ເຈົ້າໜ້າທີ່ ປກສ ກັກກວດຄົ້ນລົດຈັກຊາຍໜຸ່ມ 2 ຄົນ ພົບຢາບ້າຊຸກເຊື່ອງໃນຊອງຢາສູບ

ວັນທີ 2 ກຸມພາ 2024, ກອງຈະລາຈອນ ພະແນກຕຳຫລວດ ປກສ ເມືອງປາກຊ່ອງ ແຂວງຈຳປາສັກ ສົມທົບກັບ ກອງກໍ່ສ້າງຮາກຖານ ປກສ ແຂວງຈຳປາສັກ ລົງຕັ້ງດ່ານກວດກາພາຫະນະຢູ່ຈຸດອະນຸສາວະລີລາວ-ຫວຽດ ເມືອງປາກຊ່ອງ, ພົບເຫັນລົດຕ້ອງສົງໄສ ເປັນລົດຈັກ ຮອນດ້າ ເວັບ S ສີຂຽວ, ບໍ່ມີປ້າຍທະບຽນ ຜູ້ຂັບຂີ່ເປັນຊາຍ 2 ຄົນຊ້ອນກັນມາ ເຈົ້າໜ້າທີ່ຈຶ່ງໄດ້ກັກລົດ ເພື່ອກວດກາພາຫະນະ, ຜ່ານການກວດກາໃນຕົວຂອງພວກກ່ຽວພົບເຫັນຢາບ້າຊຸກເຊື່ອງໄວ້ໃນຊອງຢາສູບ 30 ເມັດ. ເຈົ້າໜ້າທີ່ຈຶ່ງໄດ້ກັກຕົວທັງ 2 ຄົນ ຄື: ທ້າວ ຮຽງ ອາຍຸ 28 ປີ, ຊາວນາ ສັນຊາດລາວ ແລະ ທ້າວພຽງ ອາຍຸ 18 ປີ ຊາວນາ ສັນຊາດລາວ ທັງສອງຢູ່ບ້ານນາເຊືອກ, ເມືອງໂຂງ, ແຂວງຈຳປາສັກ ມາດຳເນີນຄະດີ ແລະ ເຄື່ອງຂອງຕິດຕົວ ມີ ລົດຈັກ 1 ຄັນ, ໂທລະສັບມືຖື 1ໜວ່ຍ, ເງິນກີບ 950.000ກີບ.

ປັດຈຸບັນຄະດີດັ່ງກ່າວຍັງຢູ່ໃນຂັ້ນຕອນການສືບສວນ-ສອບສວນເພື່ອຊອກຫາຜູ່ຮ່ວມຂະບວນການມາດຳເນີນຄະດີ ຕາມຂັ້ນຕອນກົດໝາຍ.