫັນ ແລະ ບໍ່ທັນຮູ້ຈົນວ່າມີເລື່ອງລາວເກີດຂຶ້ນຈຶ່ງຮູ້ວ່າບໍລິສັດດັ່ງກ່າວເປັນບໍລິສັດທີ່ຫາ ວິທີໂຄສະນາຂົນຂວາຍລັກສະນະຕົວະຍົວະໃຫ້ໝູ່ມາລົງທຶນຮ່ວມກັນ ເມື່ອໄດ້ເງິນຫລາຍ ແລະ ຮູ້ວ່າຕົນເອງຈະໄປ ບໍ່ລອດແລ້ວກໍຫາວິທີເອົາເງິນຈໍານວນມະຫາສານປົບໜີຜ່າຍປະໃຫ້ສະມາຊິກຜູ້ຮ່ວມທຶນທັງຫລາຍພາກັນຄອຍ ເກີ້ເປັນທຸກ ແລະ ອັບປະໂຫຍດ. ແຕ່ເປັນຈັ່ງບຸນປົບໜີບໍ່ພໍຮອດສອງມື້ເຈົ້າໜ້າທີ່ຕໍາຫລວດເມືອງຈັນທະບູລີກໍ ສາມາດຈັບຕົວໄດ້ໃນວັນທີ 31 ມີນາຜ່ານມານີ້ເອງ.

ຕາມເຮົາວ່າ, ການທີ່ຕັ້ງບໍລິສັດເພື່ອຊອກຫາວິທີປຸກລະດົມຂົນຂວາຍຊວນເຊື່ອໃຫ້ໝູ່ມາລົງທຶນໂດຍມີຜົນປະ ໂຫຍດຮ່ວມກັນ ຫລື ໃຫ້ດອກເບ້ຍສູງເກີນຄວາມເປັນຈິງນັ້ນ ມັນເປັນເລື່ອງທີ່ເປັນໄປໄດ້ຍາກ, ຕາມເຮົາວ່າ ບໍ່ໄວ ກໍຊ້າຕ້ອງມີອັນເປັນໄປ. ເປັນຫຍັງຈຶ່ງວ່າແນວນັ້ນ ? ຍ້ອນວ່າມັນຝືນກັບກົດເກນ. ໝາຍເຖິງຝືນກັບລະບຽບກົດ ໝາຍ, ຝືນຕໍ່ແນວທາງ ແລະ ຝືນຕໍ່ຄວາມເປັນຈິງຂອງລາຍຮັບທີ່ເປັນສ່ວນເກີນ. ຕົວຢ່າງ: ທິດກໍ່າເອົາເງິນໄປ ຝາກ ຫລື ໄປຮ່ວມລົງທຶນນໍາ 100 ລ້ານກີບ ໂດຍໃຫ້ດອກເບ້ຍ 10-20% ຕໍ່ເດືອນ ເຮົາວ່າບໍ່ໄວກໍຊ້າບໍລິສັດ ຫລື ວ່າ ສະຫະກອນເຫລົ່ານັ້ນຕ້ອງເຈັ້ງ ແລະ ຕ້ອງມີອັນເປັນໄປໃນທີ່ສຸດ ເພາະໃນຜ່ານມາເຮົາເຄີຍໄດ້ຍິນ ແລະ ເຄີຍ ເຫັນຫລາຍບໍລິສັດ ແລະ ຫລາຍສະຫະກອນໄປບໍ່ເຖິງເປົ້າຈົນວ່າມີບັນຫາກັບສະມາຊິກຜູ້ລົງທຶນຮ່ວມກັນ ເຊັ່ນໃນ ອະດີດຕະການຜ່ານມາຄືສະຫະກອນດ່ານຊ້າງຂອງອ້າຍເຜືອກ, ສຸດທ້າຍມາອ້າຍເຜືອກກໍຕາຍຄາໜີ້ສິນອ້ອມຄໍ ຫອຍ. ຫລັງຕໍ່ມາພັດແມ່ນສະຫະກອນສີວິໄລ ແລະ ມີຕໍ່ໆມາອີກຫລາຍບ່ອນທີ່ມີລັກສະນະຄ້າຍຄືກັນ. ພໍຕົກມາ ຮອດຍຸກກ້າວໜ້າພັດທະນາເຮົາກໍຍິ່ງມີເຖິງຂັ້ນຄົນຕ່າງປະເທດມາລົງທຶນດັ່ງເຮົາເຫັນ ແລະ ຊ່າກັນໃນທຸກວັນນີ້.

