ເມືອງປາກທາ ແຂວງບໍ່ແກ້ວ ຍັງມີຄອບຄົວທຸກຍາກທັງໝົດ 895 ຄອບຄົວ ຢູ່ໃນ 12 ບ້ານ
ວັນທີ 5 ກຸມພາ 2024, ທ່ານ ສຸໄລ ດວງຜາຄຳ ເຈົ້າເມືອງປາກທາ ແຂວງບໍ່ແກ້ວ ໄດ້ລາຍງານສະພາບການພັດທະນາເສດຖະກິດ-ສັງຄົມຂອງເມືອງ ປີ 2023 ແລະ ທິດທາງແຜນການປີ 2024 ໃຫ້ທ່ານ ສອນໄຊ ສີພັນດອນ, ນາຍົກລັດຖະມົນຕີ ພ້ອມດ້ວຍຄະນະ ຮັບຊາບ ໃນໂອກາດທີ່ທ່ານແລະຄະນະ ໄດ້ເຄື່ອນໄຫວຢ້ຽມຢາມເມືອງປາກທາວ່າ: ປີ2023ຜ່ານມາ ເມືອງປາກທາ ສືບຕໍ່ມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍໂດຍພື້ນຖານ; ເສດຖະກິດ ຂະຫຍາຍຕົວໃນລະດັບ 2,59%, ຈັດເກັບລາຍຮັບເຂົ້າງົບປະມານໄດ້ຫຼາຍກວ່າ 1,36 ຕື້ກີບ, ລື່ນແຜນການປີ113%, ແຜນລາຍຈ່າຍປະຕິບັດໄດ້ 100% ຂອງແຜນການປີ.
ສ່ວນລະບົບສາທາລະນະສຸກ ແລະ ລະບົບໄຟຟ້າ ກວມ 100% ຂອງຈໍານວນບ້ານທັງໝົດ, ອັດຕາການຊົມໃຊ້ນ້ຳສະອາດໃນຄົວເຮືອນກວມ 93,48%, ອັດຕາການຊົມໃຊ້ວິດຖ່າຍໃນຄົວເຮືອນກວມ 95,43%; ທຽບໃສ່ດໍາລັດ 348/ລບ ວ່າດ້ວຍມາດຕະຖານພົ້ນທຸກ ແລະ ມາດຕະຖານການພັດທະນາ ປັດຈຸບັນ ທົ່ວເມືອງ ຍັງມີຄອບຄົວທຸກຍາກທັງໝົດ 895 ຄອບຄົວ, ມີບ້ານທຸກຍາກ 12 ບ້ານ ທີ່ເມືອງຈະສືບຕໍ່ແກ້ໄຂໃຫ້ຫຼຸດລົງເທື່ອລະກ້າວ.
ໂອກາດນີ້, ທ່ານ ນາຍົກລັດຖະມົນຕີ ໄດ້ໃຫ້ທິດຊີ້ນຳຕໍ່ການພັດທະນາເສດຖະກິດ-ສັງຄົມ ຂອງເມືອງ, ພ້ອມທັງມອບງົບປະມານ, ເຄື່ອງນຸ່ງຫົ່ມກັນໜາວ ແລະ ອຸປະກອນກິລາຈຳນວນໜຶ່ງ ໃຫ້ເມືອງປາກທາ ເພື່ອນຳເອົາໄປແຈກຢາຍໃຫ້ປະຊາຊົນຜູ້ທຸກຍາກ ຢູ່ເຂດຫ່າງໄກສອກຫລີກ.
