ຈິເລປະກາດສະຖານະການສຸກເສີນ ຫລັງໄຟໄໝ້ປ່າຫລາຍຈຸດທົ່ວປະເທດ ມີຜູ້ເສຍຊີວິດແລ້ວນັບສິບຄົນ

ຈິເລປະກາດສະຖານະການສຸກເສີນ, ໃນຂະນະທີ່ປະເທດກໍາລັງຕໍ່ສູ້ບັນຫາໄຟໄໝ້ປ່າທີ່ລຸກໄໝ້ຫລາຍຈຸດທົ່ວປະເທດ ເຮັດໃຫ້ມີຜູ້ເສຍຊີວິດແລ້ວຢ່າງໜ້ອຍ 51 ຄົນ ແລະ ມີທ່າອ່ຽງວ່າຈໍານວນຈະເພີ່ມສູງຂຶ້ນອີກ.

ປະທານາທິບໍດີ ກາເບຣີ ບໍຣິກ ຂອງຈິເລ ກ່າວໃນຖະແຫລງການທາງໂທລະພາບວັນທີ 3 ກຸມພາວ່າ: ເມື່ອພິຈາລະນາຈາກສະຖານະການທີ່ພວມເກີດຂຶ້ນ ມີທ່າອ່ຽງວ່າຈໍານວນຜູ້ເສຍຊີວິດຈະເພີ່ມຂຶ້ນຢ່າງແນ່ນອນໃນໄລຍະຫລາຍຊົ່ວໂມງຕໍ່ໜ້າ.

ທ່ານກ່າວອີກວ່າ: ກະຊວງປ້ອງກັນປະເທດຈະສົ່ງໜ່ວຍທະຫານລົງໄປພື້ນທີ່ທີ່ໄດ້ຮັບຜົນກະທົບ.

Marga Marga ແລະ Valparaiso ເປັນສອງແຂວງທີ່ໄດ້ຮັບຜົນກະທົບຮຸນແຮງຈາກໄຟໄໝ້ປ່າ ໂດຍມີການປະກາດເຄີຟິວລະຫວ່າງເວລາ 08:00-12:00 ໂມງ ໃນຫລາຍທ້ອງຖິ່ນ ເພື່ອອໍານວຍຄວາມສະດວກໃຫ້ປະຕິບັດການສຸກເສີນ ແລະ ການຂົນສົ່ງ.

ທ່ານ ແຄໂຣໄລນາ ໂທຮາ ລັດຖະມົນຕີວ່າການກະຊວງປ້ອງກັນຄວາມສະຫງົບ ກ່າວວ່າ: ໄຟຍັງລຸກໄໝ້ຢູ່ປະມານ 92 ຈຸດທົ່ວປະເທດ ແລະ ສົ່ງຜົນກະທົບຕໍ່ເນື້ອທີ່ປະມານ 43.000 ເຮັກຕາ ໂດຍປັດຈຸບັນເຈົ້າໜ້າທີ່ມອດໄຟຄວບຄຸມໄຟໄດ້ແລ້ວ 40 ຈຸດ ແລະ ຍັງພະຍາຍາມມອດໄຟໃນອີກ 29 ຈຸດ.

ທີມກູ້ໄພກໍາລັງເລັ່ງມອດໄຟຢູ່ບັລປາຣາອີໂຊ ເນື່ອງຈາກຈຸດນັ້ນຢູ່ໃກ້ເຂດເມືອງ ເຊິ່ງເຮັດໃຫ້ມີຄວາມສ່ຽງສູງຈະສົ່ງຜົນກະທົບຕໍ່ປະຊາຊົນ, ເຮືອນ ແລະ ອາຄານສະຖານທີ່ ໂດຍໄຟໄໝ້ປ່າຢູ່ບັລປາຣາອີໂຊສ້າງຄວາມເສຍຫາຍໃຫ້ບ້ານເຮືອນໄປແລ້ວປະມານ 1.100 ຫລັງ, ເຜົາໄໝ້ເນື້ອທີ່ປະມານ 6.800 ເຮັກຕາ ແລະ ມີລາຍງານຜູ້ສູນຫາຍ 372 ຄົນ.

ອ້າງອີງ:

https://edition.cnn.com/2024/02/03/climate/chile-wildfires-state-of-emergency-intl-hnk/index.html