ລາວ-ຕູຣະເຄຍ ຈະເພີ່ມທະວີ ການຮ່ວມມືດ້ານເສດຖະກິດ-ການຄ້າ ໃຫ້ຫລາຍຂຶ້ນ

ວັນທີ 4-5 ກຸມພາ 2024, ທ່ານ ສະເຫລີມໄຊ ກົມມະສິດ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ພ້ອມຄະນະ ໄດ້ເຄື່ອນໄຫວຢ້ຽມຢາມ ສາທາລະນະລັດ ຕູຣະເຄຍ ຢ່າງເປັນທາງການ, ຕາມການເຊື້ອເຊີນ ຂອງ ທ່ານ ຮາກັນ ຟີດັນ ລັດຖະມົນຕີກະຊວງການຕ່າງປະເທດ ແຫ່ງ ສາທາລະນະລັດ ຕູຣະເຄຍ ເພື່ອສືບຕໍ່ຮັດແໜ້ນ ແລະ ເສີມຂະຫຍາຍການພົວພັນຮ່ວມມືທີ່ມີມາແຕ່ດົນນານ ລະຫວ່າງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ສາທາລະນະລັດ ຕູຣະເຄຍ.

ໂອກາດນີ້, ທ່ານ ສະເຫລີມໄຊ ກົມມະສິດ ແລະ ຄະນະ ໄດ້ພົບປະເຮັດວຽກກັບຄູ່ຮ່ວມຕໍາແໜ່ງ ຈາກ ສາທາລະນະລັດ ຕູຣະເຄຍ, ໂດຍສອງຝ່າຍໄດ້ປຶກສາຫາລືວຽກງານການພົວພັນຮ່ວມມືສອງຝ່າຍ ໃນໄລຍະຜ່ານມາ ແລະ ທິດທາງໃນຕໍ່ໜ້າ, ແລກປ່ຽນຄໍາຄິດເຫັນຕໍ່ບັນຫາສະພາບພາກພື້ນ ແລະ ສາກົນທີ່ສອງຝ່າຍໃຫ້ຄວາມສົນໃຈ, ໄດ້ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືທີ່ມີມາແຕ່ຍາວນານ ລະຫວ່າງ ສປປ ລາວ ແລະ ສາທາລະນະລັດ ຕູຣະເຄຍ ຕະຫລອດໄລຍະ 60 ກວ່າປີ ຜ່ານມາ, ທັງໃນຂອບສອງຝ່າຍ ແລະ ຫລາຍຝ່າຍ; ການພົວພັນຮ່ວມມື ລະຫວ່າງສອງປະເທດ ໄດ້ຮັບການເສີມຂະຫຍາຍຢ່າງຕໍ່ເນື່ອງ ນັບທັງການພົວພັນດ້ານການເມືອງ ກໍຄື ດ້ານເສດຖະກິດ ແລະ ອື່ນໆ ໂດຍສະເພາະ ມີການແລກປ່ຽນການຢ້ຽມຄະນະຜູ້ແທນຂັ້ນສູງ ລະຫວ່າງ ສອງປະເທດ ແລະ ຮ່ວມມືໃນວຽກງານຕ່າງໆ ເຊັ່ນ: ສາທາລະນະສຸກ, ການສຶກສາ, ຕ້ານ ແລະ ຄຸ້ມຄອງໄພພິບັດ, ສົ່ງເສີມຄວາມກ້າວໜ້າຂອງແມ່ຍິງ ແລະ ອື່ນໆ. ໃນຕໍ່ໜ້າ, ສອງຝ່າຍ ຈະໄດ້ເພີ່ມທະວີຊຸກຍູ້ການພົວພັນຮ່ວມມືທາງດ້ານເສດຖະກິດ-ການຄ້າ ໃຫ້ຫລາຍຂຶ້ນຕື່ມ ໂດຍອີງໃສ່ທ່າແຮງຂອງແຕ່ລະປະເທດ.

ທ່ານ ຮອງນາຍົກລັດຖະມົນຕີ ຍັງໄດ້ແຈ້ງການເປັນປະທານ ອາຊຽນຂອງ ສປປ ລາວ ໃນປີ 2024 ໂດຍເນັ້ນການສົ່ງເສີມການເຊື່ອມຕໍ່ພາກພື້ນ ແລະ ສ້າງຄວາມເຂັ້ມແຂງແກ່ອາຊຽນ ແລະ ເສີມຂະຫຍາຍການພົວພັນຮ່ວມມືກັບບັນດາຄູ່ຮ່ວມພັດທະນາຕ່າງໆ, ພ້ອມທັງ ເຊີນຊວນຊາວຕູຣະເຄຍ ໄປທ່ອງທ່ຽວປີທ່ອງທ່ຽວລາວ 2024. ທັງສອງຝ່າຍ ຍັງໄດ້ລົງນາມບົດບັນທຶກຄວາມເຂົ້າໃຈ ກ່ຽວກັບການຮ່ວມມືກັນໃນຕໍ່ໜ້າຕື່ມອີກ.