ນາຍົກ ຊຸກຍູ້ໃຫ້ເມືອງປາກທາ ປະຕິບັດມາດຕະການປະຢັດມັດທະຍັດ ແລະ ຕ້ານການຟູມເຟືອຍ ເປັນຮູບປະທຳຫລາຍກວ່າເກົ່າ

ວັນທີ 5 ກຸມພາ 2024, ທ່ານ ສອນໄຊ ສີພັນດອນ ນາຍົກລັດຖະມົນຕີ ພ້ອມດ້ວຍຄະນະ ໄດ້ເຄື່ອນໄຫວຢ້ຽມຢາມ, ພົບປະໂອ້ລົມ ແລະ ໃຫ້ທິດຊີ້ນຳ ຕໍ່ການພັດທະນາເສດຖະກິດ-ສັງຄົມ ຂອງເມືອງປາກທາ, ແຂວງບໍ່ແກ້ວ. ໂດຍເນັ້ນໃຫ້ອົງການປົກຄອງເມືອງ ສືບຕໍ່ເອົາໃຈໃສ່ຊຸກຍູ້ຢ່າງແຂງແຮງ ໃນການຜະລິດເປັນສິນຄ້າ ເພື່ອຊົມໃຊ້ພາຍໃນ ແລະ ສົ່ງອອກເປັນສິນຄ້າ ຫລຸດຜ່ອນການນຳເຂົ້າສິນຄ້າ ຕິດພັນກັບສົ່ງເສີມການປຸງແຕ່ງເປັນຜະລິດຕະພັນ ເພື່ອສ້າງມູນຄ່າເພີ່ມ; ເພີ່ມທະວີການເກັບລາຍຮັບເຂົ້າງົບປະມານໃຫ້ໄດ້ຕາມແຜນ ຫລື ລື່ນແຜນທີ່ກຳນົດໄວ້ ໄປຄຽງຄູ່ກັບການຫັນວຽກງານດັ່ງກ່າວ ເປັນທັນສະໄໝ.

ພ້ອມນັ້ນໃຫ້ຈັດຕັ້ງປະຕິບັດບັນດາມາດຕະການປະຢັດມັດທະຍັດ ແລະ ຕ້ານການຟູມເຟືອຍ ທີ່ໄດ້ວາງອອກ ໃຫ້ມີການຫັນປ່ຽນຢ່າງເປັນຮູບປະທຳຫລາຍກວ່າເກົ່າ; ສືບຕໍ່ປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ໂດຍສະເພາະ ບັນດາເນື້ອໃນ ທີ່ໄດ້ກຳນົດໄວ້ ໃນວາລະດັ່ງກ່າວ, ລົງເລິກວຽກງານໂຄສະນາເຜີຍແຜ່ຜົນຮ້າຍຂອງຢາເສບຕິດ ຕິດພັນກັບການສຶກສາອົບຮົມການເມືອງແນວຄິດ ຂອງພະນັກງານ, ທະຫານ, ຕຳຫລວດ ແລະ ປະຊາຊົນບັນດາເຜົ່າໃຫ້ຮັບຮູ້ ແລະ ເຂົ້າໃຈຕໍ່ສະພາບຄວາມເປັນຈິງ ໃນການແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນ ຂອງພັກ ແລະ ລັດຖະບານ ກໍຄືອົງການປົກຄອງຂັ້ນຕ່າງໆ; ເອົາໃຈໃສ່ປ້ອງກັນບັນຫາໝອກຄວັນແຕ່ຫົວທີພ້ອມກັນສຸມໃສ່ຈັດຕັ້ງຜັນຂະຫຍາຍ ຄຳສັ່ງ 11/ນຍ ວ່າດ້ວຍການເພີ່ມທະວີຄວາມເຂັ້ມງວດໃນການຄຸ້ມຄອງ, ປົກປັກຮັກສາ, ພັດທະນາ ແລະ ນໍາໃຊ້ ປ່າໄມ້, ທີ່ດິນປ່າໄມ້, ຕ້ານ ແລະ ສະກັດກັ້ນ ການບຸກລຸກທໍາລາຍປ່າໄມ້, ທີ່ດິນປ່າໄມ້ ແລະ ໄຟໄໝ້ລາມປ່າ ໃຫ້ປະກົດຜົນເປັນຈິງ; ປັບປຸງແບບແຜນການດຳລົງຊີວິດ ແລະ ວັດທະນະທຳ ທີ່ມີລັກສະນະກົດໜ່ວງຖ່ວງດຶງການພັດທະນາ ໄປສູ່ແບບແຜນດຳລົງຊີວິດທີ່ກ້າວໜ້າ ແລະ ມີຄຸນນະພາບສູງຂຶ້ນ; ພ້ອມກັນສົ່ງເສີມ ແລະ ຊົມໃຊ້ເງິນກີບ ເພື່ອປະກອບສ່ວນແກ້ໄຂບັນຫາເງິນເຟີ້ ແລະ ອັດຕາແລກປ່ຽນ ໃຫ້ມີຄວາມໝັ້ນທ່ຽງເປັນກ້າວໆ.