ເກີດເຫດໂຈມຕີສະຖານີຕໍາຫລວດຢູ່ປາກິດສະຖານ ມີຜູ້ເສຍຊີວິດຢ່າງໜ້ອຍ 10 ຄົນ
ສໍານັກຂ່າວຮອຍເຕີລາຍງານໃນວັນທີ 5 ກຸມພາວ່າ: ກຸ່ມຕິດອາວຸດໄດ້ກໍ່ເຫດໂຈມຕີສະຖານີຕໍາຫລວດແຫ່ງໜຶ່ງທາງຕາເວັນຕົກສຽງເໜືອຂອງປາກິດສະຖານ ສົ່ງຜົນເຮັດໃຫ້ເຈົ້າໜ້າທີ່ຕໍາຫລວດຢ່າງໜ້ອຍ 10 ຄົນເສຍຊີວິດ ແລະ ອີກ 6 ຄົນໄດ້ຮັບບາດເຈັບ.
ເຈົ້າໜ້າທີ່ຕໍາຫລວດເມືອງດຣາບັນ ແຄວ້ນແຄບາປັດຕູນຄວາ ເປີດເຜີຍວ່າ: ເມື່ອເວລາປະມານ 03:00 ໂມງ ຕາມເວລາທ້ອງຖິ່ນ ກຸ່ມຕິດອາວຸດໄດ້ໂຈມຕີສະຖານີຕໍາຫລວດດ້ວຍປືນສະໄນເປີ ກ່ອນບຸກເຂົ້າສູ່ອາຄານ ຈາກນັ້ນໄດ້ໃຊ້ລະເບີດມື ເຊິ່ງເຮັດໃຫ້ຕໍາຫລວດເສຍຊີວິດຈໍານວນຫລາຍ.
ເຖິງຢ່າງໃດກໍຕາມ, ຍັງບໍ່ມີກຸ່ມຕິດອາວຸດໃດອອກມາອ້າງຄວາມຮັບຜິດຊອບ ແລະ ຍັງບໍ່ແນ່ນອນວ່າການໂຈມຕີດັ່ງກ່າວມີການກ່ຽວຂ້ອງກັບການເລືອກຕັ້ງທີ່ກໍາລັງຈະຈັດຂຶ້ນໃນອາທິດນີ້ ຫລື ບໍ່.
ໃນວັນທີ 31 ມັງກອນ, ຜູ້ສະໝັກຊີງຕໍາແໜ່ງສະພາສະມັດຊາແຫ່ງຊາດຖືກຍິງເສຍຊີວິດໃນອີກເມືອງໜຶ່ງຂອງແຄວ້ນແຄບາປັດຕູນຄວາ ແລະ ໃນວັນດຽວກັນ ຜູ້ນໍາທາງການເມືອງອີກຄົນໜຶ່ງກໍຖືກຍິງເສຍຊີວິດຢູ່ສໍານັກງານການເລືອກຕັ້ງຂອງພັກໃນແຄວ້ນບາລູຈິສຖານ.
ສ່ວນວັນທີ 30 ມັງກອນ, ເກີດເຫດລະເບີດຫລັງການຫາສຽງເລືອກຕັ້ງ ສົ່ງຜົນເຮັດໃຫ້ມີຜູ້ເສຍຊີວິດ 4 ຄົນຢູ່ແຄວ້ນບາລູຈິສຖານ ໂດຍກຸ່ມລັດອິສລາມ (IS) ໄດ້ອອກມາອ້າງວ່າເປັນຜູ້ຢູ່ເບື້ອງຫລັງເຫດການດັ່ງກ່າວ.
ທັງນີ້, ປາກິດສະຖານຜະເຊີນເຫດໂຈມຕີໂດຍກຸ່ມຕິດອາວຸດອິດສະລາມເພີ່ມຂຶ້ນນັບແຕ່ປີ 2021 ເມື່ອຂໍ້ຕົກລົງຢຸດຍິງລະຫວ່າງກຸ່ມຕາລີບັນຢູ່ປາກິດສະຖານກັບລັດຖະບານຢຸດລົງ.
