ຄາລິຟໍເນຍ ປະເຊີນພາຍຸຮຸນແຮງ-ຝົນຕົກໜັກ-ນໍ້າຖ້ວມ ມີຜູ້ເສຍຊີວິດແລ້ວ 3 ຄົນ
ວັນທີ 6 ກຸມພາ 2024, ສໍານັກຂ່າວຕ່າງປະເທດລາຍງານວ່າ: ເກີດເຫດພາຍຸຮຸນແຮງພັດຖະຫລົ່ມລັດຄາລິຟໍເນຍ ປະເທດສະຫະລັດ ອາເມລິກາ ສົ່ງຜົນເຮັດໃຫ້ມີຝົນຕົກໜັກ, ດິນເຈື່ອນ, ນໍ້າຖ້ວມ ແລະ ມີຜູ້ເສຍຊີວິດຢ່າງໜ້ອຍ 3 ຄົນ, ສ່ວນຢູ່ນະຄອນ ລອສແອນເຈລິສ ມີການບັນທຶກປະລິມານນໍ້າຝົນແທກໄດ້ຫລາຍກວ່າ 25 ຊັງຕີແມັດ ໃນເວລາ 24 ຊົ່ວໂມງ.
ນອກຈາກຝົນຕົກຢ່າງໜັກ ເຮັດໃຫ້ເກີດມີນ້ຳຖ້ວມແລະດິນເຈື່ອນທັບຖົມ ສ້າງຄວາມເສຍຫາຍຕໍ່ລົດ ແລະ ເຮືອນປະຊາຊົນຫຼາຍຫຼັງໃນເຂດພື້ນທີ່ ຮອລລີວູດຮິລ ແລະ ເຂດ ເບເວີລີເກຣນ ທີ່ຢູ່ໃກ້ຄຽງ,ສໍານັກງານມອດໄຟນະຄອນ ລອສແອນເຈລິສ ລະບຸວ່າ: ມີການບັນທຶກເຫດນໍ້າຖ້ວມ 130 ຄັ້ງ ແລະ ຕະກອນໄຫລແຮງ 36 ຄັ້ງ ເຊິ່ງມີຄວາມສ່ຽງຈະເກີດເຫດການແບບນີ້ອີກຫລາຍຄັ້ງ ເນື່ອງຈາກປະລິມານນໍ້າຝົນຍັງເພີ່ມຂຶ້ນຢ່າງຕໍ່ເນື່ອງ.
ຂະນະທີ່ນັກພະຍາກອນອາກາດຈາກກົມອຸຕຸນິຍົມວິທະຍາແຫ່ງຊາດອາເມລິກາ (NWS) ຄາດຄະເນວ່າ: ຈະມີຝົນຕົກເພີ່ມອີກ ແລະ ເຕືອນເຖິງນໍ້າຖ້ວມກະທັນຫັນທີ່ເປັນອັນຕະລາຍເຖິງຊີວິດ.