ເມື່ອຕັ້ງຄໍາຖາມຂຶ້ນວ່າ, ຖ້າມັນເປັນສະພາບຄືດັ່ງທີ່ວ່ານີ້ ເປັນຫຍັງບໍ່ພາກັນເຂັດຫລາບ ? ຖ້າຈະໃຫ້ທາງ ກ້ອງສ່ອງ ອິດສະຫລະ ຕອບກໍແມ່ນມັນຍັງຄາຢູ່ນໍາບ່ອນມັນຂ້ອງ. ຍ້ອນຫຍັງຈຶ່ງວ່າແນວນັ້ນ ? ຍ້ອນວ່າມັນຍັງມີ  ຜູ້ຢູ່ເບື້ອງຫລັງນັບແຕ່ຜູ້ວິ້ງເຕັ້ນ, ຜູ້ອະນຸຍາດ, ຜູ້ມີອໍານາດພາເຮັດພາໄປແລ້ວກໍໂງ່ມາໃສ່ພວກເຮົາເຈົ້າຂ້ອຍພາ ກັນໂຫ່ເອົາເງິນໄປຝາກຫວັງໄດ້ເງິນເປັນຫາບເປັນຫາມສຸດທ້າຍກໍເລີຍພາກັນຫລ້ອນຕູດ. ນີ້ລະຄືທີ່ຈັ້ງ ແລະ ບ່ອນ ອີງຂອງພວກທີ່ເຮັດທຸລະກິດຫາກິນແບບຕ່ອງໂສ້. ເຮົາຄິດວ່າເວລາໃດພວກເຮົາບໍ່ພາກັນເຂັດຫລາບ, ຍັງມີຜູ້ວິ້ງ ເຕັ້ນ, ມີຜູ້ອະນຸຍາດ ແລະ ມີບຸກຄົນທີ່ມີອໍານາດຢູ່ເບື້ອງຫລັງພາເຮັດພາໄປແລ້ວມັນກໍຍັງຈະມີປາກົດການທີ່ວ່າ ນີ້ຕໍ່ໄປແບບບໍ່ມີມື້ສິ້ນສຸດ.

ເຖິງຢ່າງໃດກໍດີ, ຕາມເຮົາຄິດການເປີດກວ້າງການລົງທຶນໃນການສ້າງສາພັດທະນາປະເທດຊາດທີ່ມີຫລາກ ຫລາຍສີສັນນັ້ນແມ່ນແນວທາງການປ່ຽນແປງໃໝ່ຢ່າງມີຫລັກການຂອງພັກ ແລະ ລັດຖະບານ, ແຕ່ອັນສໍາຄັນ ມັນກໍຂຶ້ນກັບຄົນເຮົາເປັນຜູ້ເຮັດ, ຖ້າອັນໃດເຫັນວ່າບໍ່ສອດຄ່ອງຜິດລະບຽບກົດໝາຍທີ່ຈະເປັນຊ່ອງທາງສ້າງ ຄວາມເສຍຫາຍໃຫ້ປະເທດຊາດບ້ານເມືອງ ແລະ ບຸກຄົນອື່ນແລ້ວເຮົາກໍຄວນພາກັນເຊົາ, ບໍ່ຄວນພາກັນເຮັດ ລາມພະລາມຈົວອີກຕໍ່ໄປ. ອີກດ້ານໜຶ່ງເບື້ອງກົດໝາຍ ແລະ ມະຫາພາກກໍຕ້ອງມີຄວາມເດັດຂາດເຂັ້ມງວດ ກວດຂັນບໍ່ຄວນເຫັນແກ່ເງິນແສນໄຖ່, ບໍ່ຄິດເຫັນໄພ່ແສນເມືອງນັ້ນເຂົາຈະຫາວ່າ ພວກເຮົາພາກັນເຮັດສັບປຸສັບ ປຸ້ຍກາຍເປັນພະຍາດຊຸບເປີ້ປຶກ.