ແຂວງ ເຊກອງ ສາມາດດຶງດູດການລົງທຶນໄດ້ 100 ກວ່າໂຄງການ ມີມູນຄ່າ 4.365 ລ້ານໂດລາ
ວັນທີ 6 ກຸມພາ 2024, ທ່ານ ບົວຈອນ ແກ້ວປະດັບສີ ຮອງຫົວໜ້າພະແນກແຜນການ ແລະ ການລົງທຶນແຂວງເຊກອງ ລາຍງານໃນກອງປະຊຸມສະຫລຸບວຽກງານແຜນການ ແລະ ການລົງທຶນ ປະຈໍາປີ 2023 ແລະ ວາງທິດທາງແຜນການ, ວຽກງານຈຸດສຸມ ປີ 2024 ວ່າ: ໃນໄລຍະຜ່ານມາໄດ້ສ້າງເງື່ອນໄຂອໍານວຍຄວາມສະດວກໃຫ້ແກ່ການລົງທຶນຂອງພາກເອກະຊົນພາຍໃນ ແລະ ຕ່າງປະເທດ, ຊຶ່ງມາຮອດປັດຈຸບັນ ມີການລົງທຶນທັງໝົດ 121 ໂຄງການ, ໃນນີ້ ການລົງທຶນຂອງເອກະຊົນພາຍໃນ 82 ໂຄງການ ແລະ ຕ່າງປະເທດ 39 ໂຄງການ, ຄາດຄະເນມູນຄ່າການລົງທຶນ 4.365 ລ້ານໂດລາ.
ສະເພາະປີ 2023 ຜ່ານມາ ສາມາດດຶງດູດການລົງທຶນໄດ້ 10 ໂຄງການ, ໃນນີ້ ຂັ້ນແຂວງອະນຸມັດ 6 ໂຄງການ ແລະ ຂັ້ນສູນກາງອະນຸມັດ 4 ໂຄງການ, ຄາດຄະເນມູນຄ່າການລົງທຶນ 44 ລ້ານໂດລາ.
ພ້ອມນີ້, ຍັງໄດ້ຢັ້ງຢືນສະໜັບສະໜູນໃຫ້ໂຄງການທີ່ເຊັນສັນຍາກັບແຂວງ ໄປເຊັນສັນຍາຢູ່ສູນກາງຈຳນວນ 8 ໂຄງການ, ສະໜັບສະໜູນໃຫ້ບໍລິສັດ ທີ່ເຊັນສັນຍາພັດທະນາໂຄງການ (PDA) ກັບ ແຂວງ ຍົກກຳລັງຕິດຕັ້ງຈາກຂັ້ນແຂວງຂຶ້ນກັບຂັ້ນສູນກາງ 5 ໂຄງການ ລວມມີໂຄງການກໍ່ສ້າງເຂື່ອນໄຟຟ້າຫ້ວຍກະເຕັນ, ໂຄງການກໍ່ສ້າງເຂື່ອນໄຟຟ້ານ້ຳຕົກຫ້ວຍເປເລ, ໂຄງການກໍ່ສ້າງເຂື່ອນໄຟຟ້າຫ້ວຍລະຊຳ 1, ໂຄງການກໍ່ສ້າງເຂື່ອນໄຟຟ້າຫ້ວຍລະຊຳ 2 ແລະ ໂຄງການກໍ່ສ້າງເຂື່ອນໄຟຟ້າອີເມີນ 6.
