ຕ້ອງເພີ່ມທະວີສາມັກຄີພາຍໃນບ້ານໃຫ້ເປັນປຶກແຜ່ນແໜ້ນໜາ ແລະ ອໍານາດການປົກຄອງບ້ານ ຕ້ອງມີຄວາມເປັນເອກະພາບກັນໃນທຸກວຽກງານ

ວັນທີ 8 ກຸມພາ 2024, ພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ ພ້ອມຄະນະ ລົງເຄື່ອນໄຫວໄດ້ຢ້ຽມຢາມ ແລະ ເຮັດວຽກຢູ່ແຂວງຜົ້ງສາລີ.

ພົນເອກ ຈັນສະໝອນ ຈັນຍາລາດ ໄດ້ພົບປະໂອ້ລົມປະຊາຊົນບ້ານແສນຄໍາ ເມືອງສໍາພັນ ແຂວງຜົ້ງສາລີ ພ້ອມນຳເອົາຄວາມຢື້ຢາມຖາມຂ່າວເຖິງການດໍາລົງຊີວິດການເປັນຢູ່ຂອງປະຊາຊົນ, ທັງໄດ້ເນັ້ນໃຫ້ປະຊາຊົນເອົາໃຈໃສ່ ປັບປຸງທາງດ້ານການເມືອງແນວຄິດ ໃຫ້ມີຄວາມອຸ່ນອຽນທຸ່ນທ່ຽງ, ຍົກສູງຄວາມຮູ້ຄວາມສາມາດໃຫ້ສູງຂຶ້ນ, ບຸກບືນສູ້ຊົນພັດທະນາບ້ານ ໂດຍເລີ່ມຈາກການພັດທະນາຄອບຄົວເປັນພື້ນຖານ, ປະຕິບັດແນວທາງການພັດທະນາເສດຖະກິດ-ສັງຄົມໃຫ້ສອດຄ່ອງ, ເອົາໃຈໃສ່ປູກຝັງ-ລ້ຽງສັດ ໂດຍອີງໃສ່ສະ ພາບຈຸດພິເສດຂອງບ້ານເປັນຫລັກ, ເອົາໃຈໃສ່ທາງດ້ານການຮັກສາສຸຂະພາບ, ສຸຂະອະນາໄມ ຂອງປະຊາຊົນພາຍໃນບ້ານ, ປັບປຸງລະບົບການສຶກສາໃຫ້ດີຂຶ້ນ, ການພັດທະນາຕ້ອງມີການປະສານສົມທົບລະຫວ່າງບ້ານ, ກຸ່ມບ້ານ ແລະ ເມືອງ ແລກປ່ຽນບົດຮຽນເຊິ່ງກັນ ແລະ ກັນ. ພ້ອມນັ້ນ, ກໍຕ້ອງເພີ່ມທະວີຄວາມສາມັກຄີຮັກແພງພາຍໃນຄອບຄົວ, ສາມັກຄີພາຍໃນບ້ານໃຫ້ເປັນປຶກແຜ່ນແໜ້ນໜາ, ອໍານາດການປົກຄອງບ້ານ ຕ້ອງມີຄວາມເປັນເອກະພາບກັນໃນທຸກວຽກງານ. ພ້ອມນີ້, ທ່ານຍັງໄດ້ ເຊື່ອໝັ້ນວ່າ ອໍານາດການປົກຄອງບ້ານ ຈະຊອກທຸກວິທີທາງ ເພື່ອເຮັດໃຫ້ບ້ານໄດ້ຮັບການພັດທະນາເທື່ອລະກ້າວ.

ໂອກາດນີ້, ກະຊວງປ້ອງກັນປະເທດຍັງໄດ້ມອບເງິນ ຈໍານວນ 200 ລ້ານກີບໃຫ້ບ້ານແສນຄໍາ ແລະ ມອບເງິນ 300 ລ້ານກີບໃຫ້ ເມືອງສໍາພັນ ເພື່ອປະກອບສ່ວນເຂົ້າໃນການພັດທະນາ ບ້ານແສນຄໍາ ແລະ ເມືອງສໍາພັນ ໃຫ້ດີຂຶ້ນກວ່າເກົ່າ.

ໃນວັນດຽວກັນ, ລັດຖະມົນຕີກະຊວງປ້ອງກັນປະເທດ ພ້ອມຄະນະ ຍັງໄດ້ຢ້ຽມຊົມໂຄງການກໍ່ສ້າງ ສໍານັກງານກອງບັນຊາການທະຫານແຂວງຜົ້ງສາລີ ເຊິ່ງໂຄງການດັ່ງກ່າວ, ມາຮອດປັດຈຸບັນ ການກໍ່ສ້າງສໍາເລັດແລ້ວ 70%, ຄາດວ່າຈະໃຫ້ສໍາເລັດໃນໄວໆນີ້.